鐘意玩日系 RPG 嘅朋友一定唔會對《女神異聞錄》系列感到陌生。作為 20 周年紀念作嘅 P5，無論係故事劇本以及遊戲系統都做得相當唔錯；遊戲裡的過場動畫和 Event 則非常善用豪華聲優陣（宮野真守、水樹奈奈、杉田智和等），如果本身係動漫控嘅玩家絕對會因此而更加投入。

主角係高中二年級生。

主角某夜放學遇上一個權貴人士飲醉酒喺條街度強搶民女。咁，由於充滿正義感是主角的定番設定，所以當然係馬上衝上前幫拖；點知，民女居然因為怕得罪權貴人士，反過頭黎喺警察面前老屈男主角「打人」。

先此聲明，如果你對香港個政治環境有所關心嘅話，P5 個故事可能會玩到你好灰。

主角比人老屈一條「傷人罪」，結果被父母流放到東京一個朋友屋企，一來比機會男主角「反省自己」，二來希望個仔可以避下鋒頭。

中間詳細嘅劇情我當然希望你自己去玩去感受（真係好好玩呀信我啦）。不過，大致上就係主角意外下覺醒而得到 Persona 嘅力量……

然後同佢身邊嘅戰友／同學／朋友一齊成立左為名「怪盜」嘅團體去打擊現實入面行惡嘅人。

嚴格黎講係雞蛋與高牆的故事。一開始係對付學校嘅變態體育老師、然後係對社會有影響力嘅人；過程中發現所有壞人壞事背後都係環環相扣，勁多勾當，黑暗到啤一聲，同時又好鬼真實。

最真實係咩？就係「怪盜團」剛剛開始活動時好多人因為新鮮感而支持佢地，覺得「嘩有人黎警惡懲奸、爭取公義」；但係，去到打尾二個 Boss 嘅時候，大家根本唔係太在意。一來新鮮感已過，二來大家平時把口話想要改變，但當人企出黎挑戰強權嘅時候，大家又會覺得「而家咁樣咪幾好？咪搞事啦」。

原來要改變現狀，最難唔係打倒強權，而係要改變人心……

啊咦嗚呀點解會講左黎呢方面？我黎 Happy 架咋對唔住呀～～

（除特定劇情外，選項並不會影響結局）

雖然我講到個故事好似好灰咁，但遊戲過程入面無論係對白或者 Event 都有好多令人會心微笑嘅地方；角色嘅互動會令你有個錯覺佢地真係成為左自己嘅朋友。

同埋……

男主角明明好型仔、十項全能、又有領導才能、全部女角都對你有好感、全部男角都當你係大佬、連隻貓最後都選擇跟你返鄉下（下略五百字），呢啲咁完美嘅人設簡直係所有男人嘅夢想，連我係女玩家都想自己變成佢咁樣統一天下（！），最後打爆機喇要返屋企喇，我仲好唔爭氣咁因為唔捨得而眼濕濕，加上未完成獎盃目錄，拿拿聲走去開始二周目。

（二周目打倒隱藏 BOSS 之後可以獲取本遊戲最屈機道具「全能の真珠」；除左萬能屬性外，全部攻擊都對裝戴者無效）

唔小心打到咁長，打住咁多先，多謝你睇完。
如果睇完呢篇 1999 文能夠引起你對 P5 嘅興趣，我代遊戲多謝你（明明唔關我事）！

遊戲官網：//persona5.jp/
推出日期：2016.09.15
對應機種：PS4 / PS3