今集《Dead Rising 4》推出之前都非常受到期待，話晒用返人氣最高既第一集主角 Frank West (劇情有好多gag位)，仲要有返影相拎 PP System添，淨係睇呢2樣已經好吸引啦！而且推出個檔期亦都好靚下，隻 Game 時間設定係聖誕節，同現實推出時間 Match 晒，計到咁盡咁隻 Game 又得唔得呢？下面同大家包膠！

又係我阿

今集地圖可謂集上幾集特色於一身，既有第一集既 Willamette Shopping Mall，又有第二第三集既大街可以比你飛車 (不過啲車好慢)，都算做得幾用心。而且去到今集因為主機硬件能力大幅提升，可以同時出現既喪屍量激增，基本上條街啲喪屍密度仲高過星期日MK條天橋 / 皇后像廣場，密到咁想扭過唔理都有啲難度……呢點營造出黎既氣氛的確唔錯 (聽講食住營多玩會更有 Feel)。

遊戲入面有唔少呢類 Mini Game，達成條件會有特殊獎勵

極受好評既影相 System 回歸，而且仲有得玩「Selfie」，最正既係如果渣住相機潛行狀態下接近敵人，係有得玩「一擊必殺 Selfie」，好鬼搞野！另外今集相機除咗要黎呃 PP 升 LV之外，仲肩負一個非常重要既任務，就係解謎。今集加入咗偵查呢 Part，透過切換相機三個模式就會分別得唔到唔同既線索 (有啲仲要幾難搵)，作為系列新嘗試呢 Part 我係幾滿意。

同前作一樣要升技能，不過技能樹再精細d咁解

拎住相機潛去人地後面就有得玩「一擊必殺 Selfie」

今集要利用相機收集線索解謎

另一樣新野，敵對生還者。通常都係街會見到，一般黎講遭遇突發事件會遇到一堆。大部份時間敵對生還者都係比喪屍圍緊 (佢地係會同喪屍互片的)，所以見到喪屍精英怪或者敵對人類精英就引去對家度等佢地打餐飽，影完相就差唔多可以執雞……。

敵對生還者，多數幾隻一齊出現

弱智既敵對生還者……

新鮮喪屍，活動能力同攻擊力都勁好多

今集同三代一樣係無咗時間限制。即係第一代果陣係限你72小時之內逃走，第二代就定時要幫個女灌漿入體內咁，時間都幾緊湊，之不過今集就無復活時間限制呢樣野。好處當然係新手比較易入手，唔洗趕頭趕命咁玩，壞處就係遊戲會變得太簡單，亦都少咗《Dead Rising》既味道。估計無復活時間限制應該係 Capcom想比大家更充裕既時間探索地圖，因為到截稿前我都仲未行晒全個 Map。

救多D人 Save House就會多D野賣，無咗時間限制就輕鬆可以周圍行救人

一樣有大量 Costume發掘，Zero裝加冰劍行過都嚇死人啦

武器系統不嬲都係《Dead Rising》系列一大特色，今集新增極大量武器，同動力裝甲相關武器，殺喪屍的確係幾爽 (不過動力裝甲數量真係幾少)。而且今集武器欄分做近戰武器、遠距武器同投擲武器，分別用 X、LB、LT+RT 黎控制，用落幾順手，抵讚！至於載具方面就削得頗勁，今集啲載具用電量驚人，血就薄到脆皮樂咁，我就未試過可以渣車由 A 點去 B點啦，鐘意渣車撞屍既相信唔係好滿足到你。

識得玩的話畫面係幾震撼既……..

同一種武器有多種組合方法，唔洗再死記

動力裝甲雖然堅楸，不過數量真係太少

講到多人合作方面呢…….其實係好似 Far Cry 咁既型式。即係同主線故事完全無關，係獨立做出黎另一個模式，使用角色亦都係另外4位生還者。主要內容係每日時限內生存，當中會有好多唔同既任務做，例如渣車落停車場、敲響大鐘等等。比起主線劇情模式，線上模式都做得幾差，無乜合作成份，武器少，耐久值低，基本上玩一陣就無興趣再玩落去，所以都幾難配對到隊友一齊玩。

多人模式會有好多小任務做

一樣有 LV 有技能樹

目標係每日有命生存落去

總結

整體《Dead Rising 4》算係一隻不俗既作品，對新玩家黎講唔算太難入手，最主要原因係唔需要好似以前咁死到50LV先正式開始，而且各種武器易入手亦都非常強力，難度可以算係歷代最低。壞處當然就係對我地呢班《Dead Rising》老手照顧不足，由救人一 Part 更見弊病。以前救人除咗要趕時間去到目的地之外，點樣帶生還者返 Safe House 都係一大學問 (比咩人拎乜武器，幾時行幾時等咁)，今集只要接觸咗生還者佢地就識得自動返 Save House 呢點係一大敗筆。而採用新既武器操作系統同加入大量要用相機搵線索解謎係絕對值得讚既改進，未接觸過《Dead Rising》系列既朋友不妨試下呢集入手再追返一代。