出咗都有一段時間既《ARK: Survival Evolved》，一早就話過會有 PC / Linux / OS X / Xbox One / PS4  版本，咁係 2015年除咗 PS4 之外其他平台都已經推出咗啦，之但係 PS4 版本就遲遲未有，不過根據最新消息係今年 12月6 號就會正式登陸 PS4啦，仲有唔夠一個星期大家就可以係呢個恐龍島上面同其他玩家一齊為生存戰鬥！

《ARK: Survival Evolved》係由 Studio Wildcard 製作同發行既多人生存類沙盒動作冒險遊戲，主要視點為第一身，不過係某啲情況下可以轉為第三身視角。玩家舞台係一座充滿恐龍既島嶼「方舟」，所以其實嚴格黎講並唔係正式既恐龍時代，有啲似侏羅紀公園咁。而個島就好鬼大，陸上面積約為 36平方公里，海洋約為 12平方公里，呢個數係未計山洞同海底面積，要行都行死你果種。玩家就需要係呢個周街都係恐龍既環境下透過打獵、種植、科研等等多種方式黎生存，另外仲需要起基地黎保護自己防止比其他玩家打。

隻 Game 最正係好多痴線設定，你肚餓又無能力去打獵係可以隊冧其他玩家再煮佢啲肉黎食，食飽當然有得屙屎，舊屎除咗可以要黎做肥料耕種之外仲可以直接拎黎食！另一樣幾有特色既係玩家會因應唔同部位受傷就會得到唔同既傷害，所以瘋狂扑頭既話就會昏迷，咁就可以活捉啲恐龍或者其他玩家 (儲糧？)。捉到既恐龍仲可以馴服黎做騎寵或者運輸用。恐龍就有超過60種，仲會有其他史前物種，例如渡渡鳥、劍齒虎、真猛瑪象、巨脈蜻蜓等等。

隻 Game 仲支援單機或者多人連線的，多人連線係 PC 版就有得自己開 Server，或者入官方 Server (支援 100+玩家)。咁多人就梗係會有部落系統，所以有興趣玩既朋友越早入 Game 越好，你知啦……Online Game 唔鬥多人唔通鬥靚仔咩，12月 6日就會正式登場，USD $55 (香港 PS Store 未必會有)！