話說就收到呢隻《√Letter 方根書簡》，本身就已經好期待架啦，話說而家比較少呢類遊戲，仲要有中文版。就咁睇封面如果你以為係戀愛遊戲咁就大錯特錯啦，其實佢係一隻推理文字遊戲黎，其實我平時除咗打打殺殺之外都係一個偵探黎，想一齊解謎就拿拿臨落街買啦！

咁放返條官方介紹片，故事就係講主角憑十五年前既十封信作為線索，試圖搵返自己青春時期曾經 J 過既筆友「文野亞彌」，因為當年通訊既最後一封信既內容係：「我殺了人。我必須為罪過付出代價。得要就此告別了。再見。」，為咗追尋事件既真相，主角就起程去信上面既地址探索啦！然後就發現越黎越唔對路，問問下原來個女仔一早就死咗…..咁其實主角係同緊咩人通訊呢？唔劇透啦，自己有興趣就買隻黎試下啦，我就越玩越投入啦！

咁文字推理遊戲故事當然係主菜，難得既係呢隻遊戲加入咗唔少要素等佢唔會太 Dry，呢點非常抵讚。例如主角會回憶十幾年前寫信既內容，特別之處係你可以自己揀當年寫過啲乜，例如圖示咁，可以選擇點答對方既問題，點樣反問返對方，隨之會影響結局同故事既發展，據聞有5個結局，仲要係分別都幾大的，誠意十足！

答對方問題同反問都可以由自己選擇

另一樣吸引我既就係呢隻 Game 佢主要舞台係「島根縣」，係日本真實存在架，而且當時製作團隊係成日去果度取景，務求係遊戲入面呈現返，仲要真係幾靚，搞到我想去旅行……。

咁當然唔少得既就係探索環節，有玩過逆轉裁判既應該唔會陌生。探索 Mode 會有「移動」、「詢問」、「調查」、「思考」呢幾樣，主要係透過收集資料然後進入追問環節，主要對質對象就係當年「文野亞彌」身邊既同學，然後層層接近事件真相。

探索部份

追問環節，極有逆轉裁判味

講就講咁多，我自己因為係熱愛解謎所以好對我胃口，對於只有 PS4 / PSV 既解謎友苦於一直都無逆轉裁判呢類高汁解謎 Game，相信呢隻 Game 可以滿足到你，個人認為絕對值得一試！

 仲有 KOF XIV 既 Robert 粉墨登場！(好似係)