先講明，好多人將新海誠同細田守做比較「邊個先有能力接宮崎駿地位」。以作品傾向我就選擇左細田守嘅！(講愛情動畫我睇返世徒ゆうき好過！)
所以你話我偏見又好咩都好，當我睇《你的名字。》嘅時候有少少抱住「過150 億票房真係咁勁？」嘅心態入場。(呢個想法的確唔太好….)但最後我冇選擇錯由《你的名字。》開始進入新海誠嘅世界。

故事我唔太講咁多，只可以講喺細節當中加入好多日本功藝同傳統文化去穿梭於故事當中，增加左兩個主角背景上嘅立體感，其他就自己入場留意啦，因為唔想劇透令大家冇癮。
畫面嘅用心程度的確係比現時好多動畫師用心，就算你隨便留意任何一個場面都絕冇偷工減料，呢個功勞除左歸功於新海誠之外，仲有就係由《秒速5厘米》就開始合作嘅 CoMix Wave Films 呢個動畫製作團隊。之前日本上映後大家都見網上瘋傳嘅實景與動畫中嘅對比圖，依家再比個google map位置大家，對比下係咪接近一樣啦。

另一樣非常吸引嘅係選聲優同配樂，聲優同人設同步率非常高，完全覺得神木隆之介同上白石萌音就應該係瀧同三葉咁嘅樣，特別要提神木隆之介扮嬌嗲都唔會太大反感；整套電影嘅配樂睇嘅時候仲以為係一啲有名大師手筆，睇完即刻去買隻 Soundtrack 先知原來全部歌都係由一隊 Rock Band 「RADWIMPS」負責，今次仲要係佢地首次為電影配樂，相信將來新海誠嘅作品都會繼續聽到「RADWIMPS」嘅歌。

總括嚟講今次《你的名字。》係一套好典型嘅科幻愛情片，節奏同格局都好易入口。亦會係推介身邊人或者朋友接受新海誠嘅一個入門電影。(啱啱買返《秒速5厘米》準備睇XD)