世事嘅嘢……Square Enix 旗下手機遊戲《SINoALICE》主打暗黑系童話設定，加上晨早講定會同同社大熱作品《NieR: Automata》會有合作 Event，所以未開 Game 已經備受注目……
【到而家都仲未知／未玩／未買《NieR: Automata》嘅朋友可以按這裡了解更多】
點知天氣不似預期，《SINoALICE》今年 6 月開始營運之後，因為登錄人數比預期中多十九幾萬倍，Server 秒死，結果開 Game 往後嘅一個半月，玩家想玩呢個遊戲嘅心情，已經變成「我淨係想入到 Game」之類嘅人生挑戰，所以好多朋友都忍受唔住，含淚棄 Game。
不過，而家個 Game 營運上已經順暢返好多，雖然每次定期維修嘅時間都頗長，但已經唔會再玩玩吓彈 App，而之前激到玩家經常爆血管嘅「食咗體力入唔到戰鬥」「食咗石但抽唔到武器」之類嘅問題亦都好似無再發生！如果你仲未棄 Game 而又對 NieR: Automata 好有愛嘅話，就要留意以下消息啦！
活動期間會出現：
1－Automata 專用劇本
2－抽蛋期間限定：Automata 三位主角（2B、9S、A2）以及 Emiru 職種及專屬武器
3－Automata 遊戲歌曲（BGM）
而活動流程亦好簡單：玩【Automata 專用劇本】獲得【活動金幣】；儲夠一定份量【活動金幣】就可以去交換所換取 Automata 相關道具或其他遊戲獎勵。
9S 同 Emiru 會成為遊戲入面僅有嘅男角色（重點錯）
另一方面，講咗好耐嘅「公會鬥技場」經歷兩個月嘅……改善之後（喂）
官方亦都宣佈：終於玩得，8 月 3 日開放！不過唔知到時正式實施時會唔會 Lag 呢……
未入公會嘅快啲入
雖然我本人就無再認真煲呢隻 Game，不過都仲有日日 login 拎石嘅！活動開催嘅話，我應該呢兩日都會開返 Game 玩睇吓咩狀況～至於經歷過開 Game 期間惡夢嘅朋友，或者而家就係你考慮落坑嘅時候啦（笑）
畢竟人設還是很吸引的
遊戲雜食向，FPS 苦手，全種類 RPG 專攻，重度聲優控。使用機種：Xbox Series X｜PS5｜Nintendo Switch｜Steam Deck。