《Doctor Strange》上映幾日，普遍評語都算收貨，我同阿九都覺得畫面效果好正，影評可以去年呢度睇，但故仔以及人物描寫都略有參差，相對於先前嘅《Ant-Man》真係比下去，但我都睇完狗衝去訂 Hot Toys 嘅 Doctor Strange~

《Doctor Strange》一如以往 Marvel 系列，電影?面都暗藏大量彩蛋，以下內容有大量劇透，未睇戲嘅可以去呢度睇番懶人包預習先~

1. Doctor Strange 醫院同事 Dr.Nicodemus West 唔係笳哩啡

電影開頭協助 Doctor Strange 做手術嘅 Dr.Nicodemus West 其實係漫畫版( 2007 年出版 《Doctor Strange OATH》)有相當重嘅戲份。


漫畫中，Dr.Nicodemus West 為咗醫 Doctor Strange 雙手都有去卡瑪泰姬 (Doctor Strange 拜師地方)跟 Ancient One 學祕法，最後仲想運用祕法係醫學上，但係電影版中就冇交代咁多。

2. Doctor Strange 揀手術嘅彩蛋爭議

電影開頭 Doctor Strange 開車去參加醫學會議，揸車途中有電話打黎問佢接邊單手術，手術個案中佢拒絕咗一個因爲進行軍事機械實驗而令下半身癱瘓嘅35歲軍人，相信唔少人包括我都以為呢個病人就係《Captain America 3 : Civil War》 中受重傷嘅 War Machine。

但事實係另有其人，Doctor Strange 拒絕嘅病人其實係《Iron Man 2》裏面 Tony Stark 係法院揭發軍事實驗，當中有一幕講述軍人進行實驗個陣比裝甲扭斷咗條脊椎，果位下半身癱瘓嘅35歲軍人就係佢。

導演 Scott Derrickson 亦都係網上留言解釋呢個彩蛋唔關 War Machine 事。
3. “王”嘅老豆都出現係電影 !?

電影講到 Doctor Strange 遇見 Ancient One 陣，身邊有位斷咗手嘅法師 Hamir。

佢係漫畫裏面其實係”王”嘅老豆，但係電影裏面就冇交代佢哋嘅關係。

4. 忠於原著嘅手術室場口

電影中段 Doctor Strange 因比 Kaecilius 插傷，用傳送魔法飛番醫院搵 Christine Palmer 求救，Doctor Strange 靈魂出竅教 Christine Palmer 幫自己做手術，呢個情境其實係 2007 年出版嘅《Doctor Strange OATH》裏面已經出現過。

5. 神秘手杖原來關 Spider-Man 事 ?

電影尾段”王”準備去香港至聖所抵抗 Kaecilius 襲擊，手上揸住嘅神秘手杖其實叫 Wand Of Watoom ，可以用黎開啟傳送門。係漫畫裏面 Wand Of Watoom 係連繫 Spider-Man 同 Doctor Strange 嘅關鍵道具。

6. 最終 Boss 其實係 Benedict Cumberbatch

電影尾段 Doctor Strange 迎戰 Dormammu，Dormammu 面相其實都係由飾演 Doctor Strange 嘅 Benedict Cumberbatch 透過 motion capture 而完成的，換言之，佢係自己打自己 XD

7.  Doctor Strange 大機會出現係《Thor 3 : Rangnarok》
之前流出一張《Thor 3 : Rangnarok》劇照，見到Thor揸住一張寫住 Doctor Strange 喺紐約嘅至聖所據點地址。

再加上電影完結後出現有關 Doctor Strange 同 Thor 嘅對話片段，Doctor Strange 主動開口話幫 Thor 揾佢老豆 Odin，推測 Doctor Strange 會出現係《Thor 3 : Rangnarok》。

8. 片尾 soundtrack 含高濃度 Sherlock 味道

Benedict Cumberbatch 之前飾演 Sherlock 人氣急升，今次係《Doctor Strange》裏面都 feel 到 Sherlock 嘅影子，特別係片尾 soundtrack 同 Sherlock 嘅 theme music 都極為相似，唔通呢個係 Marvel 嘅刻意安排 ?