今次呢個消息真係令人幾振奮！一直被人詬病既二隻格鬥大作《KOF 14》同《SFV》都並無出街機版，變相導致格鬥風氣無早年咁盛行，不過相信好快就會有轉變啦，因為 SNK 同 CAPCOM 都不約而同咁係同一個星期發布呢個消息 – 《KOF 14》同《SFV》將會回歸街機市場！！(雖然街霸個回歸有少少搵笨)

今次既消息啱啱打完既《闘神祭2016》上面公開既 (闘神祭係日本一個街機限定比賽，今年有 SF4同KOF13比賽項目)，係完結既時候由二隻遊戲既開發人員宣佈係明年街機就會玩到最新版本既《KOF 14》同《SFV》！但係呢就唔好咁開心住，因為二隻 Game 登陸街機既本質係唔一樣的！

先講 KOF，KOF 街機將會使用「Nesica x Live2」系統，呢個系統係早幾年日本街機市場用緊既「Nesica x Live」強化版。咁呢個系統係可以進行街機對街機網上連線對戰既，但係根據日本玩家既資訊黎講，呢個 System 都有幾多 Delay，所以其實都廢廢地。而今次呢個「Nesica x Live2」就宣稱係技術上面有突破，將會進一步降低 Delay，而且唔單止可以街機網上連線，仲可以跨平台玩，即係可以 PS4 vs 街機！

而今次 SNK 擺明係抱住必勝既心態出手，除咗用《KOF 14》黎做「Nesica x Live2」既護航作品之外，佢地係市場上面亦都採取極進取既做法，甚至不惜賺少啲都要搶到個市場！事關「Nesica x Live」呢套系統係要拆帳的，例如你入 100 日圓，咁入面 50日圓就歸機舖、30 日圓就歸提供技術既 TAITO、最後 20 日圓先歸 SNK，而且部份地區既比例仲會再調整添！基本上 SNK 既策略係就算賺少啲我都要普及化隻 Game。

咁到 Capcom 又點呢？綾野智章就講話：「我地將會令到街霸 5 合法咁係機舖玩到。」

講到話要合法係有原因的，其實日本街機市場係有法律所規範既，對於 PC、街機、家用機既服務範圍都有相應既規定，唔係你話點就點。而且 Capcom 從來都無開發過自己既街機框體，即係要用人地既野啦，咁日本格 Game 既慣例就係用 TAITO 框體，Capcom 既算盤就係打算係街機入面內置部 PC 裝 SFV，所以佢地需要 TAITO 肯比佢地咁做先得。

不過今次 Capcom 都係被逼之下出招，話說係世界各地《KOF 14》都有超越《SFV》既跡象。除咗有唔少名人都會打埋 KOF 之外，SNK 係《KOF 14》宣傳策略上面亦都係針對住《SFV》黎打，基本上《SFV》邊 Part 做得唔好佢就宣傳自己邊 Part 做得好，咁既情況下世界各地既輿論傾向對《KOF 14》有利同增加咗信心。如果係日本《KOF 14》重臨街機市場而《SFV》無既話，係之後應該都唔洗爭架啦……鬼叫你隻 Game 做得唔好而家咪比人追上黎囉。

總括而言，對玩家黎講就一定係好事，有街機自然會多咗人玩，風氣亦都吹得勁啲，當然最緊要係個連線搞得掂，唔係講乜都徙氣！