文長慎入有劇透果D 唔講啦！一樣係最尾會有總結，唔想睇可以直接飛。

說起來香港人幾乎冇諗住去搵呢隻game 來玩，真係令人覺得相當奇怪。明明已經特登整埋中文版架啦！仲有咩野阻止佢地去玩呢？

講返少少背景資料先，呢一隻Prey，通常會叫Prey (2017)，係舊年E3 先公布既遊戲來。係好耐好耐之前，有另一隻Prey，個故事就再奇幻得多。如果上個世代(Xbox 360/PS3) 有玩過既話，都應該會記得個故事大概就係︰一個美國原住民(?) 遺傳左家族既靈力，可以變成靈魂狀態咁攻擊敵人。咁啱佢條女又比外星人捉左佢，於是佢就追上去用主角光環(即係靈力同埋佢死鬼阿爺既指教)，最終打贏左好好好好勁既外星人，然後用傳送門返返地球。

最後，一個本來死左既重要角色竟然出現返同主角講主角你咁勁，宇宙仲好多地方需要你去拯救架！主角就跳左入傳送門去左唔知邊度……..

點解要up 咁多廢話？因為當年佢就係停左係果度。然後年復一年，又年復一年，呢個咁挑逗既結局都冇續作。直至Prey (2017) 推出，當年既開發者先話佢地唔係冇錢冇時間，而且仲要放埋哂D當時既相法同埋故事碎片出來，比大家睇下個故事如果出會係點發展落去。但係唯一一個出唔到Game 既原因係︰佢整唔到，佢唔知點整先可以整到自己心目中既Prey，然後就沒有然後了……

呀呀呀呀！你咁同富奸拖稿有咩分別呀？唔係！係衰過拖稿呀！

好發洩完入正題，先來介紹一下隻Game。

相信呢條官方既動畫對於故事既背景介紹都非常充足

遊戲既玩法方面，Prey 係由Arkane Studios 操刀製作，製作室出名既作品仲有Dishonored 系列，可以話係將第一身潛行動作+創意解謎過關由SteamPunk 帶到去Sci-fi。如果話Dishonored 有以前Thief 既影子，咁Prey 就一定係有Dead Space 同埋System Shock 既影子。基本上鍾意科幻、外星人同創新武器既話， Prey 梗有一個地方令你鍾意。

題外話︰希臘神話之中，Typhon 相傳為Gaia 女神所生的最後一個兒子，係一隻非人非神既謎之生物，後來多數用來做”怪物”既Reference

咁究竟呢隻Game 值唔值得玩？先來睇睇佢既優點

呢個真係一個好大既太空站呀！

我個標題係純粹用來搞笑既，冇錯，Prey 的確唔係一隻開放世界遊戲，(啱啱先講完係得一個太空站，點開放世界啫) 但係呢個太空站隨時可以用你30-40 個小時去做探索，分分鐘多野玩過一隻所謂開放世界大作。

太空站咁大，係有佢既目的，玩家第一次見到太空站內部既時候，絕對會覺得極為唔對路。因為Talos I 既內部設計係極度違反常識。通常係近未來既科幻作品來講，例如遊戲既Dead Space，電影有Alien、Interstellar、The Martian 咁，入面既太空站/太空船內部設計都係極為簡潔既。係普通燃料火箭既年代，帶野上太空係一種極難同極為昂貴既事，所以太空站內部都唔會有咩裝飾，所有野都係有用。

Talos I 同你講，唔好傻啦！我就係要整到成個地方好大，而且好多空間，仲要金雕玉砌，為既只係同大家講Transtar 好有錢。點樣用場景設計，尤其是係只用太小呢一點，來去到講故事背景或者側面描寫世界觀，我諗呢個係其中一個好好既示範。

