大家都知道不嬲 PS4 除咗 Hori 之外都無乜手制選擇，咁係上年年尾果陣 Sony 就公布咗2款官方授權既高階手制，分別係 Nacon Revolution同 Razer Raiju，今次我地就拎到其中一款黎試下手感如何，亦即係下面所介紹專為電競而設既 Razer Raiju。

先黎開箱

盒面有寫面Designed for Esports

打開 之後就有張感謝卡同埋見到個硬盒

個盒做功唔錯

打開個保護盒之後就見到跟咗支螺絲批比你，說明書同條USB線就係箱底

好啦，開咗出黎梗係即刻渣上手試下感覺如何先，第一個感覺係幾鐘意佢個重量，佢重過原裝手制少少，個人黎講覺得幾適中。至於渣落去到 OK舒服既，不過每個人手型大細唔同不能一概而論。
至於2粒冬菇就跟返原裝制排位，呢點我就幾失望，事關 Xbox 制冬菇位移咗上去之後隻左手手指公唔洗長期屈住係舒服好多的 (不過冬菇做咗防滑處理我加返佢分)。

2粒冬菇阻力比原裝手制細，感覺鬆咗少少，但係極度靈敏

先講右邊四粒制 (官方名 Hyperesponse 機械式動作鍵)，外型圓碌碌好可愛，一撳落去就發現鍵程超短 (即係粒制撳落去既距離)，但係回彈做得好快，應該係想透過咁既設計加快反應時間。至於十字制……一撳落去就想講咩料，硬到爆炸，用慣原裝制既朋友可以需要一段時間黎適應啦。

超短鍵程既四粒制，撳落去會有「的的」聲

硬到爆炸既十字制

到上面既 L1R1 / L2R2制，表面做咗鏡面處理，幾靚仔，而且手感良好！最特別既係 L2同R2 係可以透過果2粒調節鍵黎設定鍵程長短，呢點對玩 FPS Game 非常有幫助 (大佬set做短鍵程差唔多短一半距離)。

呢2個啪制就係用黎設定 L2R2鍵程

Set做短鍵程 (已經撳到落底)

Set做長鍵程 (已經撳到落底)

到最後就係呢隻制既賣點：4粒自定義按鍵

係正L2R2隔離既 M1M2 自定義按鍵，我就 Set咗做 L3R3，係玩 Overwatch 果陣開拳頭打人感覺順手啲。後面果2粒 M3M4我就分別 Set做大絕同跳，咁就可以 Keep 住轉視點黎跳同放大絕，幾實用。

M1M2擺係呢個位可以用同一隻手指撳埋L2/R2

M3M4呢2粒制唔鐘意既話可以用跟制把螺絲批拆咗佢

本身我係 Set M4做跳，但係發現唔係幾就手，最後就換咗落M2度……

然後到呢 Part 就係參考咗 Xbox One 手制個外插週邊既 Panel，呢四粒制分別係編輯、模式切換、靜音、音量調節。

編輯、靜音、音量調節呢三粒制應該唔洗講啦…..淨低既模式切換鍵係要黎揀鍵組 (Raiju 可以定義2 Set 自定義鍵組)，撳咗切換鍵就會著燈，方便顯示你用緊 Mode A定 Mode B，長撳就變返做 Default，老實講係方便既。

總結
因為本身就對原裝制好不滿，所以我一直都係用 Hori 果隻手制。試用 Raiju 之後真係好唔習慣，包括按鍵既手感，自定啲制之後既排位，超靈敏既冬菇等等，但係開始適應少少之後就 Feel 到隻制做到既野係幾爽，例如用 Lucio 可以玩跣上高位咁。基本上高階手制黎講 Raiju 的確係唔錯的，之不過要花長時間習慣，但都值得既！唯一要挑剔既就係……喂有線既，搞錯丫……