《足球小將》新手遊，例牌試玩向各位包膠。

以《足球小將》1-5代嘅回憶嚟講，今次呢隻game算超標完成，畫面流暢，經典場面都有原著7成；劇情對戰完畢可以收集敵方隊伍波衫，想我火炎史奈達穿上武藏隊波衫都一樣咁型﹗而今次陣式都係要靠收集，例如收集到三箭頭陣營，先至擺到武藏隊「三支箭」。

遊戲系統比想像中好，除咗有「力、速、技」第一重相性以外，仲有唔同指令表現會隨狀態而有三級會心一擊發揮；再加上球員本身有數值，指令本身都有相性，例如截波尅傳波、擋波尅射波等等，從而令隻game變化更大。

比賽入面，同其他足球game差唔多都係有氣力計同大絕，球員無氣，小志強都死，我試過SR小志強不敵N卡大頭仔，同埋無氣史奈達，真係禁區內都射唔入森崎。

球場係經典平面地圖，有自動、半自動同手動，遊玩感覺跟經典的確相似，fans似乎點都要玩下，但小弟目前未試到可以漏波，唔知係唔係cut咗？如果有巴打試到，真係要通知返我。

好啦，不過要提醒大家，今次隻《足球小將》一定係課金地獄，雖然首抽都多選擇，一粒夢幻球抽一次嗰個幾好，但唔好以為抽到張SSR會好勁，我無刷首抽都有一兩張SSR，但係？得一兩招絕招，無錯，唔同卡唔同招，得一想唔到二，例如我張SR「速」史奈達，就只得火炎扭波，後來打副本拎到張SR「力」史奈達，將佢招撞飛攔截，過畀另一張，後來醒覺埋，我張帝皇都係無火炎射球。而每招都有lv，可謂長升長有，玩落隻game真係同原著漫畫兩頁射一球一樣，有排你玩呀。

不過耐玩同呃課金係兩個慨念，暫時結論都算抵玩，睇劇情都抵晒。暫時隻game，最like有得自己set隊徽，我隊正正就搶先改咗叫 Hong Kong，主觀希望香港都有林源三；同埋門將救波動畫真係好睇。

缺點都有，首先就係有時人樣怪怪地，史奈達每次入完波都變咗笑口短髮，心諗我隻傲嬌乜料？仲有個自動戰鬥快速多膠魚，咁快乜都撳唔到，不如你俾我skip好過啦。

玩玩下，手痕睇咗幾頁新《足球小將》漫畫（事實係仲有追開），一睇嘩一聲，咩咩「上帝之手」、「170度瞓身傳球」、「斜角踩波車滑行」，咁隻《足球小將》一定有排玩啦，話唔定之後「優雅踩波車」都係一個event。