呢隻《Wild West Online》係今年 5月果陣唔小心 Leak 咗啲圖出黎，仲令到好多人以為係《Red Dead Redemtpion 2》既畫面，所以開發廠商 612 Games 先急急腳走出黎回應並且順便公開呢隻 Game，咁當然亦都令到好多人注意到呢隻潛力十足既遊戲啦，而家官方就正式宣布開放預購以及係近日會公布埋實機遊玩影片。
就咁講 612 Games 應該無乜人知佢地乜春，實情佢地既團隊係做過唔少勁 Game，最為人熟悉既就係《League Of Legends》，其他知名作品仲有《Call of Duty 4: Modern Warfare》、《Crysis》、《Neverwinter Nights》等等，基本上製作團隊既實力係無庸置疑。
《Wild West Online》係一隻 Open World Online Game，係呢個世界入面玩家可以選擇做正義L 加入警隊行列，又或者做為非作歹既不法份子。係遊戲入面可以選擇扮演唔同職業，例如可以玩掘金又得，做農夫又得，唔同職業交織下就會變成遊戲入面既經濟鏈。當然有市場之後亦都方便玩家去收集唔同既資源黎起基地同製作物品。
做得 Online Game 幫會系統又點少得，如果係選擇同凱婷為伍做壞人既話就可以玩搶銀行、打劫其他人舖頭呢類野。當衰野做得咁上下就會有被懸賞星星，當呢啲星星超過一定數值，就會成為其他賞金獵人玩家既目標。
《Wild West Online》預定會係今年 12月正式上市，會係今個月底前進行 Alpha Test，秋季進行封測，當然根據種種因素隨時會延期啦，咪 J 住封測先囉！
VJGamer總編，細細個已經蒲機舖，機齡甚深，熱愛電玩文化。