黎到《 Uncharted 》系列最後一集，故事方面都仍然係好大路嘅荷里活動作片故仔，講主角 Nathan Drake 經歷咗三集歷險，終於同女主角Elena Fisher 結婚，仲搵咗份安穩嘅工作過住平淡生活，事情當然唔會咁簡單，原來 Nathan Drake 個阿哥 Samuel Drake 未死，仲番黎話比黑幫迫佢搵寶藏，要主角出山幫手，就係咁，Nathan Drake 最後一次歷險就開始啦! 今集故仔就咁睇好普通，我嫌故仔初頭有少少拖劇情，但當中都有驚喜，不過不失。

畫面方面真係超水準，地圖環境都整到好仔細，特別落雨嘅場口，畫面都非常暢順都細膩，另外人物皮膚都造得超水準，面部表情都好逼真，加上劇情片段同遊戲畫面都無縫連接，就算你睇人打呢隻 game 都可以當睇戲。

而今集加入拍攝模式，係遊戲途中可以隨時影相，難怪好多龍友玩呢隻 game 影相影到顛咗，睇番啲作品真係同實境有得揮。

玩法方面，初頭關數都係跑跑跳跳，甚少有戰鬥，就算有戰鬥都係普通槍戰，而遊戲初頭會有個小插曲，玩家可以玩《 古惑狼 》嘅小遊戲。

後面嘅關卡就有改善，大型QTE逃亡非常華麗及緊湊，但指示有少少模糊，當你死一兩次先比指示。

今集主角加入新道具繩索同爬山釘，主要用途都係用黎係山中移動，好似蜘蛛俠咁，而係空中加入攻擊動作，可以一擊打抵敵人，而係多人模式，你可以用繩索儲氣去當近攻打擊敵人。

今集某幾關加入咗加吉普車，可用半 open world 形式去目的地 ( 其實有特定嘅路線 )，玩家亦都要運用車頭繩索去解決障礙物。而今集解謎部分仍然相當精彩，但略嫌少咗啲，另外亦都加重咗潛入原素，有啲關卡可以潛入一槍唔開就過到關，可惜嘅係近戰格鬥方面仍然係非常弱。

今集加入咗多人模式，5V5嘅對戰，玩法有死鬥、搶點同運送寶物，如果你有玩《Metal Gear Solid 5 》嘅 《 Metal Gear Online 》，你就會發現人物設定有啲相似，之係每個人有一定嘅點數，而你配每一種武器同技能都會消費唔同點數，要係一定嘅點數裡面去設定適合自己玩法嘅人物。而多人模式都加入好多技能，例如召喚重炮兵或救護兵輔助你等。多人模式都有課金制度，你可以課金令自己更快拎到高級武器、技能或者造型，遊戲平衡度唔太好，往往課金玩家會屈機少許。

總括而言，《 Uncharted 4 : A Thief’s End 》係四集裡面最好玩嘅一集，畫面根本就無得輸，睇片同玩嘅成份都恰到好處，我特別欣賞今集加入潛入原素，令到遊戲更刺激同緊湊，唯一失色嘅係多人模式，地圖同玩法都唔太突出同吸引，難以用多人模式留低玩家。身為系列中嘅最後作品，仍然保得住水準兼有進步真係值得一讚，呢隻 game 值得一買!