2VCG2017基礎簡介最一篇：C) 屬性聯防、D) 隊伍組合、G) 對戰道具。
再次，重新再POST一次屬性表，以方便大家查閱。
(屬性表) 另外粉末招式對草系無效，鬼系無法被綑綁。
C) 隊伍組合
//gamer.vjmedia.com.hk/13454/pkm-13092016/
我喺呢篇講咗一啲簡單分類。但由於VCG2017可以用嘅寵有幅數目減少加上《前篇》提及嘅一啲改動；先容我重新介紹一下各隊先。
(一) 天氣隊：
晴：＃324煤炭龜 (Torkoal；コータス) ＜基本上肯定配合埋 戲法空間 用＞
雨：＃186蚊香蛙皇 ( POliTOeD；ニョロトノ) 、＃279大嘴鷗 (PeliPPer；ペリッパ )
霰： ＃584雙倍多多冰 (VaNuluxe；バイバニラ ) 、＃038九尾 (NiNeTaleS；キュウコン)
砂 ：＃526龐岩怪 (GiGaliTh；ギガイアス) ＜同樣非常配合埋 戲法空間 用＞
面對天氣隊，要有截擊主攻手、天氣手嘅能力，並隨時切換己方攻擊主力。
一如舊文所指：天氣隊為一種極容易辨識，但又極度危險嘅隊伍。只要進入合適天氣，對賽嘅優勢將會壓倒性地傾向天氣隊。而今集加入唔少配合戲法空間 (トリックルーム Trick Room) 使用嘅選擇。
好似對付雨天隊，幾乎一定要有草系先可以，因為雷唔擋水，但大嘴鷗又有暴風可以攻擊草系，所以比以往更麻煩；
而對付晴天隊，以往標準嘅 地震同 岩崩已經無法對煤炭龜做到啲咩…請考慮用特攻型嘅岩／地去攻擊吧，或截擊佢嘅欺空手；
雪隊已經唔再係需要欺空手先能夠存在嘅隊型，反而今集加入咗特性：撥雪穿山王 (亞種) 嘅高速 同埋 招式：極光幕嘅物理特殊減傷，比起以往嘅強攻變得更多元化；
風砂隊就要改以物攻系招式攻擊岩系，因為風砂中岩系特防會3／2倍，另外今集可以做嘅係截擊欺空手，不過三頭地鼠 (亞種) 有風砂之力又高速其實未必單純靠截擊欺空手就可以。
(二) 順風隊：
＃169 叉字蝠 (Corbat；クロバット ) 、＃279大嘴鷗 (PeliPPer；ペリッパ ) 、＃547風精靈 (ＷhimSiCOTT；エルフーン)
順風隊為配合招式 順風 (おいかぜTaiｗind) 嘅隊伍。設置一個兩倍化己方速度嘅環境四回合，等己方接落嚟可以全面速度壓制，同時間由於順風加嘅速好足夠，隊伍可以調整返啲努力值落生存力上，屬速攻隊嘅強化版本。另外、順風隊有優點，因為唔係天氣，所以可以配合其他天氣嚟用。如果話順風隊最怕見到咩情況，就係設置 順風該回合，遇上對方設置 戲法空間，立即進入完全後制狀態。
今集新增嘅Pokemon中，普篇都係70速以下，所以一旦順風基本上就會先過對方，不過真係要好好準備定對付欺空隊嘅手段。
(三) 欺詐空間隊：
＃080 大呆獸 (呆殼獸；SlOｗbrO；ヤドラン) 、＃103椰樹獸 (椰蛋樹；Exeggutor；ナッシー ) 、＃324煤炭龜 (Torkoal；コータス) 、＃526龐岩怪 (GiGaliTh；ギガイアス)
