自從上年香港第一間 LEGO Certified Store 出現之後，的確多左好多人玩 LEGO。LEGO 嘅官方宣傳活動亦比以往嘅多左密左。今年仲有個幾令玩家注目既大型活動《Cities Of Wonders》，會同時係新加坡、馬來西亞、台灣同埋香港總共四個個地方同時進行。

四個地方都同樣用 LEGO 去砌出當地嘅特色文化或者建築去推廣當地嘅城市特色，而玩家除左去朝聖之外梗係想換到啲特別限定 Set 啦。四套限定都要活動期間內去當地某地方換領，咁我地逐個睇下有咩分別！

馬來西亞《Cities Of Wonders》

馬來西亞地區四款限定分別係「馬來西亞國花大紅花 Bunga Raya」、「舊村屋 Kampung」、「月亮風箏 Wau」同埋「馬來粽 Ketupat」，每一款只要期間喺指定店鋪購物滿 $300馬來西亞令吉 (大約 HKD 545) 就換到一款。

新加坡《Cities Of Wonders》

新加玻地區限定就多一款總共五 Set，分別係「街頭餐車 Food Cart」、「咖央多士餐 Kaya Toast」、「紙巾霸位(笑) Chope Seat」、「辣蟹 Chilli Crab」仲有「娘惹糕點 Nyonya Kueh」，每一款只要期間喺指定店鋪購物滿 $80 新加坡幣  (大約 HKD 452) 就換到一款，仲要你換第一款「街頭餐車 Food Cart」嘅時候會比張印仔卡你，集齊五款仲可以換埋個 Display 底座！

台灣《Cities Of Wonders》

台灣地區限定就四款建築物包括「中正紀念堂 Chiang Kai-Shek Memorial Hall」、「85大樓 85 Sky Tower」、「赤崁樓 Provintia」同「台中火車站 Taichung Station」，每一款只要期間喺指定店鋪購物滿 $2000 新台幣  (大約 HKD 510) 就換到一款。如果你身在台灣，第一款「中正紀念堂 Chiang Kai-Shek Memorial Hall」到 7 月 9 號都仲換得到！

香港《Cities Of Wonders》

自己地方香港地區限定當然留最後講啦！四款建築物包括「大埔鐵路博物館 Old Taipo Market Railway Station」、「上環西港城 Sheung Wan Western Market」、「尖沙咀鐘樓 Former Kowloon-Canton Railway Clock Tower」同「終審法院大樓 The Old Supreme Court Building」，「大埔鐵路博物館」就應該換晒，不過「上環西港城」喺太古城中心《Cities of Wonders》活動場內仲有得換。

「尖沙咀鐘樓」就過兩日喺銅鑼灣時代廣場新開嘅 LEGO Certified Store 換，而最後嘅「終審法院大樓」就要喺香港動漫節場內先換得到！

之前都講過要指定地點同指定消費額先換到，咁我地香港就梗係威水過其他地方啦！為咗顯示我地香港係富庶既城市，呢四款咁珍貴嘅香港特色地標 Set ，只要喺上述地點買滿 港幣 $1200 LEGO 產品 (需包括LEGO CITY 或 LEGO Friends系列)，咁就可以換到啦！

聽落係咪好簡單呢，有愛嘅玩家記得去買野換晒四款返嚟玩啦！

但係你如果覺得做咗水魚啦喎，咁過幾日再分享另一種方法比大家製作香港特色地標，記住留意VJGamer！