Splatoon 2 繼承住任天堂所有Game嘅傳統，四個字「易學難精」，但係佢同Super Mario 3D World ／Zelda：BOTW果種「儲野果D咁難，我打唔贏咪唔玩囉，我都叫爆左機丫」唔同，佢真係有個Ranking係度，你真係會卡死係低階場，你真係會知道自己打到一Pat屎咁。

認真，我真係打到一Pat屎咁。由細到大我打呢D Game 都唔係好掌握到。

因為我個人好唔擅長反應，我一定要首先計劃好，然後做出黎，中間有少少出錯我可以修正，通常再準備埋Plan B、Plan C，有咩事都有預先諗好嘅應變方法。

但其實Splatoon唔係咁，佢要求你自己制造令自己有利嘅場地，佢要求你反應快速地移動，佢要求你同時睇住自己大絕儲左幾多，佢要求你投擲同射槍同儲油三樣野中間做到平衡。

有D人好擅長呢種無Plan，隨機應變嘅遊戲，佢地好快就可以做到一D正確嘅決定，好快就可以打死你，好快就可以佔到優勢。

但我唔得。

於是我係升上Rank 10呢個旅程度，我苦苦思考，諗下究竟我要係呢隻Game度點生存。

坊間好多攻略都有講「呢隻Game油地先係重點，殺人有幫助，但殺完人無人油地係會輸。」

咁好啦，我決定專心油地，而當一個Splatoon玩家決定專心油地嘅時候，佢地都會選擇地拖。但我經驗發現，咁係錯嘅。

因為拎住個地拖嘅打機白痴（即係我）係無辦法應付遠距離同中距離嘅攻擊嘅！

即係話，你拖兩下，死；拖兩下，死； 拖兩下，死；拖兩下，死；拖兩下，死；拖兩下，死；完場。

最後拎400分（注意，D分齋計油地）。咁即係點？即係輸囉！

咁或者我試下用水筒丫，我射得唔準丫嘛，一桶野咁潑出去囉！

對唔住，如果一個人用槍係射唔中的話，點解用水桶會潑得中？成件事根本唔Make Sense，條友打老婆，離婚，諗住娶你；你憑咩覺得佢娶左你之後唔會打你？

係喎，佢真係打我，仲打得好甘，又係一局拎400分。咁又即係點？咪又係輸囉！

然後，我發現，我應該回歸基本步。

1. 如果我唔死有咩著數？

我可以放多兩下大技！

2. 點解我死？

因為我比人殺！

3. 點樣可以唔比人殺？

避開D人！

4. 如果避唔到呢？

試下打佢！

經過呢四點思考，我得出一個結論，而呢個結論，正正係我呢個打機白痴係呢隻咁撚難玩嘅Game入面嘅生存之道。

首先，我揀一支攻速高嘅槍，然後，主要用呢支槍黎油地下！

油地下嘅目的，係儲大技。最好揀D連大技都係油地下嘅槍，即係吸塵機械人或者連續手榴彈之類，一有大技，就亂放，都係為左油地下。

見到敵人，走！

明知打唔贏，點解要打？行去第二度再油地下啦！

走唔到咁點？我手果支話晒都係槍黎，射佢啦！目的唔係要好型咁殺佢，我要嘅只係我死嘅同時你都死啫！

自從用左呢個方法之後，我每鋪都900-1300分不等，然後勝率都高左；有時我覺得就算輸左，我拎過一千分都算對隊友有交代。

所以話，打機白痴唔緊要，最緊要搵到自己嘅生存之道。