欺空隊為配合招式 戲法空間 (トリックルーム Trick Room) 而設嘅隊伍。設置一個以速度愈慢愈優先行動嘅空間五回合，等本身屬極慢速嘅Pokemon全面先攻壓制，而由於本身使用嘅Pokemon都低速並唔需要練速度，所以一般都生存力唔差。欺空隊有幾個可以針對到佢嘅位置；第一、欺空本身係後制－7嘅招式，所以任何可以令到佢停止行動嘅招式都比欺空手快，抱括催眠、膽怯、強制、挑釁換出技等，甚至可以直接集火殺死欺空手；第二、次回合如果對方場上有特性 惡作劇之心嘅Pokemon，好多時會補上 安歌 (アンコールEncore) 令到欺空手即時使用多次欺空，抵消原先設置嘅欺空，當然閑熟嘅玩家會喺呢個回合先讀換入主攻手；第三、欺空時間其實極短，設置嘅該回合會自動當一個回合，所以實際上只有四個回合，而同時間對方只要用雙重保護拖延，就好容易消耗晒欺空嘅回合數。
由於今集新增嘅有唔少強力嘅極慢速Pokemon，加上 疾風之翼及一貫先制技嘅削弱 (參考《前篇－先手次序》) ，欺空隊將會又變成潮流；有心打天梯賽嘅，請要準備好各種手段。
(四) 單擋隊：
＃756燈罩夜菇 (Shinotic；マシェード ) 、＃036 皮可斯 (皮可西；Cleｆable；ピクシー )
今集新增新嘅集火招式：聚光燈 (SPOTliGhTスポットライト ) 比以往 跟我來同忿怒粉都仲要快多一個行動次序；而且更可以以友軍為集火目標，不限自己，增加咗反擊型隊伍嘅玩法。
以一隻Pokemon吸引火力，另一隻Pokemon作主攻手嘅隊伍。好多時主攻手都會有最少一招範圍攻，以補充少咗一隻攻擊嘅傷害。吸引火力嘅裝備上 安全帽，可以集火同時，扣減近身攻擊者嘅HP。單檔隊嘅優點係，無需特別設置控場，靈活性大；但缺點就係打少一個攻擊手，同埋面對範圍攻時，吸引火力嘅招式無用。
(五) 滅亡之歌隊：
幾乎唔喺VCG2017存在…嚴重缺乏相應特性嘅Pokemon。
(六) 領域隊：
＃785卡璞．鳴鳴 (TaPu KOkO；カプ・コケコ ；) 、＃786卡璞．蝶蝶 (TaPu Lele；カプ・テテフ ) 、＃787卡璞．哞哞 (TaPu Bulu；カプ・ブルル ) 、＃788卡璞．鰭鰭 (TaPu ＦiNi；カプ・レヒレ)
今集四隻570傳說島神所帶出嚟嘅新隊型。
電氣場地 (雷) ：對地面上Pokemon生效；雷系招式3／2；唔會陷入睡眠。
精神場地 (超) ：對地面上Pokemon生效；超能力系招式3／2；唔會被先制攻擊。
青草場地 (草) ：對地面上Pokemon生效；草系招式3／2；每回合回復1／16最大HP。
薄霧場地 (妖) ：對地面上Pokemon生效；龍系招式1／2；唔會陷入異常狀態。
情況好似天氣隊嘅地面版本。一樣屬於極易辨別嘅隊伍，但相對嚟講，比起天氣動輒都一堆效果一齊發動，領域隊主要係招式威力嘅增減，同埋做一啲簡單嘅輔助。
電氣場地下，不但雷系招式強化，仲有＃026嘅雷超 (亞種) 嘅2倍速，同時間雷系唔會陷入麻痺 (雷領又令到佢哋唔會睡眠) ；但要對付雷領隊有個簡單嘅做法…地震…因為全部都係唔識飛嘅雷系嚟 (識飛就無雷領嘅效果) 。