呢個太空站唔單止大，四通八達，而且充滿左唔通既隱藏目標。玩起來你會覺得自己玩緊惡魔城或者Metroid，冇錯，唔聲唔聲竟然都係一隻Metroidvania 類型既遊戲來。呢類遊戲就係透過需要玩家前進之後，得到能力同鎖匙之類，再返轉頭開門搵寶物，來不停挑戰玩家既記憶力，同收集所有秘密既決心。

雖然作為一隻現代遊戲，Prey 比左好多工具大家去搵你需要或者想去既地方。包括好多支線或者只係隱藏既寶物，都可以直接用地圖Mark 低比你搵到鎖匙之後再重回，但係大部份享受Metroidvanina 式遊戲既玩家，都會直接熄哂所有提示，憑自己既記憶力去搵齊所有野，或者憑運氣…..冇所謂啦！呢個熄哂提示既功能某程度上仲係一個提升遊戲代入感既完美示範。因為只要用聲音或者遊戲中既文字文件比既提示已經足夠既話，比玩家自己去搵個代入感先係最高既。如果下下都有畫面標示，咁其實你一早標咪得囉，我唔洗搵任務啦。

遊戲入面每個需要能力去打開既門，都至少有兩種方法可以開，因為遊戲入面你除左可以收集能力之外你仲要選擇能力，呢樣野之後再講。問題係，佢考驗你既唔單止係有冇收集到某種能力，而係你有冇去用創意諗下邊種能力係可行？

唔駛講野，我會用行動來答你

係收集物資，武器，彈藥同埋升級配點來講，你可能會覺得呢一隻係RPG，好老實講，佢的確係。但係點解會有「覺得」呢兩個字呢？因為大部份人玩RPG 玩慣左，見到隻Game 竟然冇對話選項就覺得佢唔夠RPG……………唉

Prey 入面對於故事選擇既方式有D 似Disnhonored，但更加似Deus Ex。你唔係揀，你係做！遊戲入面第一個道德上既抉擇就係︰你面前有一個死刑犯，佢既罪行係重到一定判死刑架喇！講真，來到太空，佢做過D 乜，又有邊個有資格去判斷對定錯。佢身後有一個寶箱，如果你由得D 異型殺左佢，你會從中學到異型變身既能力，可以去到寶箱。但如果你放過佢，佢就有命直接同你講寶箱既密碼。

佢係一個死囚，而且仲要唔係你殺，只係放D 異型出來殺佢。講真個太空站咁兇險，而家佢唔死可能之後都會遇到異型比佢地殺死，有咩分別？如果放左佢出來佢繼續殺哂太空站其他人點算？

但係你亦都可以講，佢係一條人命，無論佢做過咩事都好，都係一條人命，佢而家肯幫你求你原諒。好退一萬步講，如果佢出左來之後反口要傷害你，佢都手無寸鐵，反而主角你全副武裝，洗乜驚？

呢個係永遠唔會完結既討論，係道德上永恒既灰色地帶。遊戲大可以好似其他Game 咁，比個對話選項你，然後睇住動畫個主角點樣處死果個人，但係Prey 冇咁做。佢要你自己撳果個掣，做處刑者。

呢個又牽涉到主角對於自己既尋找。可以好肯定咁話比你知，主角係失憶之前，係一個仆街來。頭先講既咩人體實驗根本成件事都係主角諗出來。比著係以前呢D 係要討論同諗既咩，一野就殺左佢啦！但係主角每次失憶之後，佢既個性都會唔同左，佢每次都有一個機會去新選擇，佢可以做好人，或者做返壞人。而你，就係代入佢今次失憶既呢個身體入面，做一個你自己認為最好既選擇。

冇角色扮演，冇既定身份，冇人物關係，你只要問心果句就得，呢個係成隻game 最有力量既地方。

你可以繼續做一個PK 殺哂所有生環者。唔洗架！你唔洗好似其他Game 咁要去到某個故事情節，再左揀右揀先睇個動畫殺死果個人架！你見到佢，一槍Headshot 佢就得架喇！所有NPC 都係咁，就係咁簡單！

或者你又可以選擇做一個好人，咁你就要負責保護佢地免受Typhon 既殺害。

你可以揀加強自己既體能，或者你可以獨力推開所有門，或者直接用物件丟死D 怪物。又或者你可以將外星人既能力加諸己身，放電放火或者變成一隻杯。咁樣係果D 推唔開既門前面，或者都會有一條門罅比你碌入去。

呢種用行動來代替對話既選擇我個人係非常鍾意。當然佢又唔可以話去到薩爾達咁用遊戲既互動性來說故事，不過最少遊戲故事既發展係因為跟住我既行動而改變，而唔係因為我隻主角既廢UP先…..

