出過 World of Tank、World of Warship既 WARGAMING 本身已經係信心保證啦，咁早前佢地旗下既 WG Labs 就發佈咗呢隻《HYBRID WARS》，係由戰鬥民族工作室 Extreme Developers 同 WG Labs 共同製作既，遊戲引擎就係用 Unity，雖然暫時資料就唔多，但係就咁睇片真係幾型棍！

基本上你睇完條片係完全唔知佢玩乜春既，不過根據官方既資料就話比我地聽佢係一隻用高科技武器甚至可以揸機械人既射擊遊戲黎，咁根據往績就大規模多人對戰應該就走唔甩架啦！而根據官方提供既資料玩家可以操控既軍事兵器除咗機械人之外，仲有坦克、直升機同埋泰坦，同時玩家係可以幫自己 Upgrade 武器同埋兵器，不過我就淨係關心機械人有無得好似 Front Mission 咁完全自訂武裝同零件。

循例都要講下故事背景，故事係發生係 2060 年，人類世界因為第二次科技革命而產生巨變，地球上面所有既設施都受到嚴密監控，而係呢個無限無限蔓延城市、巨大既太空中心同埋軍事設施，都比人工智能既戰車、直升機同埋艦艇監控住，不過就無講到上網洗唔洗翻牆。

而玩家所扮演既就係三大勢力中既傭兵，透過戰鬥刷存在感之餘同時想拎返個世界既主控權。遊戲入面有八大戰場，超過 150 個挑戰任務比大家玩，咁當然唔少得既就係 Boss啦，暫時公佈係有 8 隻 Boss，睇個款係每個戰場都有隻大佬要打，遊戲暫時只會有 PC 版，預計係 2016 年內上市。

遊戲特點：

• 多人合作模式及玩法

• 長達15小時故事模式

• 擁有2個不同英雄

• 8個巨大的開放世界戰場

• 8個強大的BOSS

• 150個挑戰任務目標

• 超過20種武器

• 超過40項遊戲獎勵

• 4種可操縱兵器：坦克、機器人、直升機、泰坦

• 超過50種不同類型敵人

• 英雄、戰機擁有28個額外特殊能力。