作為 Falcom 旗下兩大經典系列之一（另一系列為《軌跡》），《伊蘇 8》絕對無令舊 Fans 失望，要知道《伊蘇 7》已經係講緊 2009 年 PSP 年代嘅事啦，真係等到我條頸長到可以打結。

《伊8》PSV 版 喺 2016年已經推出咗，而上個月出嘅 PS4 版可以話係完全補完版：唔單止喺畫質同埋動作流暢度方面有所提升，仲補完咗部份劇情（PSV 版去到遊戲尾段劇情的確有少少衝太快）；除此之外仲添加咗新嘅地域可以探索！

如果你玩咗 PSV 版，我強烈建議你玩埋 PS4 版，反正同語言系統嘅 Save 係可以過繼的，未玩過嘅請直接墮 PS4 坑。

主角阿特魯今集繼續到處留情

《伊蘇》系列其實係主角阿特魯於各地歷險嘅記事，而今集故事發生嘅時間，大約係上一集嘅兩年前～不過放心，因為《伊》每集故事基本上都係獨立成章，有啲好早期嘅其實我都無玩過，所以唔駛擔心話跟唔到劇情。

今集個故事就講阿特魯同拍檔多其登上郵輪準備遠赴歐亞大陸，點知中途比巨型海怪攻擊，主角因此被沖上荒島塞連島。主角喺島上開始探索，一路上慢慢搵返其他同遭海難嘅生還者，然後生還者們就喺島上面建立漂流村，同時合力諗辦法離開荒島。

老老實實，海難、荒島、要搵齊失縱人口呢個設定，其實一開頭令我不禁諗起《幻想水滸傳 3》，不過當然係完全唔同嘅玩法同故事啦！

大家去到後期就會發現塞連島唔係荒島咁簡單：古代文明嘅建築、唔應該殘留喺現有時代嘅生物、以及主角黎到島上面之後，就一直夢見到嘅少女……到底呢個島上面埋藏住咩故事同秘密呢？個結局就好正路嘅，絕對唔係時空錯亂，不過建議眼淺嘅玩家拎定紙巾。

以為係荒島求生 Play，點知劇情重點係考古失落文明

我覺得呢個歷史無記載嘅失落文明古國，好似阿特蘭堤斯 😮

【地域探索】

探索，換句話講係地圖踏破 Play，呢一點絕對係遊戲嘅重心！因為你要搵齊所有生還者，又要搵素材去強化漂流村以及鍊成武器；開放咗嘅地圖會清晰顯示該地域啲資源拎哂未，而你去過嘅地方都會出現水晶石，可以作為轉送點以及幫角色全回復。

細地圖：地形有階段差、甚至樓層高低分別；素材及寶箱位置會清楚標記

大地圖：主線支線位置一覽無遺

有啲地方需要指定人數先開通到，所以一定要乖豬救哂啲人

遊戲入面有唔同嘅特別地形，初期未必全部通過到，要到後期慢慢收集到唔同嘅冒險具，先可以 100％稱霸全地域。呢一點對於有強逼症嘅玩家如我黎講，可能幾折磨架！因為你唔知幾時先開到條路，見到個 Map 仲差 10％ 先 Clear 嗰吓真係扁嘴，所以會好心急咁繼續衝關……

想二段跳？等到遊戲中盤啦你 🙁

初期好快可以爬樹藤 😮

每次開到啲 X 位搵到新生還者，都有一種微妙嘅解放感 LOL

PS4 版新增嘅夜間探索，地圖地形不變，但係可以收集到嘅素材、出現嘅魔物都會同日間嘅唔同！不過我份人就好唔聽話（？），佢明明話最好唔好整醒啲瞓緊覺嘅怪獸，因為佢地比人嘈醒就好難打；但係我呢啲衝地圖最緊要玩嘅人，梗係照直行直過啦……咁其實又無佢講到咁難打，只不過係群體密集圍毆 Play，食個加 EXP 料理去夜間探索都係升 Lv 嘅方法之一！