It is all about the details, and the attention to it

係講落去之前，大家聽首歌先。

呢首歌係我對呢隻Game 唯一一樣最驚嘆既野。

第一，佢係好聽先，同成隻Game 既OST 一樣，呢首歌係由Mick Gordon 作曲，佢既遊戲OST本身都已經係神級，呢首都可以位列於此。

第二，佢同成隻Game 既風格係夾既。果種電子音樂同Disco 風格，同遊戲入面果種復古得來科幻既感覺簡直就係形神相合，盡得神髓。

第三，聽佢既時候，你同時要做一場好難既戰鬥。呢首歌同L4D 果D 咩鐘聲關卡一樣，會引來好多怪。如果你話Reference 來講，我個人覺得佢就最似Alan Wake 入面有一關你要係演唱會場地開音樂，引一大堆鬼出來然後再用重型煙花殺佢地咁。遊戲本身既風格就係潛行壓抑既Game，你仲要做埋上面講果D 道德灰色既決定，來到呢個Moment 聽住D 咁High 既音樂，所有人都知道，你要爆喇！佢就係比你一個爆既機會！

第四，佢本身係一個主線任務…..入面既一個無關重要既部份。如果你探索得唔認真，你就必須要玩呢一場戰鬥，仲可能會死幾次，然後順便背熟隻歌添。好人好者探索哂其實你可以唔洗玩呢度，但係為左聽歌同埋殺怪既快感，你仍然會躍躍欲試。

第五，佢牽涉到世界觀同背景設定。正所謂打工仔，有邊個唔想討好腦細？只係為左討好佢，你可以去到幾盡先。Transtar 利用Typhon 來整既科技，最重要既一樣叫估Neuromod，可以令到人類瞬間學到世界上所有技能。如果你係行唔到路，腦退化症，要學返行路或者增強思考記憶，咁裝Neuromod 好正常。如果你好似主角咁，為求生存，咁用支針由眼球插到落腦底咁裝個Neuromd 落去令到自己好打D….都好正常！

但係條結他友原來本身唔識彈結他，而係為左討好腦細，為慶功宴獻上一曲，而特登裝，咁就令人難以想像。觀迎來到永不改變既資本主義下打工仔擦鞋之道。

一首歌，背面睇盛載住遊戲音樂風格主調，側面睇有背景故事設定，正面睇佢又係一個主線，由上面睇佢仲有得玩添！對於一個細節部份既拿揑，我覺得呢一個部份係好多遊戲需要學習既對象。

難得地好得人驚

我本身並唔係一個容易驚既人來….當然只限於打機同睇電影果陣。恐怖片十部有九部我都覺得係無聊兼白痴，果D 所謂恐怖game 更加只會令我訓著。

唯有係Prey，先令我有種驚既感覺。個遊戲嚇人既方式好單一，其實就只係因為Typhon 可以隨意變成任何物件，你先至會無時無刻留心佢地有冇存在，而佢地失驚無神咁唔知變左乜野咁彈出來，無論你遇到幾多次，都係會嚇一大跳。

好喇，去到中後期，因為你有掃瞄眼罩，終於都唔洗驚mimics….但係又到左要驚Phantoms 既時候。佢地就類似傳統恐怖遊戲既鬼咁，永遠係全地圖不停廣播噪音，而你又搵唔到佢地係邊。有人話可以聽聲定位，妖，隻Game 就係特登令你聽聲定唔到位丫嘛，如果唔係點嚇你啫！

跟住你行到某個位佢地就會瞬移跳出來，你驚完啦！打到佢一半血，佢竟然又瞬移去另一個你搵唔到佢既地方再嚇你第二次！真係心血少D 都會嚇到瀨屎…….

