「Nintendo Switch」速報主機功能及配件相關介紹

任天堂今日舉行新世新主機「Nintendo Switch」線上直播發表會「Nintendo Switch Presentation」，係會入面終於發表咗詳盡既「Nintendo Switch」主要功能、玩法、以及相關配件介紹，除咗之前已經知道既屋企出街一機通之外，原來仲有埋體感，今次真係無得輸丫！

「Nintendo Switch」主要有三個模式，TV Mode即係一般家用機駁電視咁，將 Switch 插落去 Dock 使用；Tabletop Mode 將主屏幕同控制器「Joy-Con」分離，主要適用於單機雙打果陣；Handheld Mode 即係成部機拎上手自私 Play咁，因應唔同情況而切換模式。而之前一直驚既就係舊電捱到幾耐，官方就話因應唔同遊戲分別可以玩 2.5 至 6.5 個鐘，例如直播入面話《薩爾達傳說：荒野之息》就可以捱到 3粒鐘咁。其實都好似好快玩完，不過唔驚，佢叉電係用 USB Type-C，即係話……尿袋萬歲！

TV Mode

Tabletop Mode

Handheld Mode

因應唔同遊戲分別可以玩 2.5 至 6.5 個鐘 (Zelda 就3個鐘)

USB Type-C 叉電

另外今次「Nintendo Switch」個控制器「Joy-Con」都好正，除咗可以獨立分拆成左右兩個控制器之外，每個控制器都並內置咗速度感應器同陀螺儀，咁你可能話 Wii 已經有啦，有咩咁勁。「Joy-Con」個尾仲有舊野叫做「動態 IR 相機」，佢可以幫你計算到距離、物體形狀同埋動作，即係話你聽更上一層樓既體感已經無難度！而且個手制今次加咗個叫「HD 震動」既功能，佢能夠表現出好細微既震動感。另外之前睇唔到既係每個「Joy-Con」上面都會有「SR」同「SL」按鈕(即係 LR制阿)，同埋有 NFC 可以讀 amiibo 既資料咁，真係淨係個控制器都有排 J啦！

能夠表現出細微震動感既「HD 震動」

計算距離、物體形狀同埋動作「動態 IR 相機」

咁部機方面就行返自己既 Game Card，又或者係 Store度 DL。對應 microSD、microSDHC同microSDXC，Dock果度正面就有 2個 USB 2.0 for 「Nintendo Switch Pro」遙控器又或者幫「Joy-Con」叉電，後面就有一個 HDMI out 同另一個 USB 3.0插位 (不過而家淨係 Support到 USB 2.0)。

連線方面，Local 透過 Wi-Fi 連機最大可以支援到 8部 (Mario Kart正阿！)，而上網打既話就需要加入「Nintendo Switch」專用網上服務先可以同人連機 (類似 PSN Plus / Xbox Live)。