絕對稱職嘅星戰外傳《俠盜一號》觀後感

應該仲有好多觀眾係未睇嘅，所以唔講太多劇情，免得又比人話劇透！
想入場前知多少少背景就睇返之前嘅《Rogue One》上映前必睇懶人包

比機會你轉身走啦，你唔走又話劇透就自己攞嚟

未入場前見到甄子丹同姜文喺《Rogue One》有演出其實堅唔想睇，加埋荷里活 2014 年版《Godzilla》導演 Gareth Edwards 執導(其實我覺得佢套《Godzilla》幾有味道啊。)仲要丹爺喺預告片用棍單挑十幾個白兵，就更加覺得唔通迪士尼都要向中資低頭？

但原來講到丹爺同姜文地係原力聖地 Jedha 嘅守護者，而因為《前傳3》啲 Jedi 都比 Darth Vader 殺晒又搶埋個聖地就比人趕走流落街頭，仲要扮睇相佬搵飯食。其實都唔係枱強國大腳，只係覺得聖地守護者，用中國人去演有份禪味。

另外話就話 Felicity Jones 同 Diego Luna 擔正男女主角，其實成班《Rogue One》嘅主要演員演出機會都好平均(重覺得丹爺特別多添XD)。但絕對接受，因為《Rogue One》其實係一個團體故事，雖然好多角色都好似臨時拉伕咁上馬，不過覺有功用並且都盡晒責任。

而有好多觀眾話文戲都幾多喎，老實講文場多但唔係好悶，因為今次都一貫《Star Wars》格局，有個幾睇得下嘅 K-2SO 代替 C3PO同 R2D2 呢對孖寶。我就直頭想之後正傳繼續可以有K-2出場，佢搞嘅氣氛同 Gag係比 C3PO 更活潑同有趣。你話 K-2 搞啲Gag咩？咁你一定冇睇過 C3PO 啲廢Gag。加上如果男女主角初遇真係冇 K-2搞下氣氛，隨時以為自己睇緊Star Trek(講笑)。

K-2SO真係幾可愛！

今次《Rogue One》個設定好多地方都好有《08MS小隊》味道，點解咁講？一來同樣係外傳故事，二來《Rogue One》基本上冇出過 Jedi 而《08MS小隊》中冇亦新人類一樣，當中仲有啲等真正劇透討論再講XD
(謎之聲：X你，我見有 Darth Vader 出場喎！)唔講太多，睇完你話有影響整體《Rogue One》嘅任務我講對唔住囉。

仲有一樣值得提嘅係今次電影原聲音樂，唔係由用開《Star Wars》系列嘅作曲家 John Williams 而轉用 Michael Giacchino，其實 Michael 接 John Williams 棒已經唔係第一次，《Jurassic World》已經好成功令大家接受，而且 Michael 其實係公映前一個月先接手呢個大 Project (原本係奧斯卡得獎作曲家 Alexandre Desplat 接)，交到貨之餘仲廷續左 John Williams 風格，睇完再聽返下面隻歌真係啲霸氣畫面湧返晒出嚟。
總括今次《Rogue One》如果你為襯墟為話題去睇就慳返啦！老實話到明《Rogue One : A Star Wars Story》，你冇睇過舊作或者淨係睇過啲「谷X莫」當自己睇晒，再話套野唔好睇就真係自己攞架嚟丟。