《歌王》（うたの☆プリンスさまっ♪）第一代遊戲重製應該係唔少女性向玩家嘅福音！《歌王》喺乙女同腐女界嘅人氣相信唔需要我多講，眨吓眼原版遊戲推出已經係 2010 年嘅事，當時推出平台係 PSP；不過將作品人氣推到高鋒絕對係 2011 年9月開始動畫化之後，不知不覺動畫都出到第四期啦，唔知大家咁多年黎比《歌王》官方騙左幾多金？不過，動畫始終難以覆蓋咁多個男角色嘅路線，所以我一向主張「動畫照睇，但遊戲先係主打」嘅宗旨，咁樣無論你鐘意嘅角色或者配對係邊個，先可以得到120%嘅大滿足嘛！

循例都要介紹返遊戲嘅資料（笑）重製版嘅可攻略路線包含「ST☆RISH」七位男角色：一十木音也（CV. 寺島拓篤）、一ノ瀬トキヤ（CV. 宮野真守）、聖川真斗（CV. 鈴村健一）、神宮寺レン（CV. 諏訪部順一）、四ノ宮那月（CV. 谷山紀章）、来栖翔（CV. 下野紘）以及愛島セシル（CV. 鳥海浩輔）；人設及插畫則係由倉花千夏老師負責（無錯！就係《咎狗の血》嗰一位！）。

如果你想攻略「QUARTET NIGHT」以及「HE★VENS」兩個前輩組合嘅角色就要再等吓啦，睇官方個勢，將咁多代遊戲全部移植 PSV一定係呢一兩年內嘅事（我都好想快啲可以攻略「HE★VENS」！有綠川光！）

如果你淨係睇動畫，無玩過遊戲嘅，我當然係強烈建議你落坑啦，因為動畫感情線以トキヤ為主線，但係好多 sweet sweet 位唯有 Game 先會玩到；如果本身已經玩過舊版，咁呢個重製我都覺得有收藏嘅價值：（1）新增 49 個故事支線及（2）新增 21 張新繪 CG。

舊版CG：

新版 CG（你問我我梗係覺得新舊 CG 都靚架啦！）：

其他新增要素包括：

（1）站立繪終於用左面部表情識郁嘅 Engine（而家十個有九個 Game 都用緊），美中不足係重製版仲係用緊舊圖，所以原本崩嘅地方都係繼續崩……

（2）CG 加入「Touch」機能（按圖中唔同位置會出現唔同對白，雖然呢一點都係舊野，Otomate 幾年前重製嘅 AMESNIA 已經玩緊呢樣野）

（3）Game 入面需要玩節奏遊戲同答問題黎過關（話哂呢間係音樂學校），節奏遊戲版面應該係用返「Music 3」套 Engine，所以新左靚左 Smooth 左！雖然講黎講去都好似有少少換湯不換藥，不過可以喺遊戲入面聽到角色歌始終係令人開心嘅 ❤

遊戲分三個 Package：

（1）Premium Princess BOX：（連：CD ｢Welcome to UTA☆PRI RAINBOW world!!｣、Drama CD、全角色襟章八個連收納盒、全角色感想繪圖卡以及B2 size 掛布）12,800円＋税

（2）初回限定 Shining Love BOX（連：Drama CD、小冊子「ザ・シャイニング Repeat」（2010 年 PSP 版特典修正版）7,800円＋税

（3）普通版 5,800円＋税

遊戲試玩版而家喺日本 Playstation Store 免費公開中！想重頭感受《歌王》魅力嘅你，快啲去預約心水嘅版本啦 ❤

《歌王》遊戲正式發售日 2017 1月 26日，對應平台為 PS Vita。

《歌王》試玩版傳送門