《Overwatch 鬥陣特攻》有好多角色，各有特色，不同人一定搵到自己喜歡的人物。VJ GAMER 將會介紹唔同的角色及簡單使用心得，希望各位喜歡。

選擇角色的畫面中，已經有角色簡單分類，分別為攻擊類、防守類、坦克類、支援類。

勇武何俊仁 攔路豬 屬於泛民 係防守類，不過就無跟 Ipad比你睇咸網。

VJGame 角色評價： ★ ★ ★ ★ ✩

特色：

多數採取正面進攻，攻擊距離好近到一般近，主要攻擊手段鎖鍊鉤→近距離散彈。有大幅瞬間回血技，移動速度慢，血量 600，屬厚血續戰力強類別。

（其他防守角色，各有強弱項，敬請留意其他角色介紹。）

技能及技巧：

基本武器—廢鐵槍

子彈得 4發，分為 R2 散彈同埋 L2 射鼻屎。連射速度差，上彈慢。

R2 散彈

超近距離極高攻，可以秒殺200血角色，主要使用時間係鎖鍊鉤命中對手後，拉對放埋身時使用 (但係都要留意距離，後面再講解)。

夠近既話可以一槍秒訓練機械人

L2 鼻屎彈

射出一粒鼻屎，飛行一段短距離後會爆開，鼻屎狀態下傷害力一般，散開後攻擊力低，基本用途係散彈完對方走既時後就可以用鼻屎追擊，或者離遠威嚇對方用。

L1 鎖鍊鉤

係豬豬最主要既進攻手段，CD 5秒，彈速非常快，有小小攻擊力，正所謂進可攻退可守就係呢種！除咗可以勾遠處既敵人埋身一擊必殺外，比人打落坑既話都可以勾埋人一齊死！玩豬豬勾得準其實已經成功咗大半，當你撳 L1 出招時，係要計算埋個勾飛到既時間，大約係 5F 左右，視乎距離而有不同。另外勾中對手亦都唔係必定拉到最近的，亦都係視乎勾中對手時既距離，話晒條野唔係星雲鎖鏈黎，係有距離限制架！以中間有大坑呢個場為例，中間呢個洞既直徑就係豬豬鎖鏈最大距離，當豬豬企係洞邊係可以啱啱好拉人埋黎跌死的，多多練習就知道大約距離係邊。可以拉死人既關卡就唔係得呢關既，留返比大家自行探索啦。

攬炒之勾

大洞距離啱啱好夠拉到對面岸既人跌死

另外勾係可以向上同向下發射既，成日有人係頭頂行黎行去就拉佢落黎秒啦！另外有2樣野要避免，分別係轉角位就盡量唔好好勾，就算比你勾中都拉唔到埋黎的。另外一樣就係唔好手痕拉自爆緊既 D.Va，害死全隊就係呢種…….我就遇過啦 sosad。

害全家就係呢種

當勾中時其實係會有短時間 Stun，可以利用呢種特性黎整停一啲持續爆發傷害既大技，例如死神 Die Die Die，雷震子大絕，牛仔 is high noon 等等。

R1 食野補血

用約2秒時間瞬間回 300 血，CD 9秒，非常好用，盡量自補可以減輕補師工作，不妨多用。

大絕「噶！噶！噶！」(其實我係聽唔到佢講乜)

拎支大機槍出黎掃射，除咗會做成傷害之外仲會不停擊退敵人。個人心得係 3種地方用會收到奇效：

• 後面會跌落街既地方

因為不停擊退既關係，會射晒敵人落街

• 敵人後方有障礙物

因為後面有障礙物，會變成向上擊飛，但係距離無變遠關係，攻擊力並無因為距離而變弱，從而提高殺敵機率

• 配合俄妹TB大絕

TB 大絕特性係會啜實敵人，會抵消咗豬豬既擊退效果，所以係核心內既敵人會照單全收傷害

TB出大絕就係豬豬放招既好時機

技巧——練好眼界

其實豬豬算係易用既角色，只要練得準個勾已經可以係隻好豬，當然呢啲只係技術層面上，再深入就係點樣破壞敵陣。例如先秒對方 Mercy 或者黑鬼，呢個責任好多時落係豬豬度，所以都係果句，練好勾就成功大半。

面對某些角色要優先解決

機甲砲兵BASTION：當佢變成砲塔時對我方威脅非常大，豬豬天生係砲塔剋星，因為對方定點既關係，要勾中佢簡直無難度，最重要係當你勾中砲兵時佢係會變返做人型架！呢個時候應該2下散彈就可以 KO佢。

閃光：煩膠閃閃只要勾中就必死，問題係點先勾得中，基本上佢貼住你黎打既話開散彈仲大威脅，就唔好諗勾啦。如果佢同你打遠就要嘗試捉對方慣性，通常一般閃光都會有慣性可捉的，例如射 1排子彈閃一閃，又或者對住你連閃 2次等你捉唔到佢閃完既軌跡，呢點因為唔同機師會唔同慣性無得講，靠經驗啦！

雷震子：比較麻煩既一隻，佢飛到上最高點係勾唔到的，只要等佢高度降低先可以勾到，盡量睇對方高度黎捉啦 (捉佢落地秒好爽架！)

D.Va：無對策，對射你輸硬，執雞為上策

萊因哈特：絕對唔好手痕勾佢埋黎！勾埋黎射散彈係秒佢唔到的，相反勾埋黎對方用衝撞係確反的，唔好做傻事

總結

肥豬好易上手，但係勾唔中對方既話亦可以話係團隊既負累，因為好多時係要做到預判對手位置出手。除咗殺人之外，豬亦係有保護隊友能力既角色，例如阿源開大絕追補師，豬豬就可以用勾 Combo 化解危機，甚至1個以上敵人時係可以用大絕打散對方攻勢，除咗練習勾既準繩度之外，玩家團隊技巧都係非常緊要，因為豬豬續戰力強，好容易會玩到掛住殺人唔記得咗要幫團隊，兜後呢啲野就唔好由豬豬做喇！