《Black Mirror (黑鏡)》呢套用科技嘅進步去講懸疑驚慄嘅劇其實都去到第三季，喺 Netflix 上架都好幾星期，要追要睇嘅都應該睇左，所以今次係介紹比未接觸過嘅朋友去感受一下。

今季同前兩季最大嘅分別就係冇左佢獨有嘅原創同英倫味道，換嚟係易入口嘅荷里活味道。冇計，由英國嘅 Channel 4 轉為 Netflix 製作，但的確畫面係豐富左好多，但以上都唔係今次想分享嘅重點。

第三季頭半嘅《Black Mirror》(第三季總共有十二集，2017 年會播出剩低嘅六集)，竟然有一半嘅集數不約而同同 VR 系統有所關連，無可否認近年 VR 熱潮絕對影響全球，而《Black Mirror》呢系列劇本來就係好似科技版伊索寓言。

而且當中嘅第二集”Playtest (終極玩家)”更直接係講 VR 遊戲。故事就係講述喺環遊世界途中嘅 Cooper ，喺偶然機會下成為一個開發中遊戲嘅測試玩家，呢個「史上最個人化生存驚慄遊戲」究竟帶比佢有咩不可思議嘅體驗？

如果有玩過《P.T.》、《Silent Hill》又或者《Resident Evil/Biohazard》，咁劇中所描述嘅遊戲《Harlech’s Shadow》相信你一定 Feel 到「有啲野」！

一個以自己名做遊戲製作公司嘅，除左小島神之外我諗都冇其他公認嘅天材啦。

如果大家再回想呢一兩年，由小島嘅《P.T.》到《Kitchen》再到即將發售嘅《Resident Evil 7》，再睇返呢個故事比大家嘅「寓言」。VR 嘅發展將會分唔到真實同虛幻，甚至可能死左都唔知自己死左……

諗諗下都真係會寒一寒。

其實今輯《Black Mirror》仲有好多關於「遊戲」嘅元素喺唔同集數當中。主因係同製作人 Charlie Brooker 有好大關係。是關佢廿幾歲開始喺英國遊戲雜誌《PC Zone》做編輯，之後喺 BBC 電視台主持過 Game 評節目《Gameswipe》，2013年仲拍左套叫《How Video Games Changed the World》嘅紀錄片。

WOW！

依家有套劇比佢揸旗，佢仲唔玩到盡！

How Video Games Changed the World Documentary from Bailey Rocher on Vimeo.

總括嚟講今季頭呢六集絕對啱打開機嘅大家胃口，如果你打機打到悶想搵啲野刺激下自己，開個 Netflix 搵呢集嚟睇下。

P.S. 呢集入面仲有好多關於遊戲界嘅彩蛋，唔知你又搵到幾多。