1.點先會贏？

好簡單，你架車快過人就會贏，我以Mario Circuit（花花盃）為例，150cc世界最快係1分47秒多少少。
普通人大概行2分鐘左右。即係話你最多可以快普通人大約13秒。
一隻紅龜阻你兩秒，一隻藍龜阻你三秒多D，你夾埋可以「剩食」7隻紅龜，4隻藍龜。
所謂「剩食」，即係唔係得你食嫁嘛，佢後面D人都會打佢，而且越後，抽野越好。
即係話，佢每比人打停一次，佢就要打返你一次先扯平。
要幾好運，先可以要你「剩食」7隻紅龜？

2.快就會贏，咁點先會快？

練，就會快。
你睇ONLINE D 影，好多時無乜特別嫁咋，係條線拎得內彎過你，加速食得多過你，同埋每次都完美做到咁解。
又講Mario Circuit（花花盃），一個圈有六個彎，三個圈有18個，每個快過你零點幾秒，夾埋就十秒以上。
所以？練啦師兄。

3.我練極都唔係好快，點算？

係咪因為你練得唔夠多呀？試過去玩200cc嘅Time Trial Ghost未？
我開頭一路玩，一路扮任達華係度叫：「點解我連車尾燈都見唔到？」
到我係同一條 Mario Circuit打足兩日（每日三小時以上），我終於快過佢。
打機白痴如我，只要你肯練，一定會變快。
你睇幅圖，我練咁耐先1分23秒1幾，世界最快果個再快我9秒，你就知空間仲有好多。

4.你痴線嫁咩，我打機輕鬆下嫁咋，一日練幾個鐘仲要同一條賽道？

咁係因為我係打機白痴啫，所以先要練咁耐。
如果你打機只係輕鬆下，咁你輸比認真練嘅人，都應份丫？係咪？

5.除左練，有無D速成嘅野可以教下？我睇人地狂出D片話咩十個小技巧好似好有用咁。

10個小技巧果D，其實你開Game，入面有幾頁叫Info嘅野有教，真係，我唔明點解有D人拎份說明書出黎拍幾條片又話攻略又盛。
即係咁，你拎黎拍片教新手無問題，但係你示範果時條線拎好D丫，轉個彎好似同內彎有仇咁係咁向外飄，做乜鳩呢？
Rocket Start個時間又唔啱，噴到好似屙尿咁又有乜謂？

6.咁你咪好快，幾時黎返場？

妖，都話我係打機白痴，真係快果班友，ONLINE上晒7、8000分啦。(我未上過咁高，其實係咪已經過萬？大佬，佢屈我玩100cc慢駛抗議呀，你放過我啦！）

7.我有問題，如果成班人都咁快，咪又變返道具戰囉？

係嫁，咁呢隻Game係咁嫁啦，差唔多快，打人先有意義家嘛。

(參考影片)