精神場地，係今集專門出嚟對付以往一街都係嘅先制招式嘅…簡單啲就係要你用返最普通嘅速度對決 (包括欺空) ，亦防止咗被下馬威；對付佢嘅方法其實就係放 戲法空間／順風，一次過改變兩方嘅速度關係；至於係欺空定順風，就留意返蝶蝶啲隊友嚟決定。 (蝶蝶95速其實欺空基本上佢就最慢) 。
青草場地……除咗草系招式強化外，我睇唔到一個5回合先最多回5／16嘅領域有咩實際效果 (仲要連敵方) 。雖然我上網有見過人用過哞哞，但其實用嘅人都只係用返哞哞本身嘅坦攻能力。
D) 屬性聯防
//gamer.vjmedia.com.hk/13791/pkm-19092016/
講得最多有關屬性聯防嘅一篇。簡單嚟講，就係2V2時，由兩隻Pokemon嘅招式互相反制對方嘅防禦弱點，例：龍／格就要有一隻夠力嘅鋼或毒系幫忙反制妖精系；普／超只怕惡，就用格／蟲／妖去保護。
單單係講屬性反制，可能會有人話：「我自己有埋嗰個屬嘅招式咪得囉」：但當少咗屬修嘅1﹒5倍後 (上一篇有講) ，你嘅攻擊係唔係一定打得死對方？當有另一隻聯防嘅攻擊手存在，一定會令對方係唔係要作出攻擊構成壓力，要諗下：「會唔會出『守住』，另一隻就將我重傷呢？」捉棋時，令到對方少一啲可行嘅選項，就係需要嘅技巧嚟。
好多時屬性聯防，都係一隻配一隻咁去考慮；不過組隊時最容易諗嘅當然係先搵一隻做為主題主力，之後再為佢組織聯防。咁講好複雜，不過我哋可以攞上面啲天氣 (晴) 嚟講下。
晴天隊：煤炭龜怕水／地／岩，晴天將水傷1／2；
要對付水／地／岩，最好就係草系，所以就開始考慮草系攻擊手；
因為煤炭龜係需要 戲法空間支援，所以我就可以鎖定椰蛋樹 (亞種) 呢一隻既係草系攻擊手又有戲法空間嘅Pokemon，另外椰蛋樹特性為豐收，晴天下100％回合完結回收用過嘅種子；
我哋現今手上有火系招式 (熱風／噴火) 、草系招式 (陽光烈焰／木槌) ，已經 (草系) 可以反制煤炭龜嘅弱點，亦 (火系) 可以反制椰蛋樹其中兩個弱點，冰／蟲；
現今淨返椰蛋樹嘅飛／毒／妖／龍，以及火／草都打唔傷火系嘅問題未解決；
煤炭龜作為特攻型，除咗熱風同陽光烈焰之外，再學多一招污泥爆彈 (毒) 幫椰蛋樹打妖精系，雖然佢自己個招式組合打唔到席多藍因 (火／鋼；引火) ，不過VCG2017見唔到佢，唔洗理；
龍系就由得椰蛋樹自己學返龍槌 (龍) 去反制就OK嘞，相對地因為龍槌，所以椰蛋樹較適合練物攻型，所以學木槌 (草) 。為咗方便一次過可以打到火同毒，就揀咗招地震 (地) 嚟學；
由於椰蛋樹學咗一招全體攻擊嘅地震，所以煤炭龜就要有返招守住 (舊譯：保護) 嚟回避攻擊；
就咁呢兩隻可以配備嘅招式已經齊晒各4招；
椰蛋樹 (亞) ：木槌／龍槌／地震／戲法空間
煤炭龜：熱風／陽光烈焰／毒泥爆彈／守住
但尚有飛行系及唔受地面攻擊嘅毒／火係打唔到嘅，呢個時候當然可以用龍及晴天下嘅火強行突破，亦可以繼續組織新嘅聯防，放一隻其他嘅Pokemon入隊。
G) 對戰道具
裝備到Pokemon身上，對對戰有影響嘅道具嘅統稱。以下請容許我只介紹常見嘅，唔多常見嘅嗰啲我就唔提。
