是咁的，當我準備買《Watch_Dogs 2》嘅時候玩好多人都同我講「你唔係啊？」、「上集好伏下喎」、「上隻都玩唔爆，捱唔到」，但我就成日話「點都要比多次機會嘅，一次可能失手啫」呢個心態對所有事物，續作遊戲當然包括在內。

但當我見到前排佢喺咁sale玩家買定預購，同買season pass仲有特別任務嘅時候，我都問一問自己「係咪有啲伏味洩漏呢？」

序章的確仲有啲驚，同上集好似，又係啲差唔多樓層殺敵，但一出到大地圖成個感覺唔同晒！
成個故事同上集感覺完全唔同，第一集講復仇，成個遊戲仲要陰陰沉沉咁(雖然我覺得唔錯)。今集整體係輕鬆好多，好多gag位之餘仲有啲兄弟情，玩熱血玩義氣！舊角就(主線劇情)得T-Bone一個，同DEDSEC團隊起左一個幾有趣嘅化學作用，兩代 Hacker 有唔同世代嘅睇法，有時都幾好笑。

故事任務中仲有好多位自嘲，例如主線中有路人嘅對白大概係話「早叫你唔好買Ubisoft嘅股票啦！」，仲有啲隱藏任務仲直頭踩到公司幾盡下。

遊戲畫面算係上乘，交代劇情嘅人物表情同動作都非常高質，近遠景、光影效果都做個非常仔細。

今次整體遊戲版圖改善左好多野，例如唔再只係得高樓大廈，有啲山路水路比大家玩下；地圖上除左HQ(基地)之外，所有商店都可以用嚟快速移動，減省左好多無謂嘅駕駛時間。

載具多左一啲越野車款去應付山路，但可惜駕駛感同物理性配合度唔太好，我有懷疑過係咪自己揸得差所以有影響，咁結果當然與我無關XD。有一點值得一提係船方面，特別有一款帆船，佢嘅駕駛方式同其他有啲唔同，玩帆船嘅時候係要留意風向先可以行駛，呢啲少少嘅點子係幾有趣。

順風真係一帆風順

逆風真係完全行唔到=.=

角色嘅服裝多過上集好_多！(其實係上集特別少)衫、褲、鞋、眼鏡同帽都有得揀。唔同嘅商店有唔同Style，換衫仲唔洗返HQ，入到服裝店買完唔襯可以即刻再換過。可惜遊戲中嘅人物動作都係生硬，幸好攀爬動作未有踩空氣之類嘅bug出現。

街邊檔同特定地標都有特別服裝

隨身帶住嘅車仔「跳躍者」同無人機「四軸飛行器」係今次遊戲中嘅最大幫手，亦同時成為好多解謎點嘅重要工具。首先今集任務中好多情況都需要隱密行動，角色一去到警誡位置被發現，結果都係變蜜蜂竇多。所以靠無人機先偵察敵人位置，再用車仔幫手解鎖就更方便潛入。

有優就有劣，今集有幾個扣分位係抵鬧嘅。第一，地圖上高低差好難分別，當任務中去到啲比較多層嘅地圖就非常麻煩，要靠「網路入侵(R3)」視點去分辨敵人位置。

第二，武器雖然多選擇，可惜隨身只可以有三件武器，無可否認作為hacker係唔應該用槍嘅，得玩起上嚟就無咁過癮。

第三，上集喺追逐戰中一啲擊遺敵方車輛嘅效果都冇埋，要知有冇擊中就要靠睇小地圖啦。

總結：

整體上今集比上集進步嘅地方有好多，故事主線係完整流暢又冇拖，整體操控上唔係有好大問題，一啲載具、道具同場景睇得出擺左好多心機落去。一隻開放式世界嘅支線任務種類就叫收貨，而支線中交代一啲彩蛋同前作嘅關系，呢一方面係值得一讚。雖然整個遊戲係有啲不足、有缺點，但絕對值得玩。
至於會唔會因此買埋Season Pass去玩埋之後嘅追加任務，就睇你幾有愛，事關真係好感興趣就直接買典藏版或者黃金版包埋Season Pass同追加任務，唔係嘅話淨買最平都要二百幾，唔係好化算。