係 Steam 出咗好一段時間既恐龍時代多人合作求生遊戲《ARK: Survival Evolved》開發商 Studio Wildcard 突然發布新消息，指原訂於 8 月 8 日全球上市既 Xbox One / PS4 版本，需要推遲到 8 月 29 日先出到街，等緊既朋友真係要 DKLM 啦。

《ARK: Survival Evolved》係由 Studio Wildcard 於 2015年 6月以 Unreal Engine 4 製作既多人生存類沙盒動作冒險遊戲，主要視點為第一身，不過係某啲情況下可以轉為第三身視角。玩家舞台係一座充滿恐龍既島嶼「方舟」，所以其實嚴格黎講並唔係正式既恐龍時代，有啲似侏羅紀公園咁。而個島就好鬼大，陸上面積約為 36平方公里，海洋約為 12平方公里，呢個數係未計山洞同海底面積，要行都行死你果種。玩家就需要係呢個周街都係恐龍既環境下透過打獵、種植、科研等等多種方式黎生存，另外仲需要起基地黎保護自己防止比其他玩家打。

隻 Game 最正係好多痴線設定，你肚餓又無能力去打獵係可以隊冧其他玩家再煮佢啲肉黎食，食飽當然有得屙屎，舊屎除咗可以要黎做肥料耕種之外仲可以直接拎黎食！另一樣幾有特色既係玩家會因應唔同部位受傷就會得到唔同既傷害，所以瘋狂扑頭既話就會昏迷，咁就可以活捉啲恐龍或者其他玩家 (儲糧？)。捉到既恐龍仲可以馴服黎做騎寵或者運輸用。恐龍就有超過60種，仲會有其他史前物種，例如渡渡鳥、劍齒虎、真猛瑪象、巨脈蜻蜓等等。

隻 Game 仲支援單機或者多人連線的，多人連線係 PC 版就有得自己開 Server，或者入官方 Server (支援 100+玩家)。咁多人就梗係會有部落系統，所以有興趣玩既朋友越早入 Game 越好，你知啦……Online Game 唔鬥多人唔通鬥靚仔咩，對呢隻遊戲有興趣既朋友可以趁延期呢 3個星期，上 PS Store / Xbox Game Store 度預購返啦。(美版注意)

PS Store《ARK: Survival Evolved》傳送門

XBox Store《ARK: Survival Evolved》傳送門