等咗好耐既真人版《攻殼機動隊》正式上映，睇完就梗係想講下自己既感受啦，至於果啲士郎正宗原著，押井守導演果類 Google 到既野就唔講啦，你地都唔會想睇架啦！所以今次集中講下套戲到底同動畫差幾多呢，戲入面既香港又係點等等，當中仲會有少少劇透，唔想睇既就上一頁啦。

下文含部份劇透內容

故事劇本係 Base on係 1995年果套攻殼劇場版，咁當然作出咗唔少改動，最大既改動莫過於由原作大篇幅描寫「網絡」、探討「Ghost (靈魂)」定義 (漫畫版係 1989年開始連載！)。而今次既電影版就側重描寫主角「草薙素子」尋回自我，當然亦都有涉及講 Ghost (靈魂) 呢樣野，不過「網絡」部份反而著墨甚少。當然而家有大量「網絡」、「虛擬世界」等等類似既題材作品，而且以系列第一彈黎講，咁樣既舖排無可口非，之但係個人黎講就覺得比較可惜。(話晒 Matrix 都係受到攻殼既啟發)

講返故事本身……老實講幾老土，而且節奏都算慢。但係今次真人化攻殼絕對有比 95年動畫優勝既地方，就係世界塑造。電影入面既 Cyberpunk 世界取景係我地身處既城市 – 香港。成套電影採用大量既 CG 重建我地所熟悉既地方，充斥住大量有霓虹燈味道既立體投影廣告，表現出好繁華既景象；另一邊則刻意製造樓宇間極擠迫既視覺、八十年代九龍城飛機低飛既畫面，同時亦都保留咗大量烏煙瘴氣既橫街窄巷，繁華同貧窮交集，處處滲透出一種詭異既感覺，呢一種視覺衝擊已經好耐無係大銀幕上見過，同當年動畫版相比反差感覺更強 (嗱你如果拎黎同 Blade Runner 比咁無野好講……)。當然仲有好多好特別既位好值得講，不過廢事劇透太多，自己入場留意下啦，身為香港人睇係特別有感覺的。

1995 年動畫版既世界

香港八十年代既標誌 – 九龍城飛機低飛既畫面

真人電影版所呈現既世界

咁 CG 黎講點解好似好多人鬧話做得屎呢？套戲啲景的而且確係做得靚既，但係人物動作 CG 就出出地事，係宣傳果頭5分鐘已經見到動作唔算流暢，戲尾一戰就更加明顯，扣分位。另外宣傳重點之一既藝妓動作亦都有少少怪怪地，不過水戰一幕既出色表現其實已經加返唔少分 (順帶一提水戰一幕係完美重現)。

呢幕認真完美重現

演員演出黎講……北野武係做得最好果個，比起原版既荒卷課長佢實在型太多了。至於其他演員，因為故事太側重主角素子，變咗原作既 Team Work 係無晒 (完全無雙 Mode)，本身既公安九課變到好似得返荒卷課長同素子咁，其他人變晒做花瓶。至於阿九就話傀儡師久世演出有驚喜，夠晒機械人咁話啵！

總括黎講，攻殼 Fans 相信收貨有突，非 Fans 亦都值得入場一看，除咗因為係香港拍之外，真人化而又有正皮既荷李活電影無乜幾多套，除非你話你好欣賞真人版龍珠啦。

回帶相關文章：

《攻殼機動隊》超正電影 Art Book 大Show戲中機械人設定！