寫呢篇包膠之前，我 Load 咗好耐個頭要點開。唔知，太多嘢可以鬧！雖然話一開始我都知呢個 Game 伏味濃，但《軒轅劍》系列陪伴我成長，所以，考慮到佢唔係日本或者老美出品、同埋係中台合資第一次出落 PS4 度嘅遊戲等等因素，我未開 Game 前已經將要求降到最低：唔 Lag 機、劇本吸引嘅話，我都可以說服自己比個正評佢；不過真相係殘酷嘅，如果《軒轅劍》甚至《仙劍》系列繼續以咁嘅質素去開發落 PS4 度嘅話，我惟有講一句祝君好運。

咁到底個遊戲有幾差？ 以下我逐 Part 講你知：（

《穹》係軒轅劍第一代嘅外傳，故事背景簡單黎講，就係遠古時，軒轅帝做錯嘢，搞到世界變得一片混沌，凡間群魔亂舞，死得人多。神域之主華胥想幫手想搞返掂壇嘢，點知進行儀式時，女主角沐月唔爭氣淆底，搞到個家姐被封印、家姐個男朋友共工嬲到飛起，自然憎死沐月；而沐月本人受到衝擊跌咗落凡間，比男主角阿宇拾到，仲接到命令要送人地返屋企咁話。

咁首先大家可能會問一句，男主角區區凡人，點送沐月返神域？做得男主角就當然有啲特別啦，沐月留意到自己同阿宇居然會產生力量嘅共鳴……咁到底沐月點返華胥，阿宇真正身份係咩，同埋，天界同凡間嘅混亂又處唔處理到呢？

我就唔劇透落去，有興趣嘅朋友不妨自己買黎玩參詳……如果你睇完我以下嘅感想仲有勇氣玩嘅話 (´・ω・`)

見返 DOMO 製作群嘅人名，只能嘆一句人生…

【動畫】

咁當然，華資公司出品動畫製作，我唔通要求佢好似 SE 社咁靚咩……但失望嘅係，有咗大陸資金投資之後，我原本期待個動畫會順返啲，但係個畫質同埋特效都散發住一陣淡淡嘅娘味。

【語音】

娘味仲黎自一樣嘢，就係全語音！先此聲明，我對台灣充滿好感，我亦都玩過好多大宇公司出品嘅遊戲，不過，佢呢個根本唔係國語，係普通話！簡單黎講，佢語音唔係《流星花園》道明寺鬧杉菜「A 你幹嘛啦」呢種腔調，而係大陸劇嗰種唔知點解全部要事後再配音之後字正腔圓得好梗耳嘅普通話！嚇到我一入到系統設定就即刻熄咗個語音，我自問我頂唔順，我覺得靜音 Play 舒服好多！

【場景】

《穹》其實 2015 年推出 Windows 版在先，Stream 都有得賣；不過出落 PS4 咁創新，梗係寫 PS4 Version 啦 ：0

即係咁講，如果你用電腦玩啦，而你個電腦唔係用 BENQ 高汁靚靚 Mon 而係有畫面就得嘅顯示屏嘅話呢，佢個場景就誇啦啦嘅；但如果你將同一樣嘅質素搬上 PS4 嘅話呢（淨係 PS4 咋，唔好講 PS4 Pro 吖），大家不如自己睇。

首先黎張目測靚嘅，望多兩眼，綠色護眼吖

黎料：對岸啲樹做咩事？插盤景？同埋個海岸線係咪做漏咗羽化？一塊藍色咁做乜？

對面個山頭……政府落咗防止山泥傾瀉啲網？：0

水墨畫風表達天外異境係系列嘅傳統，不過啲貼圖 Layer 似乎粗糙咗啲

【人物模組＋劇本】

呢兩部份係我超唔滿意嘅地方之一。人設吸唔吸引就見人見智，但係入到遊戲入面，個個角色做到個樣好似用咗美圖獸獸咁，假到我唔敢直視！

沐月戰鬥模式個 Pose 好鬼似 Overwatch 印度妹

至於劇本，啲國仇家恨算得係咩？男歡女愛先係王道……真係陰公。我明白官方可能想吸引女性玩家或者打入年輕市場，所以上至人設、中至對白、下至劇本，全部同大陸啲古裝偶像劇好似一個模倒出黎咁！到底是為了討好誰我就唔深究喇，或者鋪定路比人地拍劇啩？

我上網睇過兩岸朋友對呢個遊戲嘅評價，陸方就似乎好受落呢一套，台方就一味力撐國產 Game……但對於香港玩家黎講，我相信呢兩點都會由賣點變成倒米嘅地方。

美圖獸獸白粉樣，仲要夾硬營造 BL 味（呢條友係商王LOL）

【地域探索】

同樣以外傳黎比較啦，《穹》嘅地域探索唔再好似《天之痕》或《蒼之濤》咁暗啞底係 Semi Open World（即係劇情叫你去 A 市，但你屎忽痕嘅可以去 A 市隔離個山洞打怪練吓級先）。《穹》每個新地圖都係按劇情推進而出現。

