上星期既記者試玩會入面我地試到呢隻等在 n年既《Detroit: Become Human》，今次試玩既版本係同上年 E3 展示既影片屬同一版本。玩家扮演擬真人造人 Connor 去處理特殊事件，不過就唔係慣常用武力打敗敵人呢類野，而係透過搜集各種訊息去進行談判。

今次既試玩係控制特殊用途Android (係擬真人唔係電話 OJ? ) Connor，佢係製造出黎專門負責處理擬真人異常事件。咁一開始已經去到事發既地點，係呢度有一隻挾持住細路既 Android 同警察對峙緊，而系統一開始會要求玩家先向現場指揮官報到。

遊戲第一個選項：救唔救條金魚

我為人咁善良就梗係救啦

因為指揮官對 Connor 既藐視，所以乜春情報都唔透露比佢，不過作為專門處理呢類事件既 Android 本身已經內置咗大量既感應裝置，只要搵到唔同既線索就可以腦補重組事發經過。呢 Part 其實同《Heavy Rain》又或者《Batman Arkham Knight》都有啲相似，不過就做得更加細緻。

擺到明唔想理你

經過初步調查之後發現挾持個細路既係呢間屋既管家 Android，佢因不知明既原因做底咗男主人，而挾持緊個細路原來係戶主個女，而家就係出面露台同警察對峙緊。

任務指示非常清晰

我地係主人房度發現咗個裝槍既喼，經調查之後知道原本係收係個櫃入面既槍同子彈比人拎咗出黎，但係把槍就仲未搵到係邊。另外係細路女間房地下發現既 Headset 得知案發時佢炸緊機，所以開槍既時候佢並不知情，同時係佢部 iPad上面知道管家既名稱 。

發現裝兇器既盒 (同場加映友好媒體希治閣)

腦補後組織返事發經過，留意下面條 Bar 係可以倒帶睇返唔同時間點發生緊乜

係iPad片段得知管家個名叫 Daniel

事發時炸緊機

每次得到新情報都會提高任務成功率

係客廳中間條警察屍經過我地強大既腦補後知道佢黎到時男戶主已經 GG，而管家正在挾持細路女，呢位警察企圖制止管家時被槍殺的。之後就發現把警槍跌咗落枱底並且出現選項 (拎定唔拎)，而且只有一次機會，而家唔拎之後就無得再拎返。

可疑既地方就會出現 Analyze 字眼

調查後發現係警察郁手先 (哦，總之你打人就唔啱啦)

搵到失落既警槍 (枱底都搵唔到班警察真係叻到呢……)

拎唔拎只有一次機會

之後行埋去男戶主屍體度又出現腦補選項，調查後發現原來管家殺佢果陣係度掃緊 iPad，再進一步調查部 iPad 就發現戶主原來睇緊新 Android，所以管家以為男戶主打算買隻新歡黎取代而 (喂睇下唔代表想買架，惡到呢……)。

試玩去到呢度既時候本身我仲想繼續探索，不過突然強制我出露台同管家談判，似乎係有時間限制 (咁又正路既，邊有可能個犯會無了期咁等你……)。另外每次腦補完成之後都會增加任務成功率，當你收集得越多資訊相對地就有越多彈藥去談判。

可以見到本身鎖住既選項會因為有呢項情報而解鎖

去到最後談判階段，如果知道管家個名就會令佢對你既信任度提升，透過每次既對話會出現唔同選項，例如之前發現果把警槍如果有拎走的話就可以選擇用唔用，又例如你知道佢爆 Seed 既原因係以為戶主想換走佢，就會有選項話「丫，我都了解你感受」去博得管家信任。因為時間關係我只有 99% 信任度，成功令佢放走人質但係無辦法救返管家，據聞如果 100%係可以2個都救晒的！

應管家要求趕走架直升機

管家覺得你話到事，提升對你既信任度

試玩去到呢Part完結……我唔 Po 呢 Part 後面會點啦 🙁

總結

雖然我就救唔晒2個，但其實除咗呢2個結局之外仲會有官家發爛渣攬炒結局，有趁機會一槍啪死管家結局，甚至有 Connor 捨身救人結局等等。但係呢隻遊戲既魅力在於佢既真實性，唔理任務成功定失敗個故事都會繼續，就連 Connor 死埋都唔會 Game Over，只係會 Close 咗呢條線咁解。最正係每個行動同決定都會生新既分支出黎，據聞成隻 Game 淨係劇本都有2000頁咁多，真真正正咁係建構緊一個虛擬但又真實既世界！！

《Detroit: Become Human》呢隻咁出色既作品預定 2018年正式推出，將由 PS4 獨佔，有興趣既朋友記住係下星期既香港動漫電玩節，PlayStation既攤位度將會玩得到。

最後送上今年E3所播放既 Trailer