呢個都唔知算係優點定係缺點啦！雖然話係好得人驚，但係佢嚇人既手法始終係有D 單調既。最搞笑係本來佢有一隻更加勁既Nightmare 怪物，係會追住你全地圖係咁跑，你一係浪費好多子彈殺左佢，一係就匿埋避開佢，本來係好得人驚架！但係Nightmare 成間房咁大，基本上我求其入一間細房佢已經會比門卡住……..咁即係點啫…….你來搞笑架？

跟住我地來睇下佢既缺點

呢個世界公平咩？

Prey 呢個世界真係唔係幾公平。我有時都好明白，為左遊戲既平衡性同埋貼合返個背景設定，有時主角既武器係唔可以太勁。因為係太空站上面，如果個個都有自動武器既話，打穿左個大空站，咪全部人都PK?

咁但係點解自動炮台可以無限子彈機關槍？點解保安機械人可以用火槍燒到你大叫？你需知道隻Game 既怪下下都近攻，我都想燒人喎！呢個世界公平咩？

我都算，隻Game 明明有潛行元素，而且仲要有隻外星怪物係識隱形既添………….主角明明乜都可以學，偏偏係隱形學唔到。我都想隱形繞過哂其他野，我都想潛行架！呢個世界公平咩？

敵人可唔可以醒少少呀？

嗱！頭先Nightmare 果種根本就唔識追人既就唔講喇！但係其他敵人既應對方法都唔係好得去邊。通常都只係需要一把激光武器就掃得死添，去到後期就完全冇挑戰性。

例如所有識用能力既敵人，主角係有幾種方法去做範圍沉默，只要一沉默佢地就同廢哂冇分別，根本乜都做唔到。之前有講過Horizon: Zero Dawn ，入面既Boss 只要你打甩佢遠攻武器佢就自會用另一樣武器或者用近戰打你。

Prey 既敵人不論大小，佢地都只會有一種攻擊方式，而主角當然都有佢既方法去應對。只要封左佢地既唯一一招，佢地就連郁都郁唔到，就咁比你任殺。冇挑戰既Game 我見得多，咁冇挑戰都係第一次見！

除此之外，遊戲所採用既潛行方式亦都同Dishonored 唔一樣。Dishonored 既主角因為可以瞬移去好多唔同既地方，所以潛行來講係好有懲罰性，你搵唔到高地或者掩護咁係你既問題，敵人大老遠已經一定會見到你。相反，Prey 係用技能方式去增加你既潛行能力(類似Skyrim)，加左之後敵人能夠見到或者聽到你既距離會越來越短，加到盡，我恐怕你企係佢前面佢都唔會發現你。

咁樣係大大咁削減遊戲對於玩家運用智慧既獎勵，你唔會因為自己既小聰明而避開左隻怪而沾沾，因為只要你加爆個技能佢自然就會睇你唔到。呢個就真係好敗筆。

可以改善既地方

唔該Arkane Studios 你地做返擅長既野，我想要返瞬移然後爬走再皇天擊殺班外星人唔該
人類角色線雖然係刻意做到咁但係真係比較少，我想要更加多既人類幕後故事同埋更加多既道德灰色選擇
既然遊戲既方式都著重選擇，我希望下次會有更加多武器揀。不如就用遊戲入面既合成器開始啦！既然合成器無論係乜野只要有圖紙有材料就可以整到出來，做乜唔可以比玩家自己整圖紙呢？(詳見Mass Effect: Andromeda)
敵人真係要再加其他攻擊方式，就算係用異能既怪，如果比人沉默左，起碼都要識行過來用物理攻擊丫？都已經唔要求你地隻隻都識用武器喇！