專愛系列：
講究頭巾 (攻專) ：攻擊3／2；只能使用一開始使用嘅招式，直到換出。
講究圍巾 (速專) ：速度3／2；只能使用一開始使用嘅招式，直到換出。
講究眼鏡 (特攻專) ：特攻3／2；只能使用一開始使用嘅招式，直到換出。
一種強行將能力值倍大嘅裝備，對於唔需要用不同招式嘅Pokemon嚟講係相當實在常見嘅裝備。
一般常見會配合一啲有強而有範圍技嘅POKEMON，例如妖精伊貝 (妖精皮膚＋高音) 、土捲雲 (地震) 。
另外，速專就有額外突破速度極限去反剋己隊弱點或配合 急速折返／伏特替換打一擊脫離嘅玩法。
藥草系列：
白色藥草 (白草) ：當下降能力時，恢復下降效果；消耗品。
心靈藥草：當陷入挑釁、頹廢、安歌時，恢復挑釁、頹廢、安歌；消耗品。
強力藥草 (紅草) ：當使用嘅招式需要儲力時，即時使出；消耗品。
白草同紅草係分別用嚟對應返自己打算用嘅強力招式嘅，用嚟進行強制確一用。
心靈藥草就係畀啲干擾手、輔助手 (例如 智揮猩) 用嘅，以防一個挑釁或者安歌就無效化。
回復系列：
黑色污泥：毒系每回合回復1／16最大HP；其他扣1／16。
剩飯：每回合回復1／16最大HP。
大根：吸收類招式回復效果＋30％。
已經好少再喺對戰中見到，因為回復效果實在同其他道具比差太遠…輔助手／干擾手不如裝心靈藥草防挑釁，坦攻手不如裝突襲背心加雙防。回復系列係時代嘅遺物嚟。
傷害上升系列：
達人帶：招式為產生屬性剋制時，傷害＋20％。
生命寶珠 (命玉) ：傷害＋30％；攻擊招式後扣減1／10最大HP嘅HP。
都係傷害提升嘅裝備。分別在於達人帶裝備喺打擊面多嘅Pokemon，命玉就裝喺打擊面少啲但基礎威力大啲嘅身上。
防禦上升系列：
突擊背心：唔能夠用變化招式，但雙防3／2。
進化奇石：未完全進化嘅Pokemon，雙防3／2。
簡單、直接、有效提升生存力。突擊背心畀一啲坦攻型用，放棄補血技同埋輔助技，直接BUＦＦ雙防作戰。進化奇石就係畀例如 屬性：空 (TｙPe：Null) 呢啲進化前後相約嘅Pokemon而設。
領域系列：
雷領種子：當置於電氣場地時，物防上升1級；消耗品。
草領種子：當置於青草場地時，物防上升1級；消耗品。
超領種子：當置於精神場地時，特防上升1級；消耗品。
霧領種子：當置於薄霧場地時，特防上升1級；消耗品。
今集新增裝備，配合領域隊使用，可以令到所用嘅坦克或輔助干擾手硬一啲。 (未知效果有幾大)
樹果系列：
木子果：當陷入異常狀態時，解除異常狀態；消耗品。
零餘果：當陷入睡眠時，解除睡眠；消耗品。
文柚果：當HP低於1／2最大HP時，回復1／4最大HP；消耗品。
減傷系列果：當指定屬性攻擊剋制自己時，該次攻擊傷害時會減半；消耗品。
提升能力系列果：當HP低於1／4最大HP時，指定能力提升1級：消耗品。
基本上木子果、零餘果主要係配合返會令自己陷入混亂或睡眠 (招式：瞓覺) 嘅Pokemon，有時木子果會用嚟解除對方施加嘅灼傷狀態。
文柚果畀一啲要維持血量 (如：弱丁魚) 或者係有特性：豐收嘅Pokemon使用。
