Splatoon2 祭典由開始投票到正式開始都等左成個禮拜，終於等到佢夠鐘開始，而且個時間仲係擺明欺負社畜未有得收工既既星期五下晏2點，到底今集既祭典同平時有乜唔同？即刻帶大家睇下。

公主同伊達都換左新衫

祭典時同平時一樣都會有兩張隨機地圖，但係就會多左一張隱藏地圖Mystery Zone，除左個場充滿左惡意一個唔小心就會跌落水之外，中間仲有兩個移動平台，一個唔小心就會比人落閘放狗。

地圖中間有兩個移動平台

祭典獨有既Mystery Zone

講返玩法，祭典既玩法其實同平時打Regular match差唔多，都係計量地面積，不過就多左個『組隊』同埋平時都有既『單排』，『組隊』只會打返同樣都係隊排既人，不過好處係同朋友一齊玩既時候唔洗再自相殘殺。

上面係隊伍，下面係單排

仲可以鎖密碼，不過邊緣人無朋友仲鎖乜野密碼。

打完之後會跟據貢獻比分，儲夠分就會有新稱號，贏左會額外多3分

打祭典到底有乜野著數？如果大家平時有留意，應該會見到右上角時常有一個海膽咁既Icon 打極都係0個，而果個其實係海螺黎，可以將你覺得主技好用／件衫靚但係無3星既裝備打到3星，唔洗迫住去鋪頭買樣衰3星衫黎著。

祭典打完之後會跟你既稱號同埋揀既隊伍送海螺，就算你唔得閒玩，只要做一個稱職既勝利球迷，都可以躺著賺。

廣場貼滿左祭典有關既手畫告示，有好多都好好笑

仲可以近距離睇到公主同伊達跳舞

社畜既你仲等乜野？今晚準備好通頂未？