極高人氣既電影《飢餓遊戲》相信好多人都睇過啦，但係一直都無返隻有差唔多元素既遊戲出現，不過係 TwitchCon 上面就公布咗呢隻由 Amazon Game Studios 開發既新作《Crucible》，佢地係用咗《飢餓遊戲》咁上下概念黎做呢新遊戲，雖然暫時資料唔多但係絕對值得期待！

《Crucible》呢隻 Game 基本上話就話係 6 vs 6既第三身射擊 MOBA 類型遊戲，有小小似我地之前介紹過既《Paragon》，但係如果以為係咁簡單我就唔會寫比你睇啦！

遊戲本身設定就係外星世界，話就話 6 vs 6，實際上呢12位場上既玩家係要以係呢個世界生存到尾為目標，所以作為呢個星球既異類 (即係玩家阿)，係要共同對抗外星人既！但係當有資源既時候呢 12條友就要爭餐死啦，玩家可以隨時同其他玩家結盟，或者適當時候就放你隊友冷箭背叛佢，而且可以係遊戲進行途中換隊，真係唔知你隔離條友係幫你定等緊殺你執骨！

以為咁樣就叫《飢餓遊戲》Feel？呢隻 Game 係有第13人既設定！第13人係擔任掌控者既角色，係一個類似遊戲設計師既角色。

因為呢隻 Game 係會同 Twitch 連動遊戲實况，所以當掌控者呢個角色加入既時候，佢可以就觀眾既反應做互動，係場上觸發唔同既遊戲事件、劇情甚至加入各種道具影響戰况！呢個設定會令到成隻 Game 唔只睇果 12條友打打殺殺，掌控者點樣玩弄果班友從而吸引觀眾視線亦將會充滿學問！

暫時宣傳影片入面見到角色之間係有種族之分，到時應該會跟唔同族有唔同天賦技能咁，而本作使用「Amazon Lumberyard」遊戲引擎，除咗可以同 Twitch 連動外，佢仲 Support Oculus Rift 同 HTV Vive，即係話做 VR 都唔係問題！《Crucible》暫時未公布上市日期同平台，期待住先啦！

回帶相關文章：

[PC/PS4共通] 推介！全新3D的MOBA遊戲 – Paragon！