話說早幾日有朋友同我介紹咗隻大陸做既正 Game，一聽見大陸做就點都幾抗拒下，直到佢講我聽隻 Game 實際上係玩乜就開始改觀啦，因為呢隻 Game 真係要大陸人做先有 Feel。點解咁講？因為佢成隻 Game 既概念就係講點突破網絡封鎖。
相信大家都知道係大陸你唔翻牆就連 Facebook 都上唔到，據聞而家已經連翻牆都會禁止埋，好似話所有 VPN 都無晒……真係好慘豬。
面對呢種現像，「ZuoBuLaiGame」就製作咗呢隻 Game《THE WALL 牆》去向全世界反映大陸網絡無自由既景況。
係呢隻《THE WALL 牆》我地都係扮演住乖乖聽話既良民，不過相信係製作人想反映大陸既現况所以每位良民都會落咗孖葉。我地既任務就係要一邊扮良民一邊避開哨兵既監視，去偷打破「圍牆」既鎖匙同工具。
當你有工具去打破圍牆之後，就可以用鎖匙去開 Block 咗既網站，然後大家會見到一堆好熟口面既網站例如 YouTobe、Googlee、CornHub 等等。咁如果去偷野果陣失敗哨兵就會警告你係限時之內返去排隊，你知啦啲人阻住國家發展真係唔好不該架嘛。
呢隻遊戲已經係 Steam 賣咗個幾月，到而家都仲係極度好評，而且仲只係需要 15蚊……不過最特別既一點係 Steam 遊戲頁面上面都有寫到，就係製作人話「由於本作題材的特殊性，其流程較短，而且其制作目標不是傳統遊戲那樣「為了讓人爽」的。玩了之後可能會覺得不太舒服。」。亦即係話你玩完無論覺得好定唔好都可以隨時無條件退款，證明咗製作人並唔係打算靠呢隻遊戲賺錢，純粹係想控訴佢地身處地方既網路壓力。
呢隻題材咁敏感既作品《THE WALL 牆》真係唔知幾時會比人河蟹，可能好快製作人就比人拉埋都唔奇，想體驗下呢隻遊戲就要快啦！
VJGamer總編，細細個已經蒲機舖，機齡甚深，熱愛電玩文化。