繼甲賀忍蛙後，我哋今次嚟介紹另一種輔助型Pokemon。
No. 591_使用率前五嘅干擾手，暴露菇
暴露菇（モロバレル Amoonguss），草系／毒系Pokemon，第五世代嘅出現後引發起大量平衡調整嘅Pokemon ；種族值屬於慢速平衡型，生存力高，攻擊力中等，有住相當豐富嘅干擾同輔助技；特性分別都係干擾能力十足嘅孢子（ほうし Effect Spore）：被近身攻擊時，對方有30%機率陷入異常狀態；以及強化回復力嘅再生力（さいせいりょく Regenerator）。兩個不同特性配合干擾力十足嘅招式組合，足以令佢成為令人無法無視嘅干擾輔助型Pokemon。
根據統計，暴露菇於ORAS嘅雙打賽係咁嘅：
招式：
99.5%會用 蘑菇孢子（キノコのほうし Spore）：草系變化招式；－－威力；100命中；使人陷入睡眠；粉末系招式。
99.4%嘅會用 忿怒粉末（いかりのこな Rage Powder）：蟲系變化招式；－－威力；－－命中；先制＋２；本回合進入集火狀態；集火狀態下，敵全體嘅單體招式目標會導向自己；粉末式招式。
79.9%會用 保護（まもる Protect）：普通系變化招式；－－威力；－－命中；先制＋4；抵擋一回合攻擊及變化招式；連續使用成功率會逐次減半。
76.5% 會用極級吸收（ギガドレイン Giga Drain）：草系特攻招式；75威力；100命中；回造成傷害一半。
15.2%用淤泥爆彈（ヘドロばくだんSludge Bomb）：毒系系特攻招式；90威力；100命中；30%使對象中毒。
招式因應定位，基本上係固定嘅。少數人會為咗打面而改用一招詐欺（イカサマ Foul Play）：惡行系物攻招式；95威力；100命中；使用對象物攻代替使用者物攻計算傷害。
裝備：
81.7%為 岩石安全帽（ゴツゴツメット Rocky Helmet）：裝備時受到近身攻擊，攻擊方損失1/6嘅最大HP。
4.9%為 黑色淤泥（くろいヘドロBlack Sludge）：裝備丈為毒系時，每回合回復1/16最大HP；否則每回合損失1/8HP。
4.9%為 心靈藥草（メンタルハーブMental Herb）：當陷入精神系異常狀態時，解除並消心靈藥草。
由於招式應用上嚴重傾向使用忿怒粉末，所以大部份玩家都會使用岩石安全帽。其他兩項裝備為強化生存力，特別係配合寄生樹種子時用嘅黑色淤泥；以及為咗避免一旦被挑釁就無力化嘅心靈藥草。
特性：
88.4%為再生力。提供換出即等於回復1/3最大HP嘅生存力。
11.6%為孢子。進一步強化集火嘅作用。
蘑菇孢子（キノコのほうし Spore）：
100命中嘅催眠，蘑菇型Pokemon特有招式。干擾型Pokemon需要一招極具威脅嘅控場招式先算得上優秀，而蘑菇孢子絕對係其中一招。但凡見到蘑菇型Pokemon都會防範，更何況係暴露菇。呢一招會逼使對方要小心處理暴露菇。但由於第六世代引入粉末招式嘅概念，蘑菇孢子對草系Pokemon、特性：防塵或裝備防塵眼罩嘅Pokemon都無效，呢點要小心注意。
忿怒粉末（いかりのこな Rage Powder）：
極具威脅嘅控場招式之二。使用後，當對方本回合缺乏範圍攻擊手段，就等同於為旁邊嘅Pokemon爭取咗一回合嘅自由行動。但與蘑菇孢子同樣，因為係粉末招式，小心對草系Pokemon、特性：防塵或裝備防塵眼罩嘅Pokemon都無效。
保護（まもる Protect）：
由於忿怒粉末嘅關係，對方可能會選擇優先集火暴露菇以優先將控場干擾手清除，而保護就會喺呢個時候起到將計就計嘅作用。玩得單擋干擾，甚至Pokemon Battle，你唔係打算唔練好先讀嘛？
極級吸收（ギガドレイン Giga Drain）：
