《Overwatch 鬥陣特攻》有好多角色，各有特色，不同人一定搵到自己喜歡的人物。VJ GAMER 將會介紹唔同的角色及簡單使用心得，希望各位喜歡。

選擇角色的畫面中，已經有角色簡單分類，分別為攻擊類、防守類、坦克類、支援類。

戰場上的柒碌 士兵76 屬於攻擊類，並且擁有全 Game 數一數二有型既 Skin。

VJGame 角色評價： ★ ★ ★ ★ ✩

特色：

整體能力非常平均，攻擊距離中遠，有瞬發高傷害技能，有範圍回血技，有跑步，移動速度中上 (跑步時上級速度)，血量 200，現版本存在 士兵76 x 6 強勢推車陣。

（其他攻擊角色，各有強弱項，敬請留意其他角色介紹。）

基本上士兵76 屬於初心角色，非常適合無玩開射擊遊戲既人士作為入門角色使用。

技能及技巧：

基本武器—重型脈衝步槍

25發子彈，攻擊力一般，連射速度不俗，穩定性高，距離遠近不影響攻擊力。槍法準既瞄頭打傷害力非常唔錯，大約有50傷害1粒子彈，好多時兜後陰啲陰啲就射死人。另外士兵 76 有個小技巧，槍身上面既顯示器會睇到殘彈量同旋風火箭使用狀態，可以更快速知道自己武器狀況。

連射速度高，打頭既話攻擊力唔小野

滿子彈 旋風火箭可用時槍身顯示

子彈用到咁上下會顯示為橙色 旋風火箭未用得就會係黃色顯示

L1 狗衝

最大功用就係死咗之後用，狗衝返去前線幫拖。另外團戰時亦都可以善用狗衝變換自己既位置支援隊友，落單唔夠抽時亦係唯一「有機會」令自己逃生既技能。如果係狗衝期間做任何狗衝以外既動作係會終止加速效果的 (跳例外)，技能係無任何 CD時間。

士兵 76 最常用主力技能，狗衝緊果陣除咗跳之外做任何動作都會取消加速狀態，而且狗衝緊唔可以用旋風火箭。

L2 旋風火箭

士兵 76 唯一瞬發高攻技能，會射出一督旋轉前進既火箭，攻擊力極高，測試時一炮可以對 LV2 槍塔做成超過一半血威力，大約可以打 220 血左右，CD 時間 8 秒。另外面對阿源，Mei Mei，呢類旋風火箭打唔中既話個人建議就立即用狗衝拉開距離。

R1 生化力場

使用後士兵 76 會放出一個範圍補血陣，回復力都幾高，1秒大約可以回 35 血左右，持續 6 秒，CD 15秒，不可堆疊，所以應該同隊友輪流放補血。

大絕「I’ve Got You In My Sight！」

攻擊力稍為提高，框框範圍內 100% 命中，打雷震子一流！建議係高點或者兜後使用，優先殺對方薄血角色。

技巧——記住自己係士兵

盡量唔好離群單殺

上面已經講過，士兵 76欠缺逃生技能，除非有大絕唔係唔太建議獨自進入敵陣殺人，除咗時刻利用狗衝技能轉位置射擊之外，補血亦都非常重要，好多時因為有你既補血延長咗我方生存時間。另外上面提過士兵 76 支槍距離遠近都係咁既傷害，咁就無謂行太前啦……基本上長期係中後排射擊係 76 基本戰術。

盡量團體行動

製作 L 位射角 

呢樣基本上係射擊遊戲常識，由於士兵 76 擁有狗衝技能，所以更容易更有條件去做成 L位，不過都係果句……最好等埋隊友一齊射。

例如當正面敵人起盾

轉到側邊形成L位射擊

多用L2 旋風火箭

話就話係 1 on 1時既必殺，但係基於上面所講既技巧，甚少機會隻抽隻的，當係團隊中後方時候不放浪出，反正 CD 快，射入人堆一個唔小心就會秒到人，不妨多用。

成堆人係個窄位度就係時間轟落去啦

總結

士兵 76 易上手，係初玩射擊遊戲既恩物，基本技巧唔好淨係向一個方向邊行邊開槍，跳住開槍等等係必修，企定定開槍更加係大忌！但係亦要注意自己係團隊既定位，士兵 76 除咗係團隊固定傷害輸出之外，仲要做埋 Part-Time 補師，除此之外對付雷震子同槍塔都屬於士兵 76 既工作，而且我地發現士兵 76 最強既並唔係一隻，當你組成「一隊」士兵 76 去推車既時候就會感受到團結既力量，就算無一隊，2隻一齊行既士兵 76 亦係極麻煩既組合。暫時我地仲未試到有方法破解 6隻士兵 76 推車陣，所以趁未 Nerf 之前好快啲用啦！

有興趣既可以睇下外國一班人玩既 76 x 6