係啱啱完咗既 ToySoul 擺設咗首次現身香港既《For Honor》試玩版，我地亦都好愉快咁玩咗好多場 (當然我地係為咗摸熟隻 Game啦)！如果錯過咗呢次機會既朋友都知你陰功豬架啦，咁你就真係要睇下呢篇包膠評測啦，因為隻 Game 真係好玩！

首先講遊戲畫面，非常奇蹟地暫時呢個試玩版同睇片分別唔算大，畫質以及人物模組都做得唔錯，流暢度則感覺大約有 40fps 左右。以 Ubisoft 一貫往績黎講簡直係神奇，頂級，超卓！可能經歷過《Division》汲取咗教訓，想靠《For Honor》打返個天下返黎，暫時黎睇只要作出部份修改隻 Game 絕對有呢個能力！

今次試玩版本只有三個職業選擇，分別係騎士、維京人同日本武士，而宣傳品都只係見到三個職業，睇黎另外三個職業會係稍後時間先開放。暫時三個職業感覺上最強係維京人，招式大開大闔，攻高防好似都高啲；騎士就動作比較靚，速度中等；武士則為出刀最快職業。另外今次試玩仲發現咗樣野，之前一直以為一邊只可以用單一職業，即係只可以全隊武士 vs 全隊騎士咁，但原來係可以自由選擇職業的！

感覺騎士無乜特別

日本武士除咗出刀快之外，必殺技射箭更加係屈機技能

遊戲提供教學模式，最主要係教你點樣攻守。當面對敵方武將時撳實 L2 會 Lock 住對手，係呢個狀態下會出現三個箭咀，如果敵方亦都係 Lock 住你既話係佢前面亦都會有三個箭咀。呢三個箭咀分別代表住攻守雙方武器架式方向，如果大家都係揀同一邊防守方將會架開攻方攻擊。聰明既你相信已經諗到遊戲主要戰鬥方式就係透過不停轉換架式方向黎進行，不過隻Game 就梗係唔會咁簡單啦。攻擊有分 R1輕攻擊、R2重攻擊，另外仲有 X 迴避同 正方 Guard Break。今次試玩發現即使你擋開咗敵方攻擊後最速反擊對面都係擋得住的，變相其實攻方有利 (希望正式推出會有修改，唔係會變成二個人鬥劈)，所以如果睇準對方重攻擊用迴避再反擊硬直會仲細。而 Guard Break 就係用黎對付想用愛與和平感化你既對手，一野 Break 落去就 Fit 晒 (當然最有用既戰術就係圍毆)！

教學模式簡單易明

對敵方武將會自動提示撳實 L2進入對戰 Mode

擊殺敵方會得到 EXP Unlock 左下角技能

戰鬥模式下既三個箭咀代表攻守方向

出黎行最緊要疊馬，人多過佢就圍佢啦梗係

呢個版本只提供 4 vs 4 對戰模式，主要玩法同之前宣傳影片大同小異，以佔點為主，當佔領據點後原地等待就會慢慢回血。玩到呢 Part 我地亦都發現另一個問題，就係當對面發現你地好疊馬唔夠抽調頭走果陣，因為大家速度相約之餘遊戲亦無跑步體力呢個設定既關係，就算即時反應得切追擊都會變成跑 Online，即使隊友包抄打中對方都唔會減速，呢個位只要拿捏得唔好就好易變成名作《Evolve》咁，希望推出時會有改善。

己方據點會自動回血

呢個模式下只要總分超過1000分後對方就唔會復活

殺晒對面就會贏

渣流灘統計表 (玩得咁屎就梗係唔係我黎啦)

總結

遊戲完成度都幾高，除咗佔點之外，擊殺敵人或者小兵都會得到 EXP，儲夠就會升 LV Unlock 必殺技，呢點令到戰術層面進一步提升。不得不提既係如果有打開 LOL 類 MOBA Game會有額外加成，事關只要偷襲敵人背脊已經贏咗一半，習慣長期望小地圖有絕對優勢。另外由於今次係模式係佔點為主，現場玩果陣已經係咁 C點 B點咁叫，可以預見正式推出果陣個 Party 係會嘈到 PK，諗起都開心！而且隻 Game 擺明就電競向，官方又講到明會有大型對戰模式推出，睇個勢又會係咁加新角色，期待度十足，只要無瘋狂出現大 Bug 的話相信會係 2017年最具實力對戰遊戲之一，遊戲會於 2017年 2月14日上市，分別有 PS4/Xbox One/PC 平台。