攻守一體既招式，亦係一般隊伍內用嚟對抗水/地系Pokemon既貴重草系招式。當陷入最單對單既狀態，你會發現呢招將屢建奇功。當你隊伍真係需要一招草系招式時，唔好猶豫。
淤泥爆彈（ヘドロばくだんSludge Bomb）：
用以反制唔受粉末招式影響嘅草系Pokemon，同時能對熱門嘅妖精系Pokemon作出有效傷害。不過對付鋼系無效呢點，令佢即使用齊上面所有既招式，都根本無法威脅No.598堅果啞鈴（ナットレイ Ferrothorn）。
作為輔助干擾手，當然要講屬性聯防嘅隊友Pokemon。而隊友選擇，愈傾向普通而強大愈好。
N.115袋獸（ガルーラ Kangaskhan）：
講到普通而強大，當然唔少得我攻略嘅起點，天梯賽嘅及格線－袋獸。為袋獸吸引火力，而袋獸同時作出大額嘅單體傷害。用盡你嘅先讀，直接突破就可以。
No.458 席多藍恩（ヒードラン Heatran）：
暴露菇對應席多藍恩最怕嘅地系、水系、格鬥系。水系、格鬥系可以用忿怒粉末將攻擊引過嚟以傷害減半嘅情況去做肉盾頂咗傷害；地系就要小心地震，先等席多藍恩保護一個回合，暴露菇去催眠咗先作下一步行動。相對地，席多藍恩嘅存在令對方唔敢輕易放出火系嘅熱門招式熱風，因為一放就等於將席多藍恩嘅火系招式1.5倍；同時間席對藍恩對冰系同粉末攻擊影響唔到嘅草系，有絕對嘅壓制力。所以佢哋兩個本身都係一個相當優秀嘅聯防，同場出現嘅排名亦相當高。
No.282沙奈朵（サーナイト Gardevoir）：
使用嘅理由同袋獸差唔多，都係普通而強大。MEGA後，165嘅特攻值加上特性：妖精皮膚（フェアリースキン Pixilate）：普通系招式變為妖精系招式，並1.3倍威力；促使沙奈朵可以用高音（ハイパーボイスHyper Voice）就可以有117威力嘅妖精系範圍攻擊。保護好肩負起義務（Gardevoir嘅詞源）嘅女王，就係暴露菇成為騎士嘅責任。(笑
另外仲可以讓沙奈朵學習欺詐空間（トリックルーム Trick Room）：後制-7；5回合內，行動次序倒轉為速度愈慢愈優先。沙奈朵本身為不上不落嘅80速，強行搶速度根本唔化算。但暴露菇係30嘅低速，只要捉啱時間，就會變成暴露菇可以隨時催眠任何對手嘅狀態。
滅亡之歌（ほろびのうた Perish Song）隊：敵我全體不論狀態，進入滅亡之歌狀態；滅亡之歌狀態為倒數三回合，三回合後陷入不能戰鬥狀態；換出可解除。可以參考上一篇塌塌米型甲賀忍蛙去支援。主要就係保護滅歌手同時喺適當時刻換出，有再生力嘅暴露菇亦都非常配合減歌隊打法。
對策一，防粉措施。
暴露菇成個作戰機制，都係環繞招式孢子、忿怒粉末。只要所用嘅係草系Pokemon、裝備有防塵眼罩、特性防塵嘅Pokemon就基本上乜都唔洗做就封鎖咗佢嘅作用。
對策二，挑釁封鎖。
與對策一相似，都係要破壞暴露菇嘅干擾及支援能力。使用招式挑釁，令到暴露菇於三個回合內，陷入「不能使用變化招式」嘅狀態。不過要小心如果對方裝有心靈藥草，就要再多一次嘅挑釁先有效，並畀佢有一個催眠我方嘅機會。
對策三，範圍攻擊
由於佢嘅作用主要係忿怒粉末嘅集火。範圍攻擊就令佢保護唔到另一隻同場Pokemon，但要記住，範圍攻擊嘅同時，要留一隻去攻擊暴露菇以防止佢有餘力去催眠我方（除非肯定對方攻擊手都清除晒啦）。
第五世代出現嘅佢，幾乎全面取代巨菇蟲嘅地位，無咗4倍傷害呢啲缺點後，將粉末系干擾手推上過強嘅水平。最終於第六世代，加入粉末系招式嘅概念，加入一種天敵般嘅對策，先可以抑止暴露菇嘅強橫。嚟緊日月版會加入亞羅拉形態，唔知巨菇蟲會唔會都有亞羅拉形態以改善被取代嘅情況，或者巨菇蟲中譯取音譯派拉斯特都有啲眉目。
回帶相關文章：
《Pokémon天梯入門》變幻自在嘅人氣主角－No.658 甲賀忍蛙
《Pokemon XY》400小時遊玩時間，天梯賽1700以上嘅非專業玩家。閒時會寫下嘢咁