《(Doctor Strange) 奇異博士》睇完第一時間想分享比大家我嘅觀後感，但諗左好耐亦同同事傾左好耐發覺，我諗唔到點講出嚟。

首先不如大家睇多次條預告先

點解叫你地睇多次？因為成套戲接近無乜野喺預告中保留，你睇晒成個故事啦！

其實大家睇咁多年 Marvel Studios 嘅電影，每個角色第一部都唔會特別多複雜嘅劇情，咁快手講下啦：

一個自大輕狂罔嘅天材醫生炒大車跛雙手，想醫又醫唔返從此無得威，聽人講尼泊爾有人識醫就飛去醫，去到見到話學氣功有用，佢死唔信比人打到靈魂出竅落返嚟就死死地氣信，練下練下又比佢學晒啲野仲識埋禁術。咁啱奸角出現要打晒啲神壇就可以滅世，諗返開頭都只係想醫手，呢啲野唔關我事！後尾又覺得學左法 Great Power Comes Great Responsibility 嘛，咁不如幫手打大魔王啦，搞掂贏左收工散場！

~完~

其實故事冇咩可以再討論(除非你想我劇透所有情節！)，劇情流暢爽快嘅，而且畫面真係一絕。大場景真係可以用美侖美奐嚟形容(IMAX效果更佳！)，大家喺預告見到如 Inception 整個城市反轉再反轉嘅情境，又有好似 Interstellar 萬花筒嘅多維度空間，當中仲有尾聲嘅決戰場景都算跳出現有大家所想像嘅模式，視覺響受絕對滿足。

人物嘅刻劃反而係相對太表面，Mads Mikkelsen永遠眼濕濕但唔知點解想喊、Tilda Swinton就平如機械人一樣。戲中不得不彈嘅一個細節係 Doctor Strange 嘅雙手。大家都認同 Benedict Cumberbatch 係好戲之人，但今次作為一個雙手接近殘廢嘅人竟然時好時唔好，呢個都唔知係演員定導演問題。

(謎之聲：頂你！睇戲就專心劇情啦，睇對手！)咁我都講左其實劇情都冇咩可以講啦，咁留意下細節啫…..

最後片尾彩蛋總共有兩個，當中第一個係有關 Thor: Ragnarok，而第二個就係 Doctor Strange 第二集嘅伏線。不過等唔到第二個片尾都唔緊要，因為唔睇都冇大損失。