早排成日比一小班人話杯葛既任天堂，係琴晚既線上發表會入面就正式公佈咗經典大富翁遊戲《桃太郎電鐵》新作《桃太郎電鉄 2017 たちあがれ日本！！ (桃太郎電鐵 2017 奮起日本！！)》既消息！對上一隻已經係 2010 年係 NDS 上面推出既《桃太郎電鐵 世界篇》，《桃太郎電鐵》正式復活呢個消息真係令人非常振奮！

點解咁振奮呢，係呢度真係要回少少帶。

事源係 311 日本大地震後，原本預定係 Wii 上面推出的《桃太郎電鐵 2012》因為東北地區災情嚴重，令到製作人佐久間晃係製作地圖時感到非常不捨，而且坊間亦都估計係為咗避面衰神系事件引發社會不滿而宣佈遊戲中止發售，而佐久間晃亦都公開同玩家約定，等東北地區開始復興之後就會以「東日本復興篇」為主題推出新作。

睇落去無乜野呢？但係半年之後情況就出現巨變，係 2011 年果陣，《桃鐵》系列原製作公司 HUDSON 正式成為 KONAMI 子公司，而因為準備隔年就要比 K社吸收合併，所以係 2011 年中到 2012 年之間，有好多原 HUDSON 員工離職，就連高橋名人亦都係 2011 年 5 月果陣離開 HUDSON 既。咁同《桃鐵》又有乜關係呢？係 2011 年 8 月果陣，佐久間晃就曾經發表過「 HUDSON 內部亂到仆街，根本都唔知邊個話得事，《桃鐵》已經放置 Play 咗成半年有多，睇個勢應該會直接 GG 架啦，如果演變到咁既話就真係非常之對唔住大家！我好想東日本復興篇啊…」

《桃鐵》之父佐久間晃

時間推到去 2011 年底既時候，由於《桃鐵》系列製作班底差唔多全數離職，於是佐久間晃就係一次 NICONICO 直播節目入面，首次公開宣言為《桃鐵》系列劃下句號。而根據佐久間晃既說法，成班製作班底幾乎都係因為不滿 KONAMI 而離職，當然不滿既亦都包括佐久本人。

本身已經話唔再做《桃鐵》既佐久，係今次既線上發表會入面透露透過信件佢聽到大量好想見到《桃鐵》新作玩家既心聲。因為咁同大家分別咗 6年既《桃鐵》新作就再度復活啦！

今次除咗有《桃鐵》之父佐久間晃親自領軍製作之外，仲有過去曾經參與《桃鐵》系列製作既桝田省治一齊開發，咁當然唔少得大家熟悉既漫畫家土居孝幸啦。

今次既《桃太郎電鐵 2017 奮起日本！！》，將會預定係 2016年冬季發售，而遊玩平台就係 3DS。