韓國首部喪屍片《屍殺列車》叫好叫座，我就麻麻地套戲，咁啱得咁橋，獨立遊戲公司 tinyBuil 就推出有喪屍，又係發生係鐵路上嘅遊戲 – 《The Final Station》。
《The Final Station》係一隻8 bit 風格嘅鐵路生存遊戲，故仔講未來某一日，有一種不知名傳染病令到好多人變咗喪屍，玩家飾演嘅火車司機就要開出特別列車沿途拯生還者。
遊戲每版都分探險及管理火車兩部分，故仔講述每個車站嘅軌道都係封鎖，玩家必須去車站裏面尋找密碼先過到關，軌道封鎖當然係有原因，因為每個車站都充滿喪屍，玩家可以用近攻、手槍(有限子彈)、丟擲物件及炸彈等方法消滅喪屍，途中仲要收集醫療用品、糧食及拯救生還者。
完成探險後，會進入管理火車部分，生還者會成為火車乘客，佢地都會顯示體力及飢餓度，飢餓度同受傷會導致體力下降，無哂體力會死亡，玩家要運用探險途中揾到嘅醫療用品及糧食黎維持佢地嘅生命，玩家仲要留意火車各部位嘅狀態，一發現異狀就要立即處理，否則就會車毀人亡。
《The Final Station》trailer
而家係 Steam 有 PC／Mac 版購買下載(傳送門)，遲下仲會有 PS4 及 Xbox One 版本。
幪面超人頭號粉絲，玩具figure 無一不歡，極喜歡玩潛入式遊戲。怎吃也不胖，只因最喜歡「食字」﹗人生座右銘是「自作樂，很快樂」。