講咗成2年既《NieR: Automata》，本身就淨係得 PS4 版本，不過琴日遊戲開發總監橫尾太郎就出咗條片公佈咗呢個消息，就係由 PlatinumGames 研發、SQUARE ENIX 製作發行既 ARPG 遊戲《NieR: Automata》會係 PC 平台出現，銷售平台會係 Steam ，而上市時間就同 PS4 版本相同，預定為 2017 年初。
遊戲既故事設定係地球已經比外星機械生命體占領ed，咁就有班友走佬去到月球，而呢班人就做咗隻新型人造人 2B (型號：夜刃二號 B 型)，玩家就係扮演呢隻 2B 係荒蕪既地球度做勇武抗爭，以武制暴！
咁戰鬥系統就係用前作基本戰鬥作為基礎，然後調整動作咁，都係三角三角正方正方呢類輕重攻擊，R2 就閃咁囉，而武器就會有大量，呢點唔洗擔心。比較特別既係會有舊叫「莢艙」既支援角色，佢會協助玩家攻擊，令到角色空中移動等等，官方話「莢艙」仲會有更多既野可以玩並且係會成長既，不過就未公佈得住。咁基本上我廢噏你地都夠喉架啦，不如睇下呢段打 Boss 既片好過啦！
睇完片之後相信大家都知呢隻其實係彈幕遊戲黎，除咗呢種咁有逼力既 Boss 戰之外，團隊係製作遊戲既時候亦都製作咗好多唔同既場景，例如廢棄既城市、一望無際既沙漠等等，希望令玩家感受到各個地區既景致。當然作為一隻 ARPG Game，角色成長都係好重要既原素，製作人就話咗一定有呢 Part 架啦，不過具體係點就未知。
然後呢隻 Game 最出色其中一樣就係音樂，係歐洲遊戲展 Gamescom 就公開咗由 J’Nique Nicole 同 Emi Evans 兩個版本既主題曲，喂真係淨係聽音樂都抵買啦下話……
咁相信好多人都問會唔會有中文呢，話晒去過日本領使館人地知道香港區重要嘛。咁《NieR: Automata》研發團隊係 E3 既時候就表示過會努力，希望促成繁體中文版問世，請玩家多多支持這款遊戲，不過咁好 J 無中文都照殺啦下話？ (你洗驚PC無人做 Patch？)
VJGamer總編，細細個已經蒲機舖，機齡甚深，熱愛電玩文化。