黑到……記得戴夜光石先探索 😮

至於地圖開通方面，有一點我覺得好正嘅係：遊戲好善用時空穿梭呢個設定！古代巫女丹娜同阿特魯嘅世界係共通的，所以有部份地形（例如係上鎖的門）要喺丹娜嘅時代完成支線任務先能夠開通比主角群通過。

丹娜在古代修理好水道的話……

黎到現代，原本嘅掘頭路會突然開通成新地圖 😮

遇到有水嘅地方仲可以釣魚……對唔住張圖 Cap 得衰LOL

我釣到儲齊咗個魚類圖鑑（遠目）

遊戲入面可以收集嘅嘢仲有料理，料理補HP其實其次，反而係啲 ATK 增強 或者 SP 自動回復呢啲加乘效能喺戰鬥入面幾有用。食譜有啲跟劇情出，其餘就開寶箱或者做支線。

傲嬌大小姐為你下廚之後，都可以拎到食譜（心）

【戰鬥系統】

《伊》探用即時戰鬥系統，魔物只要過 Map 就會重生，所以探索過程其實同時係斬怪 Play；大部份魔物都有弱點，只要鎖定攻擊對象，就可以見到邊種屬性可以剋制佢！以相剋屬性黎攻擊，可以令敵人「Break」從而增加傷害值。

三種屬性可以理解為斬、破、刺

每個角色都有固有戰技，初始戰技同埋 Lv. Max 嘅戰技攻擊力真係有明確分別架！技能隨住角色斬殺幾多怪而開放，部份則黎自道具，所以要收齊同埋練爆六位角色嘅所有技能都係玩家嘅挑戰之一。

我 PSV 都兩周目，技能 Max 很合理 😮

蜂巢可以無限出蜜蜂，刷技能一流

戰鬥操作都好易上手：正方形＝切換操控角色；R1＋Command 制＝你選定嘅技能。不過使用戰技會消耗 SP（圖中右下藍色圓形外框），KO 敵人、或者進行閃避、都可以取得 SP。

攻擊同時會累積圓圈入面黃色嘅 Extra Skill Bar（即係超必），Bar 滿後同時按 L1＋R1 就出到超必。

敵人攻擊同時反擊＝敏捷防禦；呢個時候出超必傷害會加倍

劇透圖（喂）遊戲入面啲 Boss 攻擊方法都算多變～

至於角色裝備可以喺村買，珍貴嘅就要開寶箱同埋做任務，頭先提過嘅「開通地圖」都係任務之一黎架，地圖踏破率越高，就可以換到越珍貴嘅禮物。

有啲勁裝備會保你平安到 2046

【漂流村】

一日未走到，一日都要生活，所以村民們會自發地建設村落，自給自足咁，叫做有飯食有地方瞓。

作為一個 RPG 遊戲，呢班村民當然各自都身懷絕技，有醫生、冶煉師、商人、裁縫、軍人等等；不過當中都有啲喺度唔知做咩嘅人，例如完全唔幫手、淨係祈禱等神打求嘅修女……

明明係主角打餐死先保護到條村，多謝埋主角吖嘛 🙁

流落荒島都遇到冶煉師簡直係 SSR 嘅待遇

解決咗衣食住行，下一步就係保家衛國，話哂都係野外求生，啲野獸魔物有時會搵上門覓食架，所以強化條村都好緊要！村民合力Play 分為守衛戰以及 PS4 新增嘅鎮壓戰。

武器、防具、連條村都要強化！刷素材都有排刷

守衛戰一次比一次難，同埋有時限！接到通知就要返去救村

你無睇錯，係恐龍！遊戲入面叫古代種！Mon Hunt 都玩埋，死未！

完成守衛戰會按得分取得獎勵；老老實實，要拎 S 都難架……

鎮壓戰就比守衛戰再難啲，要點火堆弱化敵人，如果唔係佢地會不斷再生，不過平時肯衝吓 Level 應該都應付到；無諗過PS4 版居然新增咁多場新玩法嘅戰役，我真心覺得幾驚喜。

