近日回到老任懷抱，想分享一啲業餘使用體驗。

買switch都係例牌一機兩game，1-2-Switch同炸彈人，炸彈人唔講，1-2係有少少當初wii嘅感覺，除左成日叫人望呢項唔慣，暫時可以一戰。

不過呢篇文想講下《信長之野望》。

小弟都係由信長1玩起嗰一代。人生五十年如夢似幻，一度玩信長，豈有不玩乎？不過平時家用機平台真係唔玩，可能係多年來慣用Mouse使然吧，試過幾次喺家用機平台玩(都試過駁mouse)，個feel總係差啲。回想對上一次喺家用機真正玩爆幾次嘅同類遊戲，已經係3DO嘅《三國志4》啦，唔知有無前輩都玩過？

但係，今時今日信長個版圖設定講求即時(應該係《天下創世》之後開始？)，已非當年戰略遊戲嘅類型，所以要用手製玩的話，小弟真係投降。

雖然，用唔用手製係個人喜好，但Switch版，真係幾沉船，第一日已經差唔多通頂！兩三日已經做咗天下人。

Switch信長，我覺得至少有以下好玩地方

1.可以用手指拉版圖、掃地圖，呢點已經好過PSVita，睇版圖同轉換城池好方便，尤其係以整備道路為主嘅近代《信長之野望》

2.Switch個Mon夠大，比起同樣可以Touch嘅Smartphone平台優勝，唔使拎部notebook出Starbucks玩信長。

3. 如果iPad有信長，都一定唔夠Switch好，因為呢個時候switch又有返個手製，用ZL開到情報畫面。

4.今次《信長之野望》啲震動（姬誕生會震嗰啲）位幾爽皮。

5.DLC有仙石權兵衛、土方歲三、安倍晴明等等，另外特典仲有孔雀、石川五右衛門等人。

過去唔少人集中講switch出街對戰嘅好處，卻鮮有提到出街單機。試諗諗，如果他日用Switch喺街玩《火炎之紋章》或其他戰略game，一個人靜靜地坐喺老麥咬住支筒玩，其實幾正。

坐喺麥記打信長，排長龍買杯奶昔，都好似桶狹間，就連隔離阿伯都有少少武田信玄嘅影子，一諗起，真乃人生一大樂事！

PS：小弟覺得《信長之野望》最好玩係打爆信長。今次都係用足利家，以維護幕府榮光為己任。不過今次爆機有少少唔同，就係成功收服信長阿爸，後來又將公主嫁畀信長（仲有真田幸隆等等），令信長成為天人的尖兵。