推出咗幾日既《Dark Soul 3：艾雷德爾之燼》成功地又掀起一次熱潮，街舖直頭話好多人搵返 DS3 隻碟黎買添。咁今次個 DLC 雖然重點係落係 3 vs 3 PVP 度，但係基於 Lag 關係所以大部份人都係著重於新地圖同新 Boss 既內容，個人黎講就對今次既 DLC 係有少少失望。

要進入 DLC 世界先要到淨身小教會傳點，會發現多咗個 NPC 趴咗係地下度自 HI，過去同佢對話之後就會正式進入新地圖「艾雷德爾」。入到新地圖之後就會發現周圍都係冰天雪地，能見到低，有啲似以前既「迷霧森林」。不過行多幾次之後就發現其實地圖構造非常簡單，呢點就比較失望啦。

周圍能見度低，但係地圖結構簡單

新地圖入面既卒都係屬於高難度低回報，並唔係刷魂既好地方，而且裝備掉落率都頗低下。而比較驚喜既係人型類敵人保持到一貫 DS 夠難既水準，當中既巨斧騎士更加係全 DLC 入面最勁既敵人，雖然打贏佢既回報係極低，但係打贏咗之後「Yes!!!」果下已經值得啦 (雖然 Loot 果陣會講粗口)。可惜既係新怪接近全部都可以用魅惑、隱身 Set 又或者出血類武器輕鬆玩，緊張感立即大跌。

魅惑同隱身係新地圖簡直係神技

全DLC 最強敵人，就咁睇算啦，我淆底唔敢行埋去影

新魔法方面幾招都唔覺有乜特別，反而奇蹟新技「白教光環」係類似迴力鏢咁玩 ，雖然發動慢慢地但係都耗魔低，都幾好用。咁新武器方面實用既主要有三把，分別係劍盾一體既「果敢心」，用靈魂鍊成既「芙莉德大鐮刀」，刺劍「鴉羽」。劍盾耗精低攻速快，但係距離偏短，但係 R2 距離又出奇地長，幾全面；鐮刀就距離長攻擊速度快，最勁既係佢既戰技配搭R1攻擊頻頻極高 (仲要唔扣魔)，至於刺劍「鴉羽」既戰技係掉四把飛刀出黎，PVP 有突襲幾有用，呢幾把都係屬於比較可用既類別。

新奇蹟「白教光環」有二段攻擊判定

「芙莉德大鐮刀」整體性能唔錯

「果敢心」突刺距離中等

好啦大家最關心既 Boss 部份，先講守墓者。一開始戰鬥會帶幾隻護主犬出現，當守墓者血淨三份一左右就會 Call 佢主人「」出黎，基本上有玩過 DS 1 / DS 2 既朋友都唔難應付，始終比起舊果 2隻大狼呢隻太削啦，應該可以輕鬆贏。而 DLC Final Boss 芙莉德修女 BB 係屬於速度型 Boss，移動速度極快，而且去到第二階段仲會有後面既「神父」幫手，單打既話都幾有難度，完全比到我一代肥瘦二人組既壓迫感，滿分！

今集大狼，都幾弱下

真正有難度最終 BOSS 芙莉德

總結：

對於主要想玩 PVE 既玩家黎講應該有一種到喉唔到肺既感覺，除咗地圖細怪物少之外，故事內容相信睇完你都會講聲「jomud9」！暫時見唔到同主線方面既關連係邊度，而且追加既法術同武器亦都唔係話有咩非常特別既存在，幾雞肋下。但係對於想挑戰難度既玩家都有一定吸引力，除咗 Final Boss 芙莉德真係有挑戰性之外，新追加既 3 vs 3 PVP 亦都非常好玩，比較建議未買既朋友而又想試既直接買 Season Pass，相信故事同不足既部份會係下個 DLC 補完，話晒之前既 DLC 都叫交到功課嘛！