呢個畫面…真係玩復古

至於地點上嘅地圖探索，《穹》同 3 月出果隻《Vikings: Wolves of Midgard》用一樣嘅模式……其實連畫面都好似，地圖隔住你嘅腳步而顯示，畫面右上角亦會話比你知有幾多寶箱要開；咁嘅設計，變相唔再係迷宮，加上就算地圖係唔係 100％ 探索都對劇情無影響，所以咁嘅設計係好定唔好，真係見人見智。

同維京人一樣地圖；亦同維京人一樣 Lag :0)

玩得 Zelda 多，見到呢堆石好想炸開佢 LOL

【戰鬥】

對於《穹》戰鬥系統嘅評價，我只會講一個字：屎。

首先講咗遭遇敵人先，而家好似無咩 RPG 會再用返隨機遇敵系統？敵人喺地圖上面彈吓，鐘意就行埋去打，或者唔覺意辣著佢佢會追住你咁；但係，你都用得即時遇敵系統啦，點解會無比敵人先攻擊而打亂戰陣、或者從後攻擊敵人取得戰鬥先機呢啲設定架？黑人問號x3圖呀！咁即時遇敵黎做乜？又要等你 Load 入戰鬥畫面，你都咪話唔躁。

地圖上打怪觸發戰鬥，零手感，打空氣一樣

真係開始戰鬥之後……我有衝動一秒 Quit Game，Lag 撚到呢 (ㆆᴗㆆ)

咁佢個戰鬥操作其實好簡單，好似《刀劍神域》咁，技能用完冷卻就用另一招；但係佢嘅技能冷卻系統唔係每個技能獨立計，而係所有技能炒埋一碟用同一個 Count Down！喂，咁你叫人點出連招啊？角色玩武術，但係招式淨係可以一下一下咁劈，真係有誠意得你。

招式分武術技同魔法兩種，戰鬥中按 R1 切換模式；不過，放心，戰鬥很 Lag，技能冷卻很慢 (ゝ∀･)⌒☆

所以你大把時間揀下 Round  要出咩攻擊；如果出魔法就會消耗真元（即係 MP）

黎到呢度我已經唔再講畫面質素啦，大家眼睛很雪亮～

遊戲升級唔難，難就難在你面對一個咁爛嘅戰鬥系統，到底有幾好耐性打怪練 Lv？

不過點都好啦，升級就會有技能點；技能點可以開發角色新招式。

呢個技能點版面真係好似 SAO 呢……

講角色走位之前，講咗《軒輾劍》系列嘅重點煉妖壺先。總之，每一代嘅主角都會唔知點解拎到神器煉妖壺，用法係喺戰鬥入面，將敵人 HP 扣剩少少，就可以將對方收服入壺界；收服咗嘅怪物，可以進行合體鍊成、或者作為戰鬥中嘅護駕都得！

《穹》入面按 R3 就可以收妖，之但係……佢個收妖模式，我覺得係咁多代入面做得最差嘅。畫面人少都還好，人多嘅話，老老實實你唔會知道幾時成功架，要下下望實右上角敵人頭像底下會唔會出收妖失敗四隻字架！之但係個戰鬥又要玩即時反應喎，咁人多又 Lag 喎，隻豬出黎收妖時噴煙嘅動畫又核突喎，而且一時出動畫一時又無喎……LOL

媽呀我好亂。

收妖鬼影圖：連啲選單嘅字型我都覺得揀得好差 orz

今集將神器壺界就咁選單化，勁無 Heart

用男主角一條友打已經 Lag，咁人多點算？咪 Lag 到痴筋，同埋畫面亂到飛起；我唔知佢點 Set 角色啲走位，但係一開始攻擊就全部人衝埋去同一隻怪度，啲怪又同一時間衝埋黎……所以，你會經常見到啲角色互相卡住對方，喺原地窒窒吓咁唔知 jomud9。

想出連招惟一方法：不斷轉換角色，用角色黎招駁招

不過後果係：Lag 到唔知自己打緊咩

好，如果你睇完我鬧完成個戰鬥系統都仲有心機睇落去嘅，接下黎講埋遊戲入面啲細微嘢。

寶箱有時要解鎖，謎題本身唔難，不過有五次機會，亂撳都會中

地圖入面嘅 Pizza 盒可以全回復

【總結】

基本嘅重點就係以上，老老實實，整體黎講，我真係睇唔透點解大陸或者台灣嘅玩家可以比佢咁高評價！OK，技術層面黎講，我唔同你講畫面質素，我淨係講系統同劇本；當年《蒼之濤》第一次搞 3D 夠核突啦，但我玩得好高興架，RPG 重點係系統同故事。

但係，系統上面我見到太多模仿其他遊戲嘅影子，但又做得唔夠足；至於劇本，到底係我擁抱住過去嘅回憶唔放，定係我追唔上而家華語 RPG 嘅走勢？婆婆媽媽嘅劇情，每字每句都好似鋪緊路去拍大陸偶像劇咁！我嘅認知入面，《軒轅劍》本身比較著重大事中非大情大義，《仙劍》就喺人情世故心理描寫上面著墨多啲；但係《穹》我真係睇唔出個系列分別喺邊度。

你問我失唔失望？睇到呢度，你覺得呢？梗係無啦，一開始我都無期望架喇，係無諗過連劇本都咁難頂……或者，真係唔啱我口味啦。