而家既 VR 市場主要係由 PS VR、HTC Vive同買 Oculus Rift 三分天下，不過黎緊可能會有巨變啦。事源琴晚既 Microsoft 發布會入面，Microsoft 宣布為咗配合「Windows Creators Update」佢地將會推出 Window 10 用既 VR 裝置，而且仲要係用超低既定價 $299 美元就有交易，吸引力極高阿喂！

今次呢個 VR 裝置係由HP、Dell、Lenovo、Asus同Acer 五間廠以 OEM 方式共同供應，雖然詳細 Spec 就無講到，但係就透露咗佢係內置咗六軸感應器，而且唔需要額外安裝同定位，只要配合你部 Win 10 電腦同小量既空間就可以玩到，完全係蔗渣價錢燒鵝味阿……。

有埋虛擬實景玩添

咁上面講到今次既「Windows Creators Update」雖然主要係做一啲 3D 化既內容，即係例如開 MS 瀏覽器 Edge 阿，小畫家 3D 都會用到之外，就算上網買傢俬都可以透過 Edge 去 Click 啲貨，然後就會直接變成 1:1 咁大既 3D 模型比你慢慢玩，唔想買野既話旅行你啱啦掛？配合埋 HoloTour 呢個程式就可以直接去世界各地景點參觀，完全做到足不出戶環遊世界阿，講起都覺得自己毒！

HoloTour 足不出戶遊世界，Yeah！

今次真係網購新體驗

小畫家 3D 可以將 2D 相既一部分變成 3D，而且係 PowerPoint 可以 Insert 3D圖啦

咁大家最關心既當然係 Game 果 Part 啦，暫時最關事既得 2樣野，一個就係 Win 10會全面支援 4K 既遊戲體驗，另一樣就係 Creators Update 會直接有埋互動直播平台「Beam」，玩家除咗可以透過「Beam」直播打機以及同其他玩家互動，呢點睇落就同 Twitch 無乜分別啦……叫做有小小新野既就係可以通過 Creators Update 既Xbox去自訂定比賽咁囉，不過 Win 10 平台有咁強大既遊戲陣容，我又唔擔心之後既發展，點都好今次 MS 推出一系列既更新相信其他幾家廠都會嚴陣以待，對玩家點都有著數既。