係啱啱過去既韓國韓國釜山 G-STAR大賽度，《街霸 5》既製作人小野同綾野接受咗 FAMI 通既訪問，而係呢個訪問入面竟然透露咗唔少關於《街霸 5》既規劃。訪問內容除咗圍繞住 2位對 Capcom 主軸 CPT既睇法之外，仲直接回應咗之前《街霸 5》重返機舖以及豪鬼將會推出既外間揣測。
由於係韓國進行訪問，所以入面提到 2位對韓國同亞洲《街霸5》既睇法。當中小野就話：「單純由比賽角度睇，參賽人數比以前多咗50-60%，比《街霸4》初期好好多」，而且佢亦都認為就韓國黎講因為有世界級選手 Infiltration 存在，影響咗好多人，從而增加咗參與遊戲既玩家。亦都因為咁當地既整體水平亦有提升，例如中國有小孩，新加坡有 Xian 咁。
而 CPT 方面，綾野就提到係日本搞全國大賽呢類大型賽事係有一定難度，因為係日本要搞高額獎金既賽事係要面對好多法律問題。所以佢地就考慮到用「名譽」黎代替金錢，咁咩係「名譽」呢，佢地就話例如冠軍會得到總理大臣既接見咁啵……係其他地方可能 Work 既，香港黎講……好在小野就補飛話而家都仲係摸索階段！
另外之前見街果條豪鬼 Teaser 入面寫住「Playable at PlayStation Experience 2016」，咁大家都估終於係《街霸5》度玩到豪鬼啦，之不過今次小野就回應「豪鬼が出るなんて誰も言っていませんよ（笑）。」(邊個話我地會出豪鬼)。咁後面佢酒補充話到時喺「Playable at PlayStation Experience 2016」就會明白呢條 Teaser 嘅意義，仲話會令所有人都會震驚添。
咁講到去《街霸5》規劃，小野綾野都明白到因為 Server 問題令到大家玩得非常之唔高興，佢地已經明確咁了解到 Server 問題係邊度並且進行緊大幅度嘅修正，而且亦都已經有晒時間表，只要時機合適就會正式對外公布。另外《街霸5》嘅營運規劃已經去到 2020年，黎緊嘅日子佢地亦都希望更多玩家能夠參與佢地所舉辦嘅賽事，從而增加觀眾以及玩家人數黎帶動銷售數字(老實講你唔改 System 點玩)。
關於之前我地亦都有報導過《街霸5》會出街機一事，今次二位有個非常正面既回應，綾野特別糾正「我地並唔係發售街機版，而係同 TAITO 討論如何令街霸5可以係機舖入面玩」。小野亦都話「誰かがウン十億円くらい融資していただければ即決で作ります（笑）。」(邊個比十億融資咪立即出囉)。相信亦都講得好清楚短期內都無乜可能係機舖會見到有《街霸5》既出現啦……但係你對家會有街機啵……。
訪問最後二位亦都提到《街霸5》開發初期已經有個想法係希望增加用 Joypad 手制玩家。除咗因為 EVO 2014年冠軍 Louffy 係手制玩家之外，亦都考慮到有好多玩家係由頭到尾都無考慮過要買 Joystick 嘅。所以佢地曾經認真考慮過改為 4鍵操控以及製作一啲用4個鍵就可以打嘅角色，而 4鍵操作將會係今後推出新角色時嘅重點考慮之一。
回帶相關文章：
二大格鬥 Game 《King Of Fighter XIV》《Street Fighter V》將會重現街機市場？！
VJGamer總編，細細個已經蒲機舖，機齡甚深，熱愛電玩文化。