鎮壓戰第一步當然係消滅生成敵人嘅無限巢穴

其實淨係條漂流村都好多嘢玩吖！玩家仲要幫村民解決問題（支線任務）、與此同時，又要同佢地傾計、送吓禮物仔咁增加好感度，務求成村人都成為你全心全靈嘅追隨者吖！

支線任務就真係無奇不有……例如無啦啦執咗隻恐龍蛋返黎

接下黎我想專注講吓另一個主角丹娜條故事線。

《伊8》玩嘅係雙主角線，去到中期就可以阿特魯同丹娜一齊用；不過前期次次阿特魯一瞓覺就夢見佢，然後千辛萬苦去解放佢被封印嘅肉身（好佛學LOL）呢一段情節嘅安排，真係浪漫到有啲唔 Make Sense……成千年前嘅古人點解無人覺得 Odd 嘅（喂）

我超鐘意呢個畫面

丹娜可以穿梭兩個時代，能力值不變，但兩邊擁有嘅裝備就唔同；作為王國巫女，丹娜嗰種天真又認真，叻豬又唔驕傲嘅性格真係好想令我摸下佢個頭！

而王國未衰落前嘅設計亦都好靚好有心思，好多嘢望落好原始，但用返古人角度去睇又真係好神奇；同埋成個國家居然係靠理力（你當係魔法啦）去維持，頭先我話佢個概念似阿特蘭堤斯斯，其實諗諗下仲幾天空之城。

PS4 對丹娜路線嘅改動比較多，的確，PSV 版入面佢條線可以玩嘅嘢好少，劇情亦有好多解唔通嘅嘢。PS4版入面，丹娜一個人會擁有哂三個屬性，攻擊方法同現代時一樣，但係具備嘅功能就有啲唔同；除咗固有屬性，新嘅兩種屬性如下：

地屬性：堅韌型屬性，打大型龍、穿越暴風有用

光屬性：速度型，仲可以見到隱形嘅事物

可能係聽到玩家感想話丹娜線無迷宮玩，PS4 版一整就整左五六個！點開迷宮就自己玩自己參詳（喂）

迷宮因為係全新嘅我就唔 Cap 圖出黎劇透啦，因為佢個設定其實同遊戲 Overall 嘅地形玩法好唔同，你地有無玩過《閃之軌跡》或者《東京幻都》？迷宮入面咪好多機關嘅？丹娜線迷宮就完全係佢地個設定。

咁好玩係好玩嘅，機關嘅設定一來係比玩家熟習兩種新屬性嘅戰鬥方法啦，不過因為成個遊戲零零舍舍得呢一部份係咁嘅模式嘅迷宮，剛剛入去嘅時候我覺得有少少 Odd，同埋心諗咗一句「喂將隔壁棚個 Game 個系統搬過黎就算啊你？」咁樣，對唔住。

陰公連啲 Boss 都好似閃軌入面啲怪

丹娜路線新角色伊娥，萌唔萌就見人見智啦，我自己唔好呢種健氣少女，雖然佢好鍾意玩尾行；不過佢嘅角色亦都幫手串聯咗丹娜線喺 PSV 版入面唔夠完整嘅劇情。

練 Lv 練得咁辛苦啲嘢有得引繼最開心！二周目嘅時候基本上會比你接收返哂你打爆機時嘅所有嘢（除咗冒險具同埋特別道具）；不過如果你二周目想玩 Nightmare 或者 Inferno（難到嘔血…）難度嘅話就無得引繼了，自虐Play。

同埋二周目打後，漂流村會多咗舊黑色晶石，可以打返哂所有嘅 Boss；除咗睇你戰鬥表現之外仲會計時，所以要拎 Rank S 都唔係易事黎，我打到一半無心機，不過想挑戰嘅朋友可以留意返。

綜觀黎講《伊8》我比嘅評價好高，可玩性超高，戰鬥又流暢，地圖設計有心思，人物性格突出，最重要係個劇本真係一流，雖然未至於話當年玩《空之軌跡》咁樣一行眼淚，但見到某啲情節都係會眼濕濕；要知道 Falcom 一向最出色嘅唔係要個 Game 超高畫質，而係劇本要夠原創同令玩家難忘，我覺得呢個遊戲絕對做到呢一點。

有興趣嘅朋友快啲去買，日文中文版同步上市，記得係 PS4 版先有齊以上所有元素喔～