至於其他兩個系列嘅果實已經唔常見，因為不如直接用弱點政策…
特殊效果系列：
氣勢披帶 (一血帶) ：滿血時，唔會被確一，會淨返1HP。
對於玻璃大炮非常有用。另外巨菇蟲 (派拉斯特) 必需…
火焰寶珠 (炎玉) ：回合完結時，裝備者陷入灼傷。
對於有特性：骨氣嘅Pokemon嚟講，係自體觸發特性嘅裝備，只要過咗首回合，攻擊力就會3／2倍啦。
劇毒寶珠 (毒玉) ：回合完結時，裝備者陷入中劇毒。
特性：毒療Pokemon專用，中毒會每回合回1／8HP之餘亦防止陷入灼傷、睡眠、麻痺之中。
氣球：唔會被地面招式影響；受到傷害後會消耗。
對於非常怕地面系攻擊嘅Pokemon相常有用，但亦要留意被攻擊就會無咗。
紅牌：被攻擊時，攻擊者換出。
好少見，但有人會裝喺單擋手身上，以拆開對手嘅屬性聯防。
逃脫按鍵：被攻擊時，自己換出。
主要係畀一啲特性係出場時發動嘅Pokemon (如天氣手、威嚇) ，或者畀要出場先能夠用嘅招式 (如下馬威＜擊常奇襲＞、迎頭一擊、掀塌塌米) 增加使用次數而用。
防塵眼罩：唔受霰、砂嘅天氣傷害；唔受粉末招式影響。
最主要就係為Pokemon追加相當於特性：防塵嘅效果；對於要回避菇類Pokemon嘅孢子係相當有用。
遮斷手套：招式一律視為遠隔。
相當於特性：遠隔，防止近接攻擊時觸發效果。 (今集新增，暫時未知用途有幾廣)
凸凸頭盔：被近接攻擊時，對方扣減1／8最大HP。
單擋肉盾專用，將對方攻擊吸引過嚟，為隊友承受傷害之餘，亦對對方造成傷害。
弱點政策：當被剋制自己嘅招式攻擊時，攻擊及特攻提升2級；消耗品。
XＹ一登場後，就取代晒其他受傷加攻嘅裝備；變成畀啲先坦後攻嘅攻擊手用。VCG2017能夠配合嚟用嘅頗多，最突出嘅莫過於半血下會變身嘅 小隕星。
介紹完道具就，承上題咁去講返上面煤炭龜同椰蛋樹應該裝啲乜。
椰蛋樹因為有特性豐收，只要配合天晴，每次使用文柚果後都會回收。簡單啲嚟講，就係每次低過1／2HP都可以回1／4HP，相當於每回合都可以回復1／4HP；所以木槌攻擊會有反作用力？有咩所謂。
至於煤炭龜可以裝備氣球或者弱點政策；裝備氣球嘅原因係方便椰蛋樹無後顧之憂 地震 (地) 最少一次；相反裝備弱點政策，就係等椰蛋樹地震嚟觸發佢雙攻倍化 (如果用弱點政策的話，其實煤炭龜可以唔學陽光烈焰，變成雙刀流，改成學 岩崩 (岩) 打擊埋飛行系) 。
睇晒三篇希望打家對對戰嘅一啲基本會有所掌握 (雖然最深、最難明嘅放咗喺前篇) 。祝大家組合出啱自己心水嘅隊伍，並期望我哋有機會對戰一次啦。
回帶相關文章：
《Pokémon Sun / Moon》第七世代基礎攻略 (中篇)
《Pokémon Sun / Moon》第七世代基礎攻略 (前篇)
《Pokémon天梯入門》禁MEGA石後必用廚獸－No.663 疾風怒濤！烈箭鷹！
《Pokémon天梯入門》使用率前五干擾手 －No.591 暴露菇
《Pokémon天梯入門》變幻自在嘅人氣主角－No.658 甲賀忍蛙
《Pokemon XY》400小時遊玩時間，天梯賽1700以上嘅非專業玩家。閒時會寫下嘢咁