聽日就出 PS4 Pro 啦，各大遊戲廠都開始放料出黎講自己邊隻 Game 會有效能提升，咁今次就到 SQUARE ENIX 放咗條片出黎係解說已經上市既 PS4 動作冒險遊戲《Rise of the Tomb Raider: 20 Year Celebration》係 PS4 Pro 上面畫質強化模式技術。

今次條片係由開發團隊 Crystal Dynamics 首席技術長 Gary Snethen 講解。根據官方資料，Ps4 Pro 將會大幅提升圖形處理效能，可以 Boost 到 4K 解像度之外仲會提高 Fps，咁當然就唔會又 4K 又 60 Fps 咁啦，發夢無咁早，主要會有 3 種畫質強化模式，分別為：

• 4K 解像度模式：遊戲將會以 4K 超高解像度 30 fps 呈現，必需配搭 4K 顯示器
• 高流暢度模式：遊戲將會以 1080p (Full HD) 解像度 60 fps 高流暢度呈現，必需配搭 1080p (或以上) 顯示器
• 高畫質模式：遊戲將會以 1080p (Full HD) 解像度 30 fps 流暢度及更豐富逼真視覺特效呈現，必需配搭 1080p (或以上) 顯示器

♦ 一般 PS4 係以 1080p 解像度 30fps 基本畫質呈現

咁除咗基本畫面靚咗流暢咗之外，遊戲仲做咗其他強化，加強磚塊、岩石地形等等多邊形物件細緻度既硬件多邊形鑲嵌技術 (Displacement Maps and Tessellation)、全新濾鏡提升不同角度材質貼圖紋理效果 (Anisotropic Filtering)、豐富植物同樹葉動態表現 (Additional Dynamic Foliage)、加大細節層次及遠景細緻度同畫質(Level of Detial)，將過場動畫入面高品質毛髮表現導入實際遊戲 (Cinematic Hair) 等等一堆野。

咁講完一堆官方野之後，官方似乎無打算出 Patch 解決國語語音+繁中字幕呢樣野，蘿拉講國語都真係幾難頂 (原來新 patch 1.06 已經新增英文語音，多謝網友 Joe Wong 提醒！)。另外講返畫質方面，話就話有 4K，但係特效全關+30 fps 個人黎講就覺得有小小取巧，而且係無講過會鎖 fps，預料佢一多野運算就會 Drop。當然又唔係一無是處既， 高流暢度模式同高畫質模式呢 2 樣野都非常可取，如果想體驗下 30 > 60 fps 既分別我教大家一個好簡單既方法，拎隻 Divison 出黎，玩一陣轉 Rainbow 6，你就明我講乜架啦。