《戰國無雙》上次推出新作品已經係 2014 年嘅《戦国無双 Chronicle 3》，當時仲要係 PSV 同 3DS 限定，加上有一期嘅無雙系列真係出得太密……所以相比《戰國無雙 2》年代嘅超人氣，而家講起無雙，大家都可能會抱住一個心態係「哦鳩劈吖嘛」咁樣，未必有咁大嘅興趣。

我擁有嘅第一部家用遊戲機係 PS2（當時中學雞唔食飯儲錢買），而當時令我沉迷玩嘅遊戲就係《戰國無雙》，我仲癲到出埋同人本……可能因此有少少情意結啦，所以就算我本身對真田家無愛，都係忍唔住開咗《真田丸》黎玩！

圓碌碌正太Ver. 幸村與信之

日本前排吹起一陣戰國真田風，先有堺雅人主演電視劇《真田丸》，後有 KOEI 推出遊戲《真田丸》。遊戲方面，當然以真田家為劇本中心，真田本來並唔係大名，佢地一開始只係效忠武田家嘅軍將；《真田丸》嘅故事，就係藉住真田家嘅興衰，去交代成個戰國嘅歷史同埋勢力演變。

究竟一代武神武田係如何滅亡？本為兄弟嘅幸村同信之，又點解會喺戰國後期分別效忠豐臣以及德川？唔係話以前嘅《戰國無雙》無提及歷史，但係《真田丸》對角色心理描寫著墨更多，如果以前玩無雙係為咗一騎當千嘅爽快感，今次《真田丸》似乎就多咗份人情味同埋劇力。

真田昌幸：型棍兼好用過兩個仔多多聲

如果當時一嘢殺死德川家康，歷史又會點改寫呢？

遊戲系統方面同以往嘅無雙有少少唔同，真田隨住故事推進，會有唔同嘅領地。

以初始嘅本陣真田鄉為例：

種田、拜地藏、釣魚、城郊探索：獲取素材

軍營：可用戰功升武將 Lv、加強或解鎖武技連招格數

雜貨：進行買賣換錢、調藥

冶鍊：進行武器升級、技能加乘

左至右：種田、釣魚、拜地藏、軍營；不過去到後期呢堆嘢其實都無咩用 orz

加好感度：就算我鍾意 BL 都接受唔到以上嘅對話…orz

城外探索：可以獲得稀有素材

《真田丸》雖然都係無雙玩法，但係落到戰場，要拎到全部 S 級零武將傷亡咁過關，都有啲難度嘅！一來 NPC 有幾聰明仔你知架喇？所以啲咩「阻止忍者接近德川家康」之類嘅任務，NO，應該話：成場仗都係得你一個打緊架之嘛 LOL！二來今次戰場上任務嘅時間 Control 都幾趕吓，成日出現啲咩「幾分鐘內勝利」「無傷亡情況下勝利」之類嘅條件……

咁大家睇咗幾幅圖，可能都留意到圖左下角有六粒銅錢；呢六個銅錢可以話係你手頭上擁有嘅……技能點？呢啲技能點可以喺戰場上觸發戰術，例如係出一班人去保護某武將咁。你話啲戰術係咪好有用就見人見智啦，不過會有突發軍令出現件事嘅臨場感係高咗嘅！

下一手：即係該場戰爭可以使用嘅戰術

戰爭當中達成任務，先可以解鎖下場戰役嘅戰術

至於戰爭本身方面就唔駛我多講，無雙打法！戰鬥流暢度、同埋唔同武將嘅華麗戰技，始終都係無雙系列嘅一大賣點！雖然遊戲叫《真田丸》，但係可以操控嘅角色當然唔會只有真田家三父子啦～如果真田家出征嘅同時，喺其他地方都有出現戰爭嘅話，玩家可以順手玩埋其他勢力嘅戰役架。

副戰場：真田以外嘅戰役

毛利元就軍嘅小早川隆景

另外今集亦多咗兩個新角色：茶茶同埋佐助。茶茶係戰國最閃情侶淺井長政同阿市嘅女，父母戰死之後寄居豐臣家。作為女主角佢嘅戲份相當多，仲要係無口傲嬌型設定，睇住佢由幼齒變蘿莉，蘿莉變少女，見過真田幸村一面之後就念念不忘，仲發展出一段情緣添（雖然喺歷史上佢係秀吉側室orz）

茶茶嘅武器為髮簪。

幸村留鬚後顏值更低……

另一武將佐助為忍者，係服部半藏養子兼徒弟，原本安插喺幸村身邊做線眼，但後來似乎改變心意。攻擊特點為速度型，可使用分身多重斬擊。

除咗故事劇本武將，其他戰國入面出現嘅角色，都可以喺真田鄉以法螺換取使用；法螺可以在城郊探索或出征獲取。

按 KOEI 呢個出戰國無雙嘅手法，唔知下次會出邊個勢力呢？織田丸？定直接出森蘭丸算 LOL？（咁明明信長六重天魔王先係戰國無雙嘅最大 Gimmick 黎架嘛！）不過《真田丸》比我整體感覺都不過不失，算係咁啦，特別係喺近期 PS4 無咩大作推出嘅情況之下，得閒打兩舖都仲係過癮嘅！

最後為大家送上遊戲嘅官方 PV：