講到打劫應該唔少人即刻諗起《GTA》，不過另一隻打劫 Game《PayDay》都有超大量 Fans (喂你睇下 Steam啲DLC都知啦)，而鐘意犯案既你好快就有多個選擇啦，黎緊 10月就會有一隻全新既 4人合作打劫 Game《RAID: World War II》上市，而且打劫個對象仲要係希魔！

呢隻《RAID: World War II》係由《PayDay》系列首席設計師 Ilija Petrusic 所開發，有玩過《PayDay》既朋友都知道遊戲設定極為細緻，真係好似訓練你做大賊咁 (又踩場又要癱瘓警鐘等等)。去到《RAID: World War II》入面都見到幾濃既《PayDay》味，遊戲質素應該就唔洗擔心啦！

《RAID: World War II》採用第一身視點，同《PayDay》一樣每個玩家都有自己既技能，一樣可以透過升 LV 黎點技，睇黎我又可以玩潛入 Build啦！
今次遊戲背景係講二次世界大戰其間，玩家操控美國、英國、德國同埋蘇聯既 4位特工走入去德國既勢力範圍入面打劫其希特拉既金庫，同時會有任務係隊冧德軍既高層，打劫呢件事突然變得好高尚，並唔係為咗私利而係為咗打敗納粹做野！

為咗令到玩家更加投入做義賊，所以製作組特別整埋二戰其間既柏林、易北河附近地形，務求令大家更感受到自己深入緊德國陣地咁話，丫唔知會唔會有香港人最熟悉既德國城市紐倫堡呢。

因為係二戰年代所以用啲野係有古早味啲架啦，不過都係可以用錢升武器同配件

《RAID: World War II》會率先係今年 9 月 26 日 PC Steam 上市，PS4 / Xbox One 版本就會係 10 月 10 日先係北美上市，到 10 月 13 日就會全球上市，遊戲支援 4人合作。