摔角 Game 係香港黎講同其他運動 Game 比不嬲都幾弱勢，雖然《WWE 2K》系列不嬲都有班 Fans 支持，但係除此之外就甚少人去嘗試 (包括我！)。咁啱今年就有二位香港人打到入去 WWE 呢個世界舞台，令我認識到 John Cena 之外既摔角手 (咁我唔係 Fans 嘛！)，加上《WWE 2K16》既好評價所以嘗試落坑！另外因為我唔係 Fans 既關係，就算官方講到水蛇春咁長既明星名都唔關我事，所以如果閣下係《WWE 2K》Fans 既就可以上一頁啦。

前面有講過啦，我唔係 Fans，我係抱住試下新野既心態玩既，老實講呢隻 Game 既基本功非常之紮實。人物模組做得非常之靚，面相極似真人；動作表現又無偷雞，好流暢！甚至每個角色出場都有自己專屬既出場表演同音樂，好鬼過癮！

你睇下幾似真人 (呢個堅係真人黎 LOL)

人物面相做得好精細

咁去到對戰部份又係幾搞笑，你以為上咗擂台先開始打阿？少年你太年輕了，原來係對面仲做緊出場表演果陣可以過去挑釁佢，跟住直接開波！而且呢隻 Game 除咗係台上打之外仲可以打到落觀眾席同後台，成件事好歡樂下。

打到入房都得！仲要可以執野打人

對手出場時可以挑釁佢，直接落佢面！

打到入觀眾席，可惜既係觀眾做得有少少流

好啦，咁正式埋牙打又點呢？隻 Game 既打擊感非常有 Feel，撻人落地果下真係睇都覺得痛！值得一讚既係，每個角色都有大量既投技派生 (雖然我出唔到)，但係靠果幾招投同鎖技都贏到人，呢點真係要讚下個遊戲系統！遊戲透過唔同既鎖技同投技會出現多種 QTE 玩法，基本上都幾易理解，就算係記招表苦手都唔會話完全無還手之力，所以我都玩得幾愉快。

因應唔同既招式會有唔同既 QTE，都幾考反應同心理

至於捱打果一方面主要既反擊手段就係撳 R2 黎 Counter，不論對手既攻擊係格鬥、投撻等等都係靠 R2。不過每次反擊提示時間都極短，大約只有半秒左右反應比你撳制，堅難！而且血條下面係有反擊數量計，如果下下都反擊失敗就會無晒氣然後比人撳住黎打，所以就算有一時既優勢都係甜頭黎，掌握到反擊先可以笑到最後，就咁睇反擊系統雖然簡單不過就非常考玩家反應同經驗啦！

出現時間極短既反擊提示，要好好掌握反擊時機先有得贏

有晒教學啲招點出 (不過我出唔到)

遊戲模式黎講都幾豐富，基本既 1 on 1已經有幾款，2 on 2 當然都有啦，仲有鐵籠殊死戰玩添。除咗呢種基本對戰之外，仲有個叫「My Career」育成模式，呢個 Mode 入面著過既衫、打過既比賽、甚至講過既野都會對之後既生涯做成影響，最正既係呢個 Mode 入面係有得同人玩鬧交，夠精彩既話 Renee Young 既專訪就會有更多正面評價！！另外仲可以訓練你既角色既，而且除咗一般既比賽之外仲可以同其他角色組成雙打團隊，喂都幾多野玩！

遊戲模式極多，基本上講得出既都有

2 vs 2 困獸鬥

當然唔少得女子 1 on 1

爬梯搶野戰，呢個 Mode 幾好玩，可以係咁掃人落梯

有得玩鬥寸咀，幾過癮

最後不得不提既就係呢隻 Game 既捏人 Mode，人物參數係估佢唔到咁多，連體毛都有得 SET ！如果大家玩 Dark Soul 捏得好開心既話，咁玩呢隻我諗你玩捏人都可以玩一日……。

你睇我整到咁樣衰都得

總結：

對非 Fans 黎講呢隻 Game 可以話係幾過癮，打擊感做得好基本上已經贏一半。而且 2K 係呢隻 Game 系統上面對新手都幾體貼，起碼唔會話難到無從入手但又唔會易到 SFV 故事模式咁得啖笑，都叫做拎到平衡。再加埋個育成模式其實隻 Game 係幾抵玩的，唔啱射擊 Game，不妨試下，都幾耐玩。