咩係2.5次元舞台劇？

講起2.5次元，好似好抽象咁— 3次元係真人，咁2次元就係平面作品例如動漫遊戲入面嘅人物。2.5次呢，就即係真人扮演2次元角色，令人物呈現係3次元世界。大家熟識嘅Cosplay就係2.5次元啦。不過，呢篇文唔係想cosplay，係想講係宅圈入面越黎越蓬勃嘅2.5次元舞台劇。

要真人扮演ACG角色重現作品，其實好耐以前都有㗎，有一排大家都好鍾意談論美少女戰士真人版劇集㗎。不過時代係會進步嘅，宜家好多日本公司製作2.5次元舞台劇，重現唔同熱門ACG作品。近年比較著名嘅例如有刀劍亂舞、彈丸論破、黑子的籃球、生化危機、APH等等都有舞台劇製作。有製作2.5次元舞台嘅公司例如有Nelke Planning、CORNFLAKES、Ace Crew Entertainment等等。

點解會咁hit?

2.5次元舞台劇裡面，演員要盡1000%努力去還原角色。Casting已經嚴格篩選演員外貌、演技、舞蹈、唱歌能力、聲線同感覺。到演出，演員係會戴假髮或者將頭髮造型，著全套同角色一樣嘅服飾黎表演。而除咗外表神似，某啲作品需要演員參與特別訓練，例如網球王子會比演員參加網球特訓，刀劍亂舞嘅演員就要學日本劍術等等。可見2.5次元舞台嘅製作非常專業，全方位務求做到最好。

刀劍亂舞音樂劇《刀劍亂舞》『刀剣男士team三条with加州清光』海報

網球王子Dream Live 2016 海報

火影忍者舞台劇第一彈定裝照

舞蹈能力方面，唔少人係有舞蹈底子，精通芭蕾舞、jazz、hip hop、breaking，甚至係體操等。而且，另一重要因素係，演員外貌好多都好出眾，好多演員本來都係日本時裝雜誌嘅讀者模特兒或者JUNON BOY (由日本知名雜誌「JUNON」編集部所主辦的美男子選拔賽) 出身，顏值當然非常吸引，本身亦有fans base，所以follow演員Twitter不時睇下相都可以好滿足心靈。
例如飾演網球王子3代青學部長手塚國光嘅財木琢磨就喺第25回JUNON SUPER BOY獲最佳上相獎

2.5次元舞台好離地？比啲貼身例子你！

講咗一大輪，係咪仲係覺得2.5次元舞台好陌生？演員係2.5次元舞台出道，自身條件都好好，所以都唔少演員以前或者日後都有接其他作品演出，甚至會演出戰隊片，日劇電影等。所以其實好多演員你地應該熟悉㗎。
例如
飾演彈丸論破江之島盾子嘅演員神田沙也加，就係日文版冰雪奇緣安娜嘅配音員

飾演網球王子舞台劇2代冰帝部長跡部景吾嘅演員久保田悠来，亦就係飾演假面騎士鎧武嘅吳島貴虎(假面騎士斬月)

飾演彈丸論破3苗木誠嘅演員本鄉奏多就曾經飾演電影版進擊的巨人嘅阿爾敏；同GANTZ嘅西丈一郎

欣賞價值2.5次元舞台劇

2.5次元舞台劇表演好有欣賞價值，除咗演員裝扮十分神似外，演出亦非常專業。演技、舞蹈、道具、動作、走位、燈光同舞台劇原創歌曲嘅配合，2.5次元舞台確實係專業認證嘅製作。
加上每次新劇推出都好令人期待，例如剛剛發佈演員列嘅表進擊的巨人舞台劇，令人期待究竟如何呈現巨人同立體機動裝置。而往往都能利用舞台燈光道具等做出出乎意料嘅效果。

2.5次元舞台劇其實係香港宅圈都漸漸地hit起，兩年前網球王子3rd 青学VS不動峰都曾經係香港理工大學賽馬會綜藝館演出過，而近年某啲戲院都有2.5次元舞台劇嘅live viewing（直播）場次。大家如果遇到有鐘意嘅作品舞台劇化而香港又有演出或直播，不妨嘗試睇下，效果可能令人驚喜㗎。