《Mario Odyssey》新 Trailer 同 E3 Game Play 小分析

其實自從 Mario 64 開始，阿Mario大叔一無左頂帽就會周身唔聚財，行又行得慢，跳又跳得近，仲一路行一路扣血。到左今日，終於真相大白，原來頂帽先係佢本體。

所以你會睇到頂帽一飛出去，戴左係第二樣野上面嘅時候，佢個肉身就散左，然後跟住飛埋過去，塞晒係頂帽入面。嘩大佬，我睇返一次，差D以為自己寫緊 The Evil Within 2 嘅野呀。

Game Play 如無意外係 Open World，應該係Mario有史以黎第一隻真正嘅Open World。

即係 Mario 64 真係 Open 嘅地方得個城堡，其他都係揀星星再入去，Galaxy系列有條好明顯嘅路線比你跟，3D World更加係拆細到一條條路咁比你行。

而《Mario Odyssey》，睇佢Game Play你就見到佢去到一個新地方，但其實無野做，你要自己周圍行下搵野做，唔高興又可以走，應該可以算係真正意義嘅 Open World。

不過我估計都係需要收集到一定數量月亮之後先可以入某D地方，呢點都幾 Mario 64。希望唔好得 120粒月亮咁少。

每個唔同嘅地方都有唔同嘅特別金幣，係果度先用得，我估都係 D外觀野，衫啦，或者有間房仔比你擺下擺設之類。
但佢個 Game Play 又 Demo 比你睇有粒月亮要換成套墨西哥衫入去同D骷髏仔跳舞先拎到，呢點亦都係非常 Mario 64，有玩過嘅人都應該試過捉兔仔之苦。

然後，你會係另一段 Demo 度見到果隻令人又愛又恨嘅兔仔，雖然好似易捉左。

轉 2D 個 GamePlay 超驚喜，走入個水渠度，然後變左紅白機版嘅2D Mario。根據我對任天堂 Level Designer 嘅信心，係完全可以想像到將會有幾變態、有幾難玩。

Game Play 亦都 Show左一個 Mini Boss嘅打法，個 Mini Boss係新角色黎，個樣好似賤兔，唔知老任同Ubisoft有咩枱底交易。
可能除左賤兔Mario戰棋（呢隻我完全唔睇好）之外，佢兩間公司仲有其他野想搞。

而個 Mini Boss 嘅戰鬥就無乜特別，都係 Mario 傳統嘅 Boss，做某 D野會令佢可以比你踩，踩三下佢就死。

一定要講一樣野就係 Trailer 入面唱歌條女，叫Pauline，係 1981年街機 Donkey Kong 入面，Mario 要救嘅女友，簡稱 Mario 前女友，而家做左 Mayor Pauline （因為佢係 DK入面都係發左達的）。

我唔明點解香港好似無一個打機嘅媒體有提下佢，呢次係事隔36年，Pauline再一次同Mario係同一隻Game入面出現，完全係歷史性嘅 Event，琴晚條 Trailer 一出，所有鬼佬媒體已經嘩嘩聲問係咪 Pauline，問答環節仲即刻叫老任 confirm，而香港完全無人提我覺得真係好羞家。
而今次Pauline嘅出現，估計下集孖車同大亂鬥呢D Pauline 都應該會出場，咁係丫嘛，Daisy 呢 D二奶都有，點解前女友無先？