《刀劍亂舞-ONLINE》
刀劍亂舞呢個作品係由Nitro+同DMM Game開發嘅網頁遊戲。《刀劍亂舞-ONLINE》於2015年開放，係卡片對戰遊戲，玩家被稱為「審神者」，需要收集日本古代刀劍擬人化嘅角色卡片，組成隊伍出陣開發地圖以開啟關卡同故事。
以前一直都有好多用日本戰國時代作為背景嘅遊戲，例如動作遊戲《戰國無雙》、《戰國BASARA》；到乙女遊戲好似《下天之華》咁。但以日本武將們嘅配刀作為背景真係少見。而刀劍亂舞作為卡片遊戲，角色外型設計非常細緻完善，唔同角色分別由多名日本繪師/漫畫家例如沙汰、鈴木次郎、三輪士郎等人設計。刀劍亂舞角色嘅服裝到刀具設定都參詳過歷史背景，人物外貌都非常美型，吸引大量女性玩家。

《刀劍亂舞》音樂劇
《刀劍亂舞-ONLINE》遊戲爆紅，《刀劍亂舞》音樂劇於2016年5月開始正式公演，至今已經進行到第三部，而最新一部「刀劍亂舞 ～三百年的搖籃曲～」係由上個月初開始公演，將於4月23日進行尾場公演。
《刀劍亂舞》此部作品非常有製作成舞台的潛力，例如角色造型獨特精緻、能加插舞台動作打鬥演出、美型男性角色吸引眼球、故事背景能參照歷史來豐富劇本並引起共鳴。

音樂劇故事主線鮮明
《刀劍亂舞》音樂劇特色除咗將刀劍男士帶到三次元，仲在於可以表現出比遊戲更豐富嘅故事劇本，將遊戲入面無辦法完全展示嘅背後故事同情感喺音樂劇延伸，並將每位登場角色內心細膩嘅想法喺歌曲同對白中表露無遺。每部劇嘅登場刀劍都背負住唔同嘅經歷同故事。其實《刀劍亂舞》音樂劇每一部都好感人，而感人位都在於刀劍與前逝去前主之間嘅感情同刀劍自身嘅心結。真係每一次係戲院睇Live Viewing都會默默流眼淚。
[第一部]「阿津賀志山異聞」
登場刀劍男士：加州清光、三日月宗近、小狐丸、石切丸、岩融、今劍
登場歷史人物：源義經、源賴朝、武藏坊弁慶
故事的主軸以阿津賀志山歷史異變為主。按照原歷史，源義經被義兄源賴朝陷害，同部下武藏坊弁慶孤軍苦戰。最後二人無法對抗叛軍，源義經手持短劍自刎身亡。而當時義經所持嘅短劍就係今劍。多年後受妖刀影響，義經同弁慶死而復生。但因受妖刀控制，佢地身心不受控制，所以加州清光帶領住三条組刀劍一齊前往阿津賀志山，與今劍前主相遇，解決呢場異變。

[第二部]「幕末天狼傳」
登場刀劍男士：加州清光、大和守安定、和全守兼定、堀川國廣、蜂須賀虎徹、長曾彌虎徹
登場歷史人物：沖田總司、土方歲三、近藤勇
故事嘅主軸以刀劍男士心入面嘅遺憾為主。例如大和守安定當年無法守護前主嘅遺憾，蜂須賀虎徹在刀劍時代只係裝飾刀而不具備出戰實戰刀嘅遺憾，仲有長曾彌虎徹嘅苦楚等等。各刀劍男士透過呢次出征戰鬥化解執念同心魔。

[第三部] 「三百年的搖籃曲」
登場刀劍男士：石切丸、にっかり青江、千子村正、蜻蛉切、物吉貞宗及大倶利伽羅
登場歷史人物：德川家康、松平信康、竹千代
今次最新一部刀男音樂劇終於做到大家都熟識嘅日本戰國時代。故事以德川家康為中心，再現劇中角色為奪回德川家族歷史嘅故事。從登場人物列表估計，今次舞台大概會講述松平信康德川幕府的大政奉還嘅故事。不過由於未到香港Live Viewing，故事究竟詳細係點有待到時觀劇完畢後再同大家熱烈討論！

真劍亂舞祭
《刀劍亂舞》音樂劇有大量原創歌曲。除左每一部劇目嘅代表歌，每個角色都有角色solo歌曲同合唱曲。
而我想講嘅重點嚟啦－ 其實《刀劍亂舞》音樂劇都會有好多idol風嘅歌曲表演。官方超識做地為咗迷妹而舉行「真劍亂舞祭」，比刀劍男士跳出故事框架做下idol發揮魅力。喺真劍亂舞祭，刀男各演員會換上對應角色公式服concept嘅打歌服，著住緊身褲長褸、軍服黑靴、背心馬甲等等一反公式服嘅密實，露手臂露腰露背露肩露鎖骨，著住充滿現代感嘅演出服大跳hip hop同電音idol歌。

觀劇
雖然音樂劇live係喺日本進行，但海外嘅大家可以喺DMM網站收睇付費轉播。除此以外，由於《刀劍亂舞》真係非常受歡迎，香港都會有戲院同步直播千秋樂演出。提多大家一次，4月23號係《刀劍亂舞》音樂劇第三部－「三百年的搖籃曲」嘅千秋樂，有香港嘅戲院會進行live viewing，有興趣嘅大家可以趁呢個機會